ހުސްވެފައިވާ ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ގޮނޑިއަށް ވާދަކުރުމަށް ކުރިމަތިލުމުގެ މުއްދަތު އިލެކްޝަންސް ކޮމިޝަނުން މިއަދު އިތުރުކޮށްފި އެވެ.
މީގެ ކުރިން ކުއި އިއުލާނުގައި އޮތްގޮތުން އެ މުއްދަތު ހަމަވާނީ އެޕްރީލް 29، ގަ އެވެ. އީސީން މިއަދު އެ މުއްދަތު އިތުރުކުރީ މެއި ދެވަނަ ދުވަހުގެ 15:00 ގެ ނިޔަލަށެވެ.
އެ ދާއިރާގެ ގޮނޑި ހުސްވީ އެ ގޮނޑި ފުރުއްވަމުން ގެންދެވި މުހައްމަދު ސިނާނު (ސިނާ) ގެ މެންބަރުކަމުގެ ޝަރުތުހަމަނުވެގެން މަގާމު ގެއްލުމުންނެވެ. ސާބިތު ދަރަންޏެއް އޮވެ އެ ދަރަންޏާ އެއްގޮތަށް ފައިސާ ދައްކަމުންނުދިޔުމުން ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އަށް ނިސަބަތްވާ ސިނާނުގެ ގޮނޑި ގެއްލިފައިވާ ކަމަށް ސުޕްރީމް ކޯޓުން ހުކުމް ކުރީ އެޕްރީލް 12، ގަ އެވެ.
އެހެން ނަމަވެސް، ސިނާނު ވަނީ ޕީއެންސީގެ ޕްރައިމަރީ ކާމިޔާބުކޮށް އަނެއްކާ ވެސް ގޮނޑިއަށް ވާދަކުރުމަށް އެ ޕާޓީގެ ޓިކެޓު ކަށަވަރު ކުރައްވާފަ އެވެ. ސިނާނަށް 226 ވޯޓު ލިބުނުއިރު އޭނާއާ ވާދަ ކުރެއްވި އަހުމަދު ސައީދަށް ލިބުނީ 187 ވޯޯޓެވެ.
އިދިކޮޅު އެންމެ ބޮޑު ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޓިކެޓަށް އެހެން އެއްވެސް މީހަކު ވާދަނުކުރުމުން ޓިކެޓް ލިބުނީ ކުރީގެ މޭޔަރު އަބްދުﷲ ސޯދިގު (ސޯބެ) އަށެވެ. އައްޑޫގެ މޭޔަރުގެ މަގާމުގައި ޖެހިޖެހިގެން ތިން ދައުރު ހުންނެވި ސޯބެ ޕްރައިމަރީގައި ވާދަ ކުރައްވަން ނިންމެވި ހިސާބުން ވެސް ވަރަށް ގިނަ ބައެއްގެ ތާއިދު އޭނާއަށް ލިބުނެވެ.
އެޕްރީލް 2024، ގައި ބޭއްވި މަޖިލިސް އިންތިހާބުގައި ސިނާނު ގޮނޑި ކާމިޔާބު ކުރެއްވީ 1079 ވޯޓާއެކު 39 ޕަސެންޓުންނެވެ. ސިނާނު ވާދަ ކުރެއްވީި ރައްޔިތުންގެ މަޖިލީހުގެ ރައީސްގެ މަގާމުގައި އަދި ރިޔާސީ އިންތިހާބުގައި އިދިކޮޅު އެމްޑީޕީގެ ރަނިންމޭޓަކަށް ވެސް ހުންނެވި މުހައްމަދު އަސްލަމްއާ އެވެ. އަސްލަމްއަށް ލިބިވަޑައިގަތީ 838 ވޯޓެވެ.
ނަވާރަވަނަ މަޖިލީހުގައި ދެ ބައި-އިލެކްޝަނެއް ބޭއްވި އެވެ. އެއީ ކޮމަންޑޫ ދާއިރާ އާއި މާލެ އަތޮޅު ގުރައިދޫ ދާއިރާގެ މެންބަރުކަން ކުރައްވަމުން ގެންދެވި ބޭފުޅުން ނިޔާވުމުން ބޭއްވި ބައި-އިލެކްޝަންތަކެކެވެ. އެ ދެ އިންތިހާބު ވެސް ކާމިޔާބުކުރީ އޭރު ވެރިކަމުގައި އޮތް އެމްޑީޕީ އެވެ.
