އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަންގެ މަގާމަށް އިންތިހާބުވެއްޖެނަމަ އެ ޕާޓީއަށް ލިބޭ ފައިސާއަށް ވާ ގޮތް އާންމު މެންބަރުންނަށް އަންގާނެ ކަމަށް ގަލޮޅު ދެކުނު ދާއިރާގެ މެންބަރު މީކާއިލް ނަސީމް ރޭ ވިދާޅުވެއްޖެ އެވެ.
ރައްޔިތުންގެ މަޖިލީހުގައި ދެވަނަ ދައުރެއް އަދާކުރައްވަމުން ގެންދަވާ މީކާއިލް ގެންދަވަނީ އެމްޑީޕީގެ އިސް މަގާމަށް ވާދަކުރައްވަމުންނެވެ. އެ ޕާޓީގެ ޔޫތު ވިންގުގެ ރައީސްކަން ވެސް ކުރެއްވި މީކާއިލް ކުރައްވަމުން ގެންދަވާ "އިތުބާރު" ކެމްޕޭންގެ ތެރެއިން ރޭ މާލޭގައި ބޭއްވި ޖަލްސާއެއްގައި ވާހަކަ ދައްކަވަމުން މީކާއިލް ވަނީ އޭނާގެ ޗެއާޕާސަން ކަމުގައި އެ ޕާޓީގެ އެކަކު ވެސް ބައިވެރިނުވާނެ ކަމަށް ވިދާޅުވެފަ އެވެ.
"އަޅުގަނޑުގެ ޗެއާޕާސަން ކަމެއްގައި އެމްޑީޕިއަށް ލިބޭ ގޮނޑި މޭޒު، އެ ގޮނޑި މޭޒަށް ވާ ގޮތް، ރަނުން ރަނަށް ތި ބޭފުޅުންނަށް އަޅުގަނޑު އަންގާނަން. އިރާދުކުރެއްވިއެްޔާ ދެފުށް ފެންނަ ސިޔާސަތެއްގެ ދަށުން އެމްޑީޕީއަށް ދޭ ފައިސާއަކީ ހަގީގަތުގައި ވެސް މި ޕާޓީގެ މެންބަރުންގެ ކުރިމަގަށް، އިންސާފަށް ހޭދަކުރެވޭ ފައިސާއަށް ހަދާނަން،" މީލާއިލް ވިދާޅުވި އެވެ.
ނިމިދިޔަ ކައުންސިލް އިންތިހާބުގައި އެމްޑީޕީގެ ޕާލިމެންޓަރީ ގްރޫޕާއެކު ރާއްޖޭގެ 100 އަށްވުރެ ގިނަ ރަށަށް ދަތުކުރެވުނު ކަމަށް މީކާއިލް ވިދާޅުވި އެވެ. އަދި އެ ދަތުރުތަކުގައި އާންމުން މެންބަރުންގެ ކަންބޮޑުވުންތައް އިވުނު ކަމަށް މީކާއިލް ވިދާޅުވި އެވެ.
"އަޅުގަނޑުމެން އެމްޑީޕީގެ އާންމު މެންބަރުންގެ ގާތަށް ގޮސް އެ މީހުންގެ ޝަކުވާތައް ވަރަށް ގާތުން އަޑުއެހުން. އެ މީހުންގެ އެންމެ ބޮޑު ޝަކުވާއަކީ މި ޕާޓީގެ ހިންގުމާމެދު އޮތް ޝަކުވާ. އެ މީހުންގެ އެންމެ ބޮޑު ޝަކުވާއަކީ އެ މީހުންގެ ނަމުގައި ވެސް މި ޕާޓީއަށް ލިބޭ ފައިސާއަށް ވާ ގޮތް ނޭނގޭ ކަމާ މެދު އޮތް ޝަކުވާ،" މީކާއިލް ވިދާޅުވި އެވެ.
އެންމެ ފަހުން ބޭއްވި ރިޔާސީ އިންތިހާބާ ހަމައަށް ވަރަށް ބޮޑެތި އަދަދުތަކުން އެމްޑީޕިއަށް ފައިސާ ލިބުނު ކަމަށާއި އޭރު އެ ޕާޓީގެ މެންބަޝިޕް ވެސް އޮތީ އިންތިހާއަށް މަތީގައި ކަމަށް މީކާއިލް ވިދާޅުވި އެވެ. އާންމު މެންބަރުން މިއަދު އެ ލިބުނު ފައިސާ ކޮބާތޯ އަހަމުންދާ ކަމަށް އޭނާ ވިދާޅުވި އެވެ.
"އެމްޑީޕީގެ ބޭންކު އެކައުންޓް ފްރީޒްވެފައި ހުރީ ކޮން ސަބަބަކާ ހުރެތޯއޭ، އެމްޑީޕީގެ މާލީ ނިޒާމު ދެފުށް ފެންނަ މިހާތަނަށް، އެމްޑީޕިއަށް 20 އަހަރު ވެގެނެްދާއިރު ނެތީ ކީއްވެގެންތޯއޭ،" މީކާއިލް ވިދާޅުވި އެވެ.
އަންނަ ޖޫން 12، ގައި ބާއްވާ އެމްޑީޕީގެ ޗެއާޕާސަން އިންތިހާބުގައި މީކާއިލްއާ ދެކޮޅަށް ނުކުންނަވަނީ ކުރީގެ ރައީސް މުހައްމަދު ނަޝީދު އެވެ. އެ ދެ ބޭފުޅުންވެސް ދަނީ އިންތިހާބަށް ކެމްޕެއިން ކުރައްވަމުންނެވެ.
