ސަރުކާރުގެ ސިޔާސަތުތަކަށް ފާޑުކިޔުމަކީ ވާދަވެރި ސިޔާސީ ޕާޓީތަކުގެ ޒިންމާއެއް ކަމަށާއި ދިވެހިރާއްޖެއަކީ ހަމައެކަނި މި ސަރުކާރުގެ ތަނެއް ނޫންކަމަށް ވިދާޅުވެ ކުރީގެ ރައީސް މުހައްދު ނަޝީދު ސަރުކާރަށް ރައްދުދެއްވައިފި އެވެ.
އެކްސްގައި ނަޝީދު ކުރެއްވި ޕޯސްޓެއްގައި ވިދާޅުވީ އެކުވެރި ދައުލަތްތަކުން ދޭ މާލީ އެހީ އާއި ލޯނު ބޭނުންކުރަންޖެހޭނީ ޒިންމާދާރުކަމާއެކު ކަމަށެވެ. އަދި، ދިވެހިރާއްޖެއަކީ ހުރިހާ ދިވެހީންގެ ތަނެއް ކަމަށް އެމަނިކުފާނު ވިދާޅުވި އެވެ.
"ސަރުކާރުގެ ހާރިޖީ ސިޔާސަތާއި އަދި އެހެންވެސް ހުރިހާ ސިޔާސަތުތައް މުތާލިއާކޮށް، ދެނެގަނެ، އެ ސިޔާސަތުތަކަށް ފާޑުކިޔުމަކީ ވާދަވެރި ސިޔާސީ ޕާޓީއެއްގެ އެންމެ ބޮޑު މަސްއޫލިއްޔަތު،" ނަޝިދު ވިދާޅުވި އެވެ.
"ދިވެހިރާއްޖެއަކީ މުޅި ދިވެހިރައްޔިތުންގެ ރާއްޖެ، 30 ޕަސެންޓަށްވުރެ ތާއީދު ދަށްކޮށް އޮތް ޑރ. މުއިއްޒުގެ ސަރުކާރުގެ ރާއްޖެއެއް ނޫން."
ނަޝީދު މިފަދަ ޕޯސްޓެއް ކުރައްވާފައި މިވަނީ ދިވެހިރާއްޖޭގެ ހާރިޖީ ސިޔާސަތާއި، ސަރަހައްދީ ސަލާމަތާއި، ބައިނަލްއަގުވާމީ ގުޅުންތަކާ ގުޅޭގޮތުން އާންމުކޮށް ވާހަކަ ދެއްކުމުގައި ގައުމީ މަސްލަހަތަަށް އިސްކަންދީ ނުހަނު ބޮޑަށް ސަމާލުވުމަށް އިލްތިމާސްކޮށް ފޮރިން މިނިސްޓްރީން ނެރުނު ބަޔާނަކަށް ރައްދު ދެއްވަ އެވެ.
ފޮރިން މިނިސްޓްރީން އިއްޔެ ނެރުނު ބަޔާނުގައި ބުނީ ދައުލަތުގެ މަތީ މަގާމުތައް ފުރުއްވާފައިވާ ބޭފުޅުން ދައްކަވާ ވާހަކަތަކުގެ ސަބަބުން ސަބަބުން ބޮޑެތި ނަތީޖާތަކެއް ނުކުތުމުގެ ފުރުސަތު އޮތް ކަމަށެވެ.
އެހެންކަމުން، އެފަދަ ބަޔާންތަކަކީ ސައްހަ މައުލޫމާތުގެ މައްޗަށް ބިނާވެފައިވާ މަޝްވަރާތަކަށާއި، ގައުމީ އެއްބައިވަންތަކަމާއި، ދިވެހިރާއްޖޭގެ މުއައްސަސާތަކަށް އޮންނަ އިތުބާރު ބަދަހިކުރުމަށް މަގުފަހިވާ ވާހަކަތަކަށް ވާން ޖެހޭ ކަމަށް ފޮރިން މިނިސްޓްރީން ބުނެފައިވެ އެވެ.
އެ މިނިސްޓްރީން ބަޔާނެއް ނެރުނީ، މިފަހުން އިންޑިއާގައި އޮތް ކޮންފަރެންސެއްގައި ބައިވެރިވެވަޑައިގަތުމަށްފަހު އެނބުރި ރާއްޖެ ވަޑައިގެން އެއާޕޯޓުގައި ހުންނަވައި ދެއްކެވި ވާހަކަތަކާ ގުޅިގެންނެވެ.
ނަޝީދު ވިދާޅުވީ ދަތުރުގެ ތެރެއިން މޮރިޝަސްގެ ފޮރިން މިނިސްޓަރާ ބައްދަލުކޮށް މަޝްވަރާ ކުރެވުނު ކަމަށެވެ. އަދި، މޮރިޝަސް އާއި ރާއްޖެއާ ދެމެދު ޖެހިފައިވާ މައްސަލައާ ގުޅޭގޮތުން ވާހަކަ ދެއްކުމަށް މޮރިޝަސްގެ ފޮރިން މިނިސްޓަރު އަރިހުން އެދިވަޑައިގަތުމުން އެކަމަށް ތައްޔާރަށް ހުންނެވި ކަމަށް މިނިސްޓަރު ވިދާޅުވެފައިވާ ކަމަށް ވެސް ނަޝީދު ވިދާޅުވި އެވެ.
"ދެން އަޅުގަނޑު ވަރަށް ބޮޑަށް މިނިސްޓަރު [މޮރިޝަސްގެ ފޮރިން މިނިސްޓަރު] އަރިހުގައިވެސް ދެންނެވިން ދިވެހިރާއްޖެއާ މިކަމުގައި ވާހަކަދައްކާ ދެ ގައުމަށް ސުލްހަވެރި ގޮތުގައި ކަންކަން ނިންމޭނެ ގޮތް ހޯދުން. ދެން އެއްވެސް ހާލެއްގައި އަވަށްޓެރި ގައުމުތަކާއި އެހެން ޑިޕްލޮމެޓިކް ގުޅުން ނެތުމަކީ ރަނގަޅު ކަމެއް ނޫން. ދެން އެބޭފުޅުން ތިއްބެވީ ތައްޔާރަށް،" ނަޝީދު ވިދާޅުވި އެވެ.
މިގޮތުން މައްސަލައާ ގުޅޭގޮތުން ދިވެހި ސަރުކާރުން މޮރިޝަސްއާ ވާހަކަ ދައްކާނެ ކަމަށް އުންމީދުކުރައްވާ ކަމަށް ނަޝީދު ވިދާޅުވި އެވެ.
ރާއްޖެއާއެކު އޮތް ގުޅުން ކަނޑާލަން މޮރިޝަސް އިން ނިންމީ، ޗާގޯސްގެ ސިޔާދަތީ ބާރު އެ ގައުމަށް އޮތް ކަމަށް ރާއްޖެއިން ގަބޫލު ނުކުރާތީ އާއި މޮރިޝަސްއާ ޗާގޯސް ހަވާލު ކުރަން އިނގިރޭސިވިލާތުން ވެފައިވާ އެއްބަސްވުމަށް ރާއްޖެއިން ދެކޮޅު ހަދާތީ އެވެ.
ޗާގޯސްގެ ސިޔާދަތީ ބާރު މޮރިޝަސް އަށް ލިބޭ ކަމަށް ބައިނަލްއަގްވާމީ ކޯޓުތަކުން ކަނޑައަޅާފައި އޮއްވައި އަދި މޮރިޝަސް އާއި ރާއްޖެއާދެމެެދު ކަނޑުގެ ބޯޑަރު ބަހާފައި އޮއްވައި، އެކަންކަމަށް އަމަލު ނުކުރައްވާނެކަން އިއުލާނު ކުރެއްވީ ރައީސް މުހައްމަދު މުއިއްޒު ފެބްރުއަރީ 5، ގަ އެވެ.
ޗާގޯސްއަކީ އިނގިރޭސިވިލާތުގެ އަސްކަރީ ބޭސްއެކެވެ. އެތަނުގެ ސިޔާދަތީ ބާރު މޮރިޝަސްއާ ހަވާލު ކުރަން އިނގިރޭސިވިލާތުން ވަނީ މިދިޔަ އަހަރު އެއްބަސްވެފަ އެވެ. މޮރިޝަސް އިން ޗާގޯސްގެ ސިޔާދަތީ ބާރަށް ދައުވާ ކުރަނީ، އަސްކަރީ ބޭސް އަޅަން ޗާގޯސްގެ 2000 އެއްހާ މީހުން މޮރިޝަސްއަށް ފޮނުވާލީމަ އެވެ.
އިނގިރޭސިވިލާތުގެ ސިޔާދަތީ ބާރެއް ޗާގޯސްގައި ނޯންނާނެ ކަމަށް އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީސް (އިޓްލޮސް) އިން ވަނީ 2021 ވަނަ އަހަރު ކަނޑައަޅައިފަ އެވެ. އެއިރު، އިޓްލޮސް އިން ވަނީ ދެކުނުން ރާއްޖޭގެ ބޯޑަރު ވެސް ކަނޑައަޅައިފަ އެވެ.
ރާއްޖެއިން ޗާގޯސްއަށް ދައުވާ ކުރުމުގެ އަޑުތައް އިވެން ފެށީ އިޓްލޮސްގެ އަޑުއެހުންތައް ކުރިއަށްދަނިކޮށެވެ. ޗާގޯސްއަށް ރާއްޖެއިން ދައުވާ ކުރަނީ މީގެ ކުރިން ރާއްޖޭގެ ބައެއް ރަސްރަސްކަލުން ޗާގޯސްއަކީ ރާއްޖޭގެ ބައެއްގެ ގޮތުގައި ބައެއް ސިޓީތަކުގައި ލިޔުއްވާފައިވާތީ އެވެ.
އިނގިރޭސިވިލާތުން އެއްބަސްވީ މޮރިޝަސްއަށް ޗާގޯސްގެ ސިޔާދަތީ ބާރު ދިނުމަށްފަހު އަހަރަކަށް 100 މިލިއަން ޑޮލަރަށް އެ ތަން ކުއްޔަށް ހިފުމަށެވެ. އެ މައްސަލައިގެ ތެރެއަށް އެމެރިކާގެ ރައީސް ޑޮނަލްޑް ޓްރަމްޕު ވަދެވަޑައިގަތީ، މޮރިޝަސްއަށް ޗާގޯސް ދޭން އިނގިރޭސިން ހެދި ޑީލަށް އެމަނިކުފާނު ފާޑުވިދާޅުވުމުންނެވެ.
