ދިވެހިރާއްޖޭގެ ހާރިޖީ ސިޔާސަތާއި، ސަރަހައްދީ ސަލާމަތާއި، ބައިނަލްއަގުވާމީ ގުޅުންތަކާ ގުޅޭގޮތުން އާންމުކޮށް ވާހަކަ ދެއްކުމުގައި ގައުމީ މަސްލަހަތަަށް އިސްކަންދީ ނުހަނު ބޮޑަށް ސަމާލުވުމަށް ފޮރިން މިނިސްޓްރީން އެދިއްޖެ އެވެ.
ސަރުކާރުން މިފަދަ ބަޔާނެއް ނެރެފައި މިވަނީ އިންޑިއާއަށް ކުރެއްވި ރަސްމީ ދަތުރެއްގައި ކުރީގެ ރައީސް މުހައްމަދު ނަޝީދު ރާއްޖޭގެ ބައެއް ހާރިޖީ ގުޅުންތަކާ ބެެހޭ ވާހަކަތަކެއް ދައްކަވާފައިވާ ދަނޑިވަޅެއްގަ އެވެ.
ނަޝީދަކީ ބައިނަލްއަގުވާމީ މަޝްރަހުގައި މަގުބޫލު ލީޑަރެއް ކަމަށްވާއިރު ސަރަހައްދީ ގައުމުތަކާއެކު ވެސް ގާތް ގުޅުންތަކެއް އެމަނިކުފާނު ބާއްްވަ އެވެ. އިންޑިއާއިން އެނބުރި ވަޑައިގެން އެއާޕޯޓުގައި ހުންނަވައި ނަޝީދު ވަނީ ރާއްޖެއާ ދެމެދު އޮތް ޑިޕްލޮމެޓިކް ގުޅުން ސަސްޕެންޑުކޮށްފައިވާ މޮރިޝަސް އިން ދިވެހި ސަރުކާރާ ވާހަކަ ދައްކަން ތައްޔާރަށް އޮތް ކަމަށް ވިދާޅުވެފަ އެވެ.
މިއަދު ހާރިޖިއްޔާއިން ނެރުނު ބަޔާނެއްގައި ބުނީ ދައުލަތުގެ މަތީ މަގާމުތައް ފުރުއްވާފައިވާ ބޭފުޅުން ދައްކަވާ ވާހަކަތަކުގެ ސަބަބުން ސަބަބުން ބޮޑެތި ނަތީޖާތަކެއް ނުކުތުމުގެ ފުރުސަތު އޮތް ކަމަށެވެ. އެހެންކަމުން، އެފަދަ ބަޔާންތަކަކީ ސައްހަ މައުލޫމާތުގެ މައްޗަށް ބިނާވެފައިވާ މަޝްވަރާތަކަށާއި، ގައުމީ އެއްބައިވަންތަކަމާއި، ދިވެހިރާއްޖޭގެ މުއައްސަސާތަކަށް އޮންނަ އިތުބާރު ބަދަހިކުރުމަށް މަގުފަހިވާ ވާހަކަތަކަށް ވާން ޖެހޭ ކަމަށް ފޮރިން މިނިސްޓްރީން ބުނެފައިވެ އެވެ.
ސަރަޙައްދީ ސުލްހަ މަސަލަސްކަމާއި، ކަނޑުގެ ސަލާމަތާއި، ދެމެހެއްޓެނިވި ތަރައްގީ އަދި ބައިނަލްއަގުވާމީ ހަމަޖެހުމާ ގުޅުންހުރި ކަންކަމުގައި، އެއްގަލަކަށް އަރާ ޤައުމުތަކާއި ޖަމްޢިއްޔާތަކާއެކު، ހަމަހަމަ އަދި ބިނާކުރަނިވި ގޮތެއްގައި އެއްބާރުލުން ދޭނެ ކަމަށް ސަރުކާރުން ބުނެ އެވެ.
މިފަދަ ބަޔާނެއް ސަރުކާރުން ނެރެފައިވާއިރު 2023 ގެ އިންތިހާބު ކާމިޔާބު ކުރަން މުއިއްޒުގެ ސަރުކާރުގައި މިވަގުތު ތިއްބެވި ބޭފުޅުން ކުރެއްވި ކެމްޕޭނަކީ މިފަހުގެ ތާރީހެއްގައި ރާއްޖޭގެ ޑިޕްލޮމެޓިކް ގުޅުންތަކަށް އެެންމެ ބޮޑަށް އަސަރުކުރި އެއް ކެމްޕޭނެވެ.
ސަރުކާރަށް އައުމަށްފަހު ވެސް ސަރުކާރުގެ މަތީ މަގާމުތަކުގައި ތިބި ބަޔަކު އަވަށްޓެރި އިންޑިއާގެ ބޮޑުވަޒީރަށް ފުރައްސާރަ ކުރުމުގެ ސަބަބުން ދެ ގައުމުގެ ގުޅުން ވަރަށް ބޮޑަށް ގޯސްވި އެވެ. ނަމަވެސް، މިހާރު އަނެއްކާ ވެސް ދެ ގައުމުގެ މެދުގައި އޮތް ގުޅުން ވަނީ ރަނގަޅުވެފަ އެވެ.
