މުހައްމްދު މުއިއްޒުގެ ރިޔާސީ ވައުދަކީ 18 އަހަރުން މަތީގެ ކޮންމެ މީހަކަށް ބޯހިޔާވެހިކަން ކަށަވަރު ކުރުން ކަމަށް ވިޔަސް، ހައުސިން މިނިސްޓަރު ޑރ. އަބްދުﷲ މުއްތަލިބު މިއަދު ދެއްކެވި ވާހަކަފުޅާ ގުޅިގެން ސަރުކާރުގެ ބޯހިޔާވެހިކަމުގެ ސިޔާސަތު އޮޅިއްޖެ އެވެ.
ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި މުއްތަލިބު ވިދާޅުވީ މުއިއްޒުގެ އަމާޒަކީ ފަސް އަހަރު ތެރޭގައި 18 އަހަރުން މަތީގެ ކޮންމެ މީހަކަށް ބޯހިޔާވެހިކަން ކަށަވަރުކޮށްދިނުން ކަމަށެވެ. ނަމަވެސް މުއިއްޒު އެ މާނަކުރައްވަނީ 18 އަހަރުން މަތީގެ ކޮންމެ މީހެއް ހިމެނޭ އާއިލާއަކަށް ފަސް އަހަރު ތެރޭގައި ބޯހިޔާވެހިކަން ފޯރުކޮށްދޭ ވާހަކަ ކަމަށް މުއްތަލިބު ވިދާޅުވި އެވެ.
"ރައީސް ވިދާޅުވެފައި އެބައޮތް 18 އަހަރުން މަތީގެ ބޯހިޔާވެހިކަން ބޭނުންވާ އެއްވެސް ފަރާތެއް ނެތުމަކީ އެމަނިކުފާނު ފަސް އަހަރު ތެރޭގައި އެޗީވްކުރަން ބޭނުންވާ ކަމެކޭ. އަޅުގަނޑުމެންނަށް އެކަން އެޗީވް ކުރެވޭނެ މަގު، އޭގެ މާނައެއް ނޫން 18 އަހަރުގެ ކޮންމެ މީހަކަށް ފްލެޓެއް ދިނުމަކީ، ނޫނީ ބިމެއް ދިނުމަކީ. އޭގެ މާނައަކީ 18 އަހަރުން މަތީގެ ކޮންމެ މީހެއް ހިމެނޭ އާއިލާއަކަށް، މާނައަކީ ފެމިލިއީއަށް ބޯހިޔާވެހިކަން ލިބިފައޭ އޮންނާނީ،" މުއްތަލިބު ވިދާޅުވި އެވެ.
ދައުލަތުގެ މީޑިއާ ޕީއެސްއެމްއަށް މިދިޔަ އަހަރުގެ މެއި މަހު ދެއްވި އިންޓަވިއުއެއްގައި މުއިއްޒު ވިދާޅުވީ މާލޭގައި ދިރިއުޅޭ އަދި މާލެއަށް ނިސްބަތްވާ 18 އަހަރުން މަތީގެ ކޮންމެ މީހަކަށް މާލެ ސަރަހައްދުން ފަސްޓް ހޯމްގެ ގޮތުގައި ގެދޮރު ދޭން ހުޅުވާލައި، އެ އެންމެންނަށް މިދިޔަ އަހަރުގެ ތެރޭގައި ލިޔުން ދޭނެ ކަމަށެވެ.
"އަޅުގަނޑުގެ ވައުދު ފުއްދުމަށް 18 އަހަރުން މަތީގެ ހުރިހާ ރައްޔިތުންނަށް މާލޭގެ ރައްޔިތުން، މާލޭގެ ރަށްވެހިން އަދި މާލޭގައި ދިރިއުޅޭ ރައްޔިތުންނަށް ފުރަތަމަ ގެ، ފަސްޓް ހޯމް، އެއްވެސް ބޯހިޔާވެހިކަމެއް ނެތް 18 އަހަރުން މަތީގެ ރައްޔިތުންނަށް މިދެންނެވީ މުޅި މާލެ ސަރަހައްދުން ގްރޭޓާ މާލެ އޭރިއާ ރަސްމާލެ ހިމެނޭ ގޮތަށް ގޯތި ނުވަތަ ފްލެޓް ކަށަވަރު ކޮށްދިނުމަށް ހުޅުވާލާނަން،" ރައީސް މުއިއްޒު ވިދާޅުވި އެވެ.
"ހުޅުވާލައި އެ ފަރާތްތައް ކުރިމަތިލައި އެ ފަރާތްތަކަށް ރަސްމީ ގޮތުން އަޅުގަނޑުމެން ކަށަވަރު ކަމުގެ ލިޔުން ދޭނަން އިނގޭތޯ. ލިޔުން ދޭނަން އިރާދަކުރެއްވިއްޔާ މި އަހަރު ނިމުމުގެ ކުރީގައި. އެއީ ޓާގެޓަކީ."
މާލެ ސަރަހައްދުގައި އުޅޭ 18 އަހަރުން މަތީގެ އެންމެންނަށް މިއަހަރު ބޯހިޔާވަހިކަން ކަށަވަރު ކޮށްދޭނަން: ރައީސް
ޕީއެސްއެމްއަށް ދިން އިންޓަވިއުއެއްގައި ރައީސް މުއިއްޒު ވިދާޅުވީ މާލެ ސަރަހައްދުގައި ދިރިއުޅޭ 18 އަހަރުން މަތީގެ އެންމެންނަށް ފުރަތަމަ ގެ ކަށަވަރުކޮށްދިނުމަށް ވަރަށް އަވަހަށް ހުޅުވާލައި، މި އަހަރު ތެރޭގައި ލިޔުން ހަވާލު ކުރުމަށް އަމާޒު ހިފާފައިވާ ކަމަށް.
ނަމަވެސް މުއިއްޒު ވިދާޅުވި ގޮތަށް މިދިޔަ އަހަރު މާލެ ސަރަހައްދުން ބޯހިޔާވެހިކަމަށް ހުޅުވާލެވިފައި ނުވެ އެވެ. ބމާލެ ސަރަހައްދުން ބޯހިޔާވެހިކަން އެންމެންނަށް ނަމުގައި ބޯހިޔާވެހިކަމުގެ މަޝްރޫއަށް ހުޅުވާލީ މިދިޔަ ޖެނުއަރީ މަހެވެ. މަޝްރޫއުގެ ދަށުން ފްލެޓާއި ގޯއްޗަށް ކުރިމަތިލުމުގެ މުއްދަތު އަންނަ މެއި މަހުގެ ނިޔަލަށް ވަނީ ހުޅުވާލާފަ އެވެ.
މުއްތަލިބު ވިދާޅުވީ މާލެ ސަރަހައްދުގައި ދިރިއުޅޭ މީހުންނަށް ބޯހިޔާވެހިކަން ހަމަޖެއްސުމަށް މިހާރު ދިމާވެފައިވާ އެންމެ ބޮޑު ގޮންޖެހުމަކީ މި ސަރަހައްދުގައި ބިން ނެތުމުގެ މައްސަލަ ކަމަށާއި ބޯހިޔާވެހިކަން ގާއިމުކުރެވޭނީ ބިން ހިއްކައި އެތަނެއް އާބާދުވެސް ކޮށްގެން ކަމަށެވެ.
ފިނޭންސް މިނިސްޓްރީން މިދިޔަ އަހަރުގެ ޖެނުއަރީ މަހު 57 ރަށެއްގައި 12،000 ހައުސިން ޔުނިޓް އަޅައިދޭނެ ބަޔަކު ހޯދުމަށް ހުޅުވާލި އެވެ. ނަމަވެސް އޭގެތެރެއިން ގިނަ ރަށްތަކުގައި އެކަމާ ގުޅޭ އެއްވެސް މަސައްކަތެއް ކުރިއަކަށް ނުދެ އެވެ.
މުއިއްޒު ކުރިން ވިދާޅުވީ އަތޮޅުތެރޭގައި ޖުމްލަ 40،000 ހައުސިން ޔުނިޓް އަޅާނެ ކަމަށެވެ. އެކަމަކު އެކަމަށް ބޭނުންވާ ފައިނޭންސް ހޯދުމުގައި ދަތިތައް ހުރި ކަމަށް މުއްތަލިބު މިއަދު ވިދާޅުވި އެވެ.
