އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާ އިއްޔެ 4،868 މީހުން ގުޅުނުއިރު، މިހާރު ތިބީ 50،594 މެންބަރުން ކަމަށް އެ ޕާޓީން ބުނެފި އެވެ.
އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) އަދަދު އަށް ވިދާޅުވީ ރޭ 12:00 ޖެހުމާ ހަމައަށް އެމްޑީޕީއަށް 4،868 މީހުން ގުޅުނުއިރު، މިހާރު އެ ޕާޓީގައި ތިބި މެންބަރުންގެ އަދަދު 50،594 މެންބަރުންނަށް އިތުރުވެފައިވާ ކަމަށެވެ.
އެމްޑީޕީއަށް އިއްޔެ ގިނަ އަދަދެއްގެ މެންބަރުން ވަދެފައި މިވަނީ އެ ޕާޓީގެ ޗެއާޕާސަން އިންތިހާބަށް ހުޅުވާލައި، އެ އިންތިހާބުގައި ވޯޓުލުމަށް މެންބަރެއް ގޮތުގައި ރަޖިސްޓްރީވާންޖެހޭ އެންމެ ފަހު ތާރީހަކީ ރޭ 12:00 ޖެހުމާ ހަމައަށް ކަމަށް ނިންމުމުންނެވެ.
މިގޮތުން ޗެއާޕާސަންގެ އިންތިހާބަށް ވާދަކުރައްވާނެކަން އިއުލާންކުރައްވާފައިވާ ކުރީގެ ރައީސް މުހައްމަދު ނަޝީދުގެ ކެމްޕެއިން ޓީމުން ވަނީ އެމްޑީޕީއަށް މެންބަރުން އިތުރު ކުރުމަށް އިއްޔެ ހަވީރުން ފެށިގެން ސޯޝަލް މީޑިއާގައި ކެމްޕެއިނެއް ކުރިއަށް ގެންގޮސްފަ އެވެ.
ނަޝީދުގެ އިތުރުން އެމްޑީޕީގެ ޗެއާޕާސަންގެ މަގާމަށް ވާދަކުރައްވާނެކަން އިއުލާން ކުރައްވާފައިވަނީ ގަލޮޅު ދެކުނު ދާއިރާގެ މެންބަރު މީކާއިލް އަހްމަދު ނަސީމް އެވެ.
އެމްޑީޕީގެ ޗެއާޕާސަންގެ މަގާމަށް މީހަކު ހޮވަން ބާއްވާ އިންތިހާބު އޮންނާނީ ޖޫން 12، ގަ އެވެ.
ނަޝީދަކީ އެމްޑީޕީގެ ފުރަތަމަ ޗެއާޕާސަން އެވެ. ޕާޓީ ރަޖިސްޓްރީ ކުރުމަށްފަހު 2005 ވަނަ އަހަރުން ފެށިގެން 2008 ވަނަ އަހަރު ވެރިކަން ލިބިވަޑައިގަންނަވަންދެން ނަޝީދު އެ މަގާމު ފުރުއްވި އެވެ.
މީކާއީލްއަކީ އެމްޑީޕީގެ ޔޫތު ވިންގުގެ ރައީސްގެ މަގާމު ފުރުއްވާފައިވާ ބޭފުޅެކެވެ. މިއީ ރައްޔިތުންގެ މަޖިލީހަށް އޭނާ އިންތިހާބުވި ދެވަނަ ދައުރެވެ. ޗެއާޕާސަންގެ މަގާމަށް މީކާއީލް އިންތިހާބުވެއްޖެ ނަމަ އޭނާ ވާނީ އެ މަގާމަށް ފުރުއްވާ އެންމެ ޒުވާން މެންބަރަށެވެ.
ނަޝީދުގެ އިތުރުން އެމްޑީޕީގެ ޗެއާޕާސަންގެ މަގާމު ފުރުއްވީ މާރިޔާ އަހުމަދު ދީދީ އާއި މޫސާ މަނިކު (ރީކޯ މޫސަ) އާއި އަލީ ވަހީދު އާއި ހަސަން ލަތީފް އާއި ފައްޔާޒް އިސްމާއިލް އެވެ.
