ހުޅުމާލޭގެ ދެވަނަ ފިޔަވަހީގައި އަންހެނުންނާއި ކުޑަކުދިންނަށް ހާއްސަކޮށްގެން ބޮޑު ހޮސްޕިޓަލެއް އެޅުމަށް ކުރިން ރާވާފައި އޮތް ރޭވުން ބަދަލުވެ، އެ ހިދުމަތްތައް އަލަށް ގާއިމުކުރާ މަލްޓި ސްޕެޝަލިޓީ ހޮސްޕިޓަލުގެ ތެރޭގައި ހިމެނޭ ހާއްސަ ޔުނިޓަކަށް ނުވަތަ ޑިޕާޓްމަންޓަކަށް ބަދަލުވެއްޖެ އެވެ.
ރައީސް މުހައްމަދު މުއިއްޒު އިއްޔެ ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، ހުޅުމާލޭގެ ދެވަނަ ފިޔަވަހީގައި 500 އެނދުގެ މަލްޓި ސްޕެޝަލިޓީ ހޮސްޕިޓަލެއް އެޅުމަށް ސަރުކާރުން ގަސްދުކޮށްފައިވާ ކަމަށެވެ. އަދި ކުރިން ވަކި ހޮސްޕިޓަލެއްގެ ގޮތުގައި ތަރައްގީކުރަން ނިންމި އަންހެނުންނާއި ކުޑަކުދިންގެ ހިދުމަތްތައް މިހާރު ހިމެނިގެންދާނީ މި ބޮޑު ހޮސްޕިޓަލް ކޮމްޕްލެކްސްގެ ތެރޭގައި ހިމެނޭ ހާއްސަ ޑިޕާޓްމަންޓެއްގެ ގޮތުގައި ކަމަށް މުއިއްޒު ފާހަގަކުރެއްވި އެވެ.
މި މަޝްރޫއުގެ ފަންނީ މަސައްކަތްތަކާއި ފަންޑިންއާ ގުޅޭ ކަންކަން މިހާރު ކުރިއަށްދާ ކަމަށާއި، މިއަހަރުގެ މެދުތެރޭގައި ހުރިހާ ތައްޔާރީތަކެއް ނިންމައި އަމަލީ މަސައްކަތް ފެށުމަކީ ސަރުކާރުގެ އަމާޒެއް ކަމަށް މުއިއްޒު ވިދާޅުވި އެވެ. މި ހޮސްޕިޓަލް ކޮމްޕައުންޑުގެ ތެރޭގައި ކެންސަރު ބައްޔަށް ފަރުވާދޭނެ ހާއްސަ ފެސިލިޓީއަކާއި ރޭޑިއޭޝަން ޗެމްބަރެއް ވެސް ގާއިމުކުރެވޭނެ އެވެ.
"މި މަލްޓި ސްޕްޝަލިޓީ ހޮސްޕިޓަލްގެ ތެރެއަށް އަންހެނުންނާއި ކުޑަކުދިންނާ ބެހޭ ހާއްސަ ޑޮކްޓަރުންގެ ޔުނިޓް ނޫނިއްޔާ ޑިޕާޓްމެންޓު ވެސް އަންނާނީ. އެހެންވީމަ އެ މަސައްކަތްތައް އެބަ ހިނގާ،" ރައީސް ވިދާޅުވި އެވެ.
މީގެ ކުރިން ހެލްތު މިނިސްޓްރީން ހާމަކޮށްފައިވާ ގޮތުގައި، ހުޅުމާލޭގެ ދެވަނަ ފިޔަވަހިން 46،000 އަކަފޫޓުގެ ބިމެއްގައި އަންހެނުންނާއި ކުޑަކުދިންނަށް ހާއްސަ ހޮސްޕިޓަލެއް އެޅުމަށް ވަނީ ނިންމާފަ އެވެ.
އެ މަޝްރޫއުގެ ދަށުން އައިވީއެފްގެ ހިދުމަތާއި، މާބަނޑު މީހުންނަށް ދޭ ހާއްސަ ފަރުވާތަކާއި، ކުޑަކުދިންގެ އިންޓެންސިވް ކެއާ އަދި ސާޖަރީ ފަދަ މުހިންމު ހިދުމަތްތައް ފޯރުކޮށްދިނުމަށް ރާވާފައިވެ އެވެ.
ނަމަވެސް އިއްޔެ މުއިއްޒު ވިދާޅުވި ގޮތުން މި ހުރިހާ ހިދުމަތްތަކެއް ދެން ޖަމާކުރެވޭނީ 500 އެނދުގެ މަލްޓި ސްޕެޝަލިޓީ ހޮސްޕިޓަލުގެ ތެރެއަށެވެ.
ހުޅުމާލޭގެ ސިއްހީ ނިޒާމު ހަރުދަނާކުރުމަށް ކުރެވޭ މަސައްކަތްތަކުގެ ތެރެއިން، ފުރަތަމަ ފިޔަވަހީގައި ހުރި ހުޅުމާލެ ހޮސްޕިޓަލްގެ ބިމުގައި އިތުރު ބޮޑު އިމާރާތެއް އެޅުމަށް އިންޑިއާގެ ލައިން އޮފް ކްރެޑިޓް (އެލްއޯސީ) އަށް ހުށަހަޅާފައިވާ ކަމަށް ވެސް ރައީސް ވިދާޅުވި އެވެ.
