13 ރަށަކުން މަސްވެރިކަން ކުރާ ދޯނިތަކަށް އެސްޓީއޯ ޝެޑް ރޭޓުގައި ތެޔޮ ލިބޭނެ އިންތިޒާމު މާދަމާއިން ފެށިގެން ހަމަޖެހިފައިވާ ކަމަށް އެސްޓީއޯ އިން ބުނެފި އެވެ.
އެސްޓީއޯއިން ބުނީ ފަހި ހަކަތައިގައި ރަޖިސްޓްރީވެފައިވާ ދޯނިތަކަށް ސަބްސިޑައިޒް އަގުގައި މާދަމާއިން ފެށިގެން ތެޔޮ ލިބޭނެ ކަމަށެވެ.
ކަޅުބިލަ މަސްވެރިކަމަށް ބޭނުންކުރާ ބޮޑެތި އުޅަނދުފަހަރަށް ދަތުރަކަށް ހަމައެކަނި 1،200 ލީޓަރުގެ ތެޔޮ ދޫކުރާތީ އެކަމާ ގުޅިގެން ހުށަހެޅި ޝަކުވާތަކާއެކު، ދަތުރަކަށް 1،500 ލީޓަރު ދޫކުރާ ގޮތަށް މިހާރު ވަނީ ހަމަޖައްސާފަ އެވެ.
ސަބްސިޑީ ރޭޓުގައި މަސްވެރިންނަށް ކުރިން ތެޔޮ ލިބެނީ މިފްކޯގެ ސެންޓަރުތަކުންނެވެ. މިފްކޯއަށް މަސް ކިރާ މަސްވެރިންނަށް ޑީސަލް ލީޓަރެއް ވިއްކާނެ ކަމަށް ބުނެފައި އޮތީ 16.54ރ. އަށެވެ.
މަސްވެރިކަމަށް ދޯނިތަކުން 958 ފަހަރު ހޯދި ހިދުމަތަށް 1.1 މިލިއަން ލީޓަރުގެ ސަބްސިޑައިޒް ތެޔޮ ވަނީ ދޫކޮށްފަ އެވެ.
މަސްވެރިކަން ކުރާ ދޯނިތަކަށް ސަބްސިޑައިޒް އަގުގައި ތެޔޮ ވިއްކާ ރަށްތައް:
- ހއ. އިހަވަންދޫ
- ހދ. ހަނިމާދޫ
- ށ. މިލަންދޫ
- ބ. އޭދަފުށި
- ފ. ނިލަންދޫ
- ކ. ހިންމަފުށި
- ރ. ދުވާފަރު
- ދ. ކުޑަހުވަދޫ
- ޅ. ފެލިވަރު
- ގއ. ކޫއްޑޫ
- ފުވައްމުލައް ސިޓީ
- ސ. ހުޅުމީދޫ
- ހުޅުމާލެ ޖެޓީ
އިޒްރޭލާއި އެމެރިކާއިން އިރާންއާ ދެކޮޅަށް ފެށި ހަނގުރާމައިގެ ސަބަބުން ދުނިޔެއަށް ވަނީ ތެލުގެ ބޮޑު ތާށިކަމެއް ކުރިމަތިވެފަ އެވެ. ރާއްޖޭގައި ދެ ފަހަރަށް ތެލުގެ އަގު އުފުލި، މިހާރު ތެޔޮ ލިބެނީ 100 ޕަސެންޓު އަގު ބޮޑުކޮށެވެ.
އެފްއެސްއެމް އިން އެއްގަމުގައި ހިންގާ ތެޔޮ ޝެޑުތަކުން ވިއްކާ ތެޔޮ ފިޔަވައި އެހެން ހުރިހާ ތެލެއްގެ އަގު ވަނީ ބޮޑުކޮށްފަ އެވެ.
