ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލުވާމުގެ ބާރު ސިޔާސީ ޕާޓިތަކަށް ދީ, ގާނޫނު އަސާސީއަށް ގެނައި ބަދަލުގެ މައްސަލައިގެ ސުޕްރީމް ކޯޓުން ބަލަމުންދާ ދުސްތޫރީ މައްސަލައިގެ ހުކުމް ކުރުން އަންނަ ބުދަ ދުވަހަށް ތާވަލުކޮށްފި އެވެ.
އެންމެ މަތީ ކޯޓުން އެ މައްސަލައިގައި ހުކުމް ކުރާ އަޑުއެހުން ތާވަލުކުރީ ބުދަ ދުވަހުގެ ހެނދުނު 10:15 އަށެވެ. އެ މައްސަލަ ސުޕްރީމް ކޯޓަށް ހުށަހެޅުއްވީ ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު އަލީ ހުސެއިން އެެވެ. އެ މައްސަލައިގެ ތެރެއަށް އިދިކޮޅު އެމްޑީޕީ އިން ވަނީ ތަދައްހުލްވެފަ އެވެ.
ގޮނޑި ގެއްލޭ މައްސަލައިގެ އަޑުއެހުމެއް އެންމެ ފުރަތަމަ ބޭއްވީ ފެބްރުއަރީ 17، 2025 ގަ އެވެ. އެ މައްސަލައިގައި ދެވަނަ އަޑުއެހުމެއް ބޭއްވީ އޭގެ 421 ދުވަހުން މި ހިނގަމުންދާ އެޕްރީލް މަހުގެ ނުވަވަނަ ދުވަހު އެވެ.
އެންމެ ފަހުން މި މައްސަލާގައި ބޭއްވި އަޑުއެހުމުގައި ބަންޑާރަނައިބުގެ އޮފީހުން ވަނީ މަޖިލީހުގެ މެންބަރުން އެ މެންބަރުން ތަމްސީލު ކުރާ ޕާޓީ އިން ވަކި ކުރި ނަމަވެސް ގޮނޑި ނުގެއްލޭނެ ކަމަށް ބުނެފަ އެވެ.
ގާނޫނުއަސާސީގެ 73 ވަނަ މާއްދާގެ ބ. ގެ އެއް ވަނަ ނަންބަރުގައި ބުނެފައި ވަނީ "ސިޔާސީ ޕާޓީގެ މެންބަރުކަމުން ގާނޫނުގައި ބަޔާންކުރާ ގޮތުގެ މަތިން" މެންބަރަކު ވަކިކޮށްފި ނަމަ އޭނާގެ ގޮނޑި ގެއްލޭނެ ކަމަށެވެ.
ދައުލަތުން ބުނަނީ އެ މާއްދާގައި އެ ބުނާ ގާނޫނު އަދި ވުޖޫދުގައި ނެތް ކަމަށެވެ. އެހެންކަމުން ޕާޓީއަކުން މެންބަރަކު ވަކިކުރިޔަސް އޭނާ މެންބަރުކަމުން ވަކިނުވާނެ ކަމަށް ދައުލަތުން ބުންޏެވެ.
"އަޅުގަނޑުމެން މި ގާނޫނު މާނަ ކުރަނީ ކުރިއަށް އޮތް ތަނުގައި އަންނާނެ ގާނޫނެކޭ،" ވަކީލު ޝުހައިލް ވިދާޅުވި އެވެ.
ފުރަތަމަ އަޑުއެހުމުގައި ދައުލަތުގެ ފަރާތުން އިޖުރާއީ ނުކުތާއެއް ނަންގަވައި އެދުނީ ސުޕްރީމް ކޯޓަށް އެ މައްސަލަ ބެލުމުގެ އިހުތިސާސް ލިބިގެން ނުވާ ކަމަށް ކަނޑައަޅައިދިނުމަށެވެ. ނަމަވެސް، ސުޕްރީމް ކޯޓުގެ ހަތް ފަނޑިޔާރުންގެ ބެންޗުގައި މަޝްވަރާ ކުރުމަށް ފަހު ނިންމީ އެ މައްސަލަ ކުރިއަށްގެންދިޔުމަށެވެ.
ފުރަތަމަ އަޑުއެހުމާއި ދެވަނަ އަޑުއެހުން ބޭއްވި މުއްދަތުގެ ދޭތެރޭ ސުޕްރީމް ކޯޓަށް ބޮޑެތި ބަދަލުތަކެއް އައިސްފައިވެ އެވެ.
މަސައްލައިގައި އޮތީ ކީކޭ؟
ރައްޔިތުންގެ މަޖިލީހުގެ ސުޕަ މެޖޯރިޓީ އޮތް ޕީއެންސީގެ މެންބަރުންގެ ފުރިހަމަ ތާއިދާއެކު ގާނޫނުއަސާސީގެ ފަސް މާއްދާއަކަށް ގެނައި ބަދަލުގެ ތެރޭގައި ގާނޫނުއަސާސީގެ 73 އަށް ގެނައި ބަދަލާއެކު އިންތިހާބުވާ މެންބަރަކު މަޖިލީހުގެ އުމުރުގެ ތެރޭގައި އެހެން ސިޔާސީ ޕާޓީއަކަށް ބަދަލުވުން، ޕާޓީން ވަކިކުރުން ނުވަތަ އަމިއްލަ މެންބަރަކު ސިޔާސީ ޕާޓީއަކަށް ސޮއިކުރުމުން މަޖިލީހުގެ ގޮނޑި ގެއްލޭނެ ކަމަށެވެ.
އެހެންވެ، އަލީ ހުސައިން ހުށަހެޅި މައްސަލައިގައި ބުނެފައި ވަނީ ގާނޫނުއަސާސީގެ 73 ވަނަ މާއްދާއަށް ގެނައި ބަދަލު، ގާނޫނުއަސާސީގެ ހަތަރު ވަނަ މާއްދާގެ ދަށުން ދިވެހި ދައުލަތުގެ އެންމެހައި ބާރުތައް ދިވެހިރައްޔިތުންގެ ކިބައިގައި ދެމި އޮތުމުގެ އަސާސާއި، ގާނޫނުއަސާސީއާ އެއްގޮތްވާ ގޮތުގެ މަތީން ދިވެހި ދައުލަތުގެއެންމެހައި ބާރުތައް ހިންގަންވާނޭކަމަށް ގާނޫނުއަސާސީގެ އަށް ވަނަ މާއްދާގައި އޮންނަ އަސާސާއި، ގާނޫނު ހެދުމުގެ އެންމެހައި ބާރެއް ލިބިގެންވާ ވަކި މިނިވަން ބާރެއްގެ ގޮތުގައި ރައްޔިތުންގެ މަޖިލިސް ދެމި އޮތުމަށް ގާނޫނުއަސާސީގެ ފަސް ވަނަ މާއްދާއިން ކަނޑައަޅާފައި އޮތް ދުސްތޫރީ ހަމައާ ހިލާފު ކަމަށެވެ.
އެ ބަދަލު ގާނޫނުއަސާސީގެ 26 ވަނަ މާއްދާ އާއި، ގާނޫނުއަސާސީގެ 75 ވަނަ މާއްދާ އާއި، 90 ވަނަ މާއްދާއާ ވެސް ފުށުއަރާ ކަމަށް އަލީ ހުސައިން ހުށަހެޅި މައްސަލައިގައި ބުނެފައިވެ އެވެ. އަދި އެއީ ތިން ބާރު ވަކިވެފައިވާ ރިޔާސީ ނިޒާމު ގަޑުބަޑުވެގެންދާނެ އިސްލާހެއް ކަމަށް ވެސް ބުނެފައިވެ އެވެ.
އެހެންވެ އެ އިސްލާހަކީ ދުސްތޫރީ ބާރުވެރިކަން ލިބިގެން ނުވާ ބާތިލު އިސްލާހެއް ކަމަށް ކަނޑައަޅައި ދިނުމަށާއި، އެ އިސްލާހަށް އަމަލުކުރެވޭ މުއްދަތުގައި ވެސް، މިހާރު ހިނގަމުންދާ 20 ވަނަ ރައްޔިތުންގެ މަޖިލީހުގެ މެންބަރުންގެ މައްޗަށް ހިނގާނެ އިސްލާހެއް ނޫން ކަމަށް ކަނޑައަޅައި ދިނުމަށް އަލީ ހުސައިން އެދިވަޑައިގެންފައިވެ އެވެ.
