ލަންޑަން (އޮގަސްޓް 11) - މިދިޔަ ސީޒަނުގެ މެޗެއްގެ ތެރެއިން، ނޮޓިންހަމް ފޮރެސްޓްގެ ވެރިޔާ، ގްރީސްގެ މަހުޖަނު، އެވަންޖެލޯސް މަރިނާކިސް އަށް އިހުތިރާމް ކުޑަވާ ގޮތަށް ކްރިސްޓަލް ޕެލަސް ދަނޑުގައި ބޭނުންކުރި ބެނާއެއްގެ މައްސަލަަ ލަންޑަންގެ ހައި ކޯޓަށް ހުށަހަޅައިފި އެވެ.
ކްރިސްޓަލް ޕެލަސްގެ ދަނޑު ސެލްހަސްޓް ޕާކުގައި ފޮރެސްޓާ ދެކޮޅަށް ކުޅުނު މެޗުގައި، ބޭނުންކުރި ބެނާއެއްގައި މަރިނާކިސް އަށް ރައްދުވާ ގޮތަށް ކާޓޫނެއް ބޭނުންކޮށް ލިޔުންތަކެއް ވަނީ ހިމަނައިފަ އެވެ.
ޕެލަސްގެ ސަޕޯޓަރުންގެ ނުރުހުން މަރިނާކިސް އަށް އަމާޒުވި ސަބަބަކީ، ޕެލަސްގެ ވެރިން ދެ ކްލަބެއްގައި ހިއްސާ އޮތުމުން، އެ ޓީމަށް މިދިޔަ ސީޒަނުގެ ޔޫރޮޕާ ލީގުން ޖާގަ ގެއްލި، އެ ފުރުސަތު ނޮޓިންހަމް ފޮރެސްޓަށް ލިބުމާ ގުޅިގެންނެވެ. ޕެލަސް ސަޕޯޓަރުން ތުހުމަތުކުރާ ގޮތުގައި، އެ ޓީމަށް ޔޫރޮޕާ ލީގުން ޖާގަ ގެއްލުމުގައި، އެންމެ ބޮޑަށް ބާރު އަޅާފައިވަނީ، މަރިނާކިސް އެވެ.
އެ ގޮތުން، ޕެލަސް ސަޕޯޓަރުން ބޭނުންކުރި އެ ބެނާގައި ހިމަނާފައިވަނީ، މަރިނާކިސް ބަނޑިއެއް ހިފައިގެން، ފޮރެސްޓުގެ ކެޕްޓަން، މޯގަން ގިބްސް-ވައިޓް ބޮލުގައި ޖައްސައިގެން ހުރެ ދައްކާ ވާހަކައެކެވެ. އަދި، އެ ބެނާގައި މަރިނާކިސް ބުނާ ކަމަށް ހިމަނާފަައިވާ ވާހަކަ އަކީ، އޭނާ އަކީ ބްލެކްމެއިލް ކުރުމާއި މެޗު ފިކްސް ކުރުމާއި ޑްރަގް ޓްރެެފިކިން އަދި ކޮރަޕްޝަނުގައި ބަައިވެރިވާ މީހެއް ނޫން ކަމަށެވެ.
ފޮރެސްޓްގެ މެޖޯރިޓީ ހިއްސާ، 2017 ވަނަ އަހަރު ގަތް މަރިނާކިސް އަކީ ގްރީސްގެ ވަރުގަދަ ކްލަބެއް ކަމަށްވާ އޮލިމްޕިއާކޯސްގެ ވެސް ހިއްސާދާރެކެވެ. މަރިނާކިސް އަކީ މެޗު ފިކްސިން އާއި ކޮރަޕްޝަންގެ އިތުރުން ގާނޫނާ ހިލާފު ގިނަ ކަންތައްތަކެއް ކުރާ ފަރާތެއް ކަމުގެ ތުހުމަތު ގިނަ މީޑިއާތަކަކުން ކުރާއިރު، އޭނާ ވަނީ އެ ވާހަކަތައް އެކި ފަހަރު މަތިން ދޮގުކޮށްފަ އެވެ.
މިދިޔަ ހޯމަ ދުވަހު، ކްރިސްޓަލް ޕެލަސްއާ ދެކޮޅަށް މަރިނާކިސްގެ ގާނޫނީ ޓީމުން ލަންޑަން ހައި ކޯޓަށް ހުށަހެޅި ބެނާއާ ގުޅޭ މައްސަލައާ ގުޅޭގޮތުން، މީޑިއާގައި ވާހަކަ ދައްކާފައިނުވެ އެވެ.
އެކަމަކު، ގާނޫނީ ޓީމާ ހަވާލާދީ، އިނގިރޭސި ބައެއް ނޫސްތަކުން ރިޕޯޓްކޮށްފައިވާ ގޮތުގައި، ޕެލަސްއާ ދެކޮޅަށް ހުށަހަޅާފައިވާ މި މައްސަލަ ސީރިއަސް ކަމެއްގެ ގޮތުގައި، ކޯޓުގައި ކުރިއަށްގެންދިއުމަކީ، މަރިނާކިސްގެ އަބުރު ރައްކާތެރިކުރުން މުހިންމު ކަމެއްގެ ގޮތުގައި ފެންނާތީ ކުރާ ކަމެއް ކަމަށެވެ.
