ރާއްޖެއަށް އެންމެ ގިނައިން ސިމެންތި ގެންނަ ތިން ކުންފުނީގެ ތެރޭގައި ހިމެނޭ ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ގދ. ތިނަދޫގައި ލިމިޓްކޮށްގެން ސިމެންތި ވިއްކާތީ ރައީސް މުހައްމަދު މުއިއްޒުގެ އިސްތިއުފާއަށް މިއަދު ގޮވައިފި އެވެ.
އަދަދު އަށް އެނގިފައިވާ ގޮތުގައި ތިނަދޫގައި ހުންނަ އެސްޓީއޯ ފިހާރައަށް ގިނަ ދުވަސްތަކެއް ފަހުން ސިމެންތި ލިބުމުން ބޮޑު ކިޔޫއެއް ދަމާލިއިރު، ކޮންމެ މީހަކަށްވެސް ވިއްކީ ފަސް ސިމެންތި ބަސްތާ އެވެ.
ގިނަ ބަޔަކު ސިމެންތި ގަންނަން ގޮސް ތިއްބާ އެސްޓީއޯއިން އެ ރަށަށް ގެނައި ސިމެންތި ޝިޕްމަންޓް ހުސްވެފައިވާ ކަމަށް މައުލޫމާތު ލިބެ އެވެ.
މިކަމާ ގުޅިގެން އެސްޓީއޯގެ މީޑިއާ އޮފިޝަލް ޝިފްލާ އިބްރާހިމް އަދަދު އަށް ވިދާޅުވީ ތިނަދޫގައި ލިމިޓްކޮށްގެން ސިމެންތި ވިއްކަމުންދަނީ އާ ސްޓޮކް ލިބެންދެން ސަޕްލައި ހިފެހެއްޓުމަށް ކަމަށެވެ.
"މިވަގުތު ތިނަދޫގެ ސްޓޮކް މަދުވެގެން އާސްޓޮކް ލިބެންދެން ސަޕްލައި ހިފެހެއްޓުމުގެ މަސައްކަތް ކުރަމުންދަނީ އަދި ތިނަދޫއަށް ބޮޑު ޝިޕްމަންޓެއް މާލެ ކޮޅުން ފޮނުވުމަށް ލޯޑު ކުރަމުންދަނީ،" އޭނާ ވިދާޅުވި އެވެ.
އެސްޓީއޯއިން ކުރިން ބުނެފައިވަނީ އެއްވެސް ތަނެއްގައި ލިމިޓްކޮށްގެން ސިމެންތި ނުވިއްކާ ކަމަށެވެ. އެކަމަކު މި ނޫހަށް މައުލޫމާތު ލިބިފައިވާ ގޮތުގައި އެ ކުންފުނިން ރާއްޖޭގެ ހުރިހާ ރަށެއްގައި ވެސް ސިމެންތި ވިއްކަމުންދަނީ ލިމިޓްކޮށްގެންނެވެ.
މެދުއިރުމަތީގައި މިހާރު ކުރިއަށްދާ ހަނގުރާމައާ ގުޅިގެން ރާއްޖެއަށް ސިމެންތި ލިބުމުގައި ދަތިތަކެއް ކުރިމަތިވިއިރު ވެސް، އެކަން މުއިއްޒު އުފެއްދެވި ކެބިނެޓް މިނިސްޓަރުންގެ ކާރިސާ ކޮމިޓީއަށް ނޭނގޭކަން އިކޮނޮމިކް މިނިސްޓަރު މުހައްމަދު ސައީދު ކުރިން ވިދާޅުވި އެވެ.
މިދިޔަ ހަފްތާގައި ސައީދު ވިދާޅުވީ ސިމެންތި ލިބުމުގައި ކޮންމެވެސް ވަރެއްގެ ދަތިތަކެއް ދިމާވި ނަމަވެސް، ސިމެންތި ލިބޭނެ އިތުރު ހަތަރު ސަޕްލަޔަރުން ވެސް މިހާރު ހަމަޖެހިފައިވާ ކަމަށެވެ.
މިވަގުތު އާންމުކޮށް ސިމެންތި ގަންނަން ލިބެނީ ވިލާ ކުންފުނިން އެކަންޏެވެ. ވިލާ އާއި އެސްޓީއޯގެ އިތުރުން ރާއްޖެއަށް ދެން ސިމެންތި ގެންނަ އެޕޯލޯއަކު ސިމެންތީގެ ސްޓޮކެއް ނެތެވެ.
ފަތުރުވެރިކަން ނެގުމަށްފަހު ކޮންސްޓްރަކްޝަން އިންޑަސްޓްރީ އާއި މަސްވެރިކަމަކީ ރާއްޖޭގެ އިގްތިސާދަށް އެންމެ ބޮޑު ހިއްސާއެއްދޭ ދެ އިންޑަސްޓްރީ އެވެ. ކޮންސްޓްރަކްޝަން އިންޑަސްޓްރީއަކީ ރާއްޖޭގެ ޖީޑީޕީގެ 5.5 ޕަސެންޓެވެ.
ކޮންސްޓްރަކްޝަން އިންޑަސްޓްރީގައި ބޭނުންކުރާ ތަކެތީގެ އަގުބޮޑުވިއިރު، ތެލާއި ކާބޯތަކެއްޗާއި ދަތުރުފަތުރާއި ނާލުގެ އަގު ވެސް ވަނީ އަގުބޮޑުވެފަ އެވެ. ދަތުރުފަތުރާއި ނާލުން އަގުބޮޑުވީ ސަރުކާރުން ވިއްކާ ތެލުގެ އަގު ބޮޑުވުމުންނެވެ.
