އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ރޭ ކުރިއަށް ގެންދިޔަ މުޒާހަރާގައި ބައިވެރިވި މީހެއްގެ ގައިގައި ފުލުހުން ކަރަންޓު މުގުރު ޖެއްސި ކަމަށް ބުނާ ވާހަކަ ފުލުހުންގެ މުއައްސަސާއިން ދޮގުކޮށްފި އެވެ.
ދާދި ދެންމެއަކު ފުލުހުން ނެރުނު ބަޔާނެއްގައި ބުނީ ރޭގެ އެއްވުން ކޮންޓްރޯލް ކުރުމަށް ފުލުހުން ހިންގި އެއްވެސް ހަރަކާތަކާ އެ މީހާއަށް އަނިޔާ ލިބުމާ ނުވަތަ ހާލު ދެރަވުމާ ގުޅުމެއް ނެތް ކަމަށެވެ.
"ފެތުރެމުންދާ ވާހަކަތަކާ ހިލާފަށް، ރޭގެ އެއްވުން ކޮންޓްރޯލް ކުރުމުގައި ފުލުހުން ބާރުގެ ބޭނުންކޮށްފައެއް ނުވެ އެވެ. އަދި، އެއީ އެއްވުމާ ގުޅިގެން ފުލުހުން އެޅި އެއްވެސް ފިޔަވަޅެއްގެ ސަބަބުން ހިނގާފައިވާ ކަމެއް ނޫންކަމުގެ ޔަގީންކަން އަރުވަމެވެ،" ފުލުހުންގެ ބަޔާނުގައި ބުންޏެވެ.
އެމްޑީޕީން ކުރިއަށް ގެންދާ ސިލްސިލާ މަގުމަތީ ހަރަކާތްތަކުގެ ތެރެއިން ރޭ މާލޭގައި ކުރިއަށް ގެންދިޔަ މުޒާހަރާގެ ބައިވެރިއަކު ކުއްލި ގޮތަކަށް ވެއްޓުމާއެކު އެ ސަރަހައްދުގައި ތިބި އާންމުން ވަނީ އޭނާ ހޮސްޕިޓަލަށް ގެންގޮސްފަ އެވެ.
އެމްޑީޕީގެ މުޒާހަރާގެ ބައިވެރިން ތުހުމަތު ކުރީ، އެ މީހާގެ ގައިގައި ފުލުހުން ކަރަންޓު މުގުރު ޖެއްސި ކަމަށެވެ. އޭނާއަށް ރޭ އައިޖީއެމް ހޮސްޕިޓަލުގައި ވަނީ ފަރުވާ ދީފަ އެވެ.
އެ ތުހުމަތު ދޮގުކޮށް ފުލުހުން މިއަދު ނެރުނު ބަޔާނުގައި ބުނީ ހަގީގަތާ ހިލާފު މައުލޫމާތު ފެތުރުމުގެ ސަބަބުން ދައުލަތުގެ މުއައްސަސާތަކަށް އޮންނަ އިތުބާރު ކުޑަވެ، އެ ތަންތަނުން ރައްޔިތުންނަށް ފޯރުކޮށްދޭ ހިދުމަތްތަކަށް ނޭދެވޭ އަސަރުތަކެއް ކުރާ ކަމަށެވެ.
"އެހެންކަމުން މައުލޫމާތުގެ ސައްހަކަން ކަށަވަރު ކުރުމަށްފަހު، މެނުވީ މައުލޫމާތު ނުފެތުރުމަށް އިދާރާތަކަށާއި މީޑިއާތަކަށާއި އާންމުންނަށް އިލްތިމާސްކުރަމެވެ،" ފުލުހުންގެ ބަޔާނުގައި ބުންޏެވެ.
އެމްޑީޕީން ކުރިއަށް ގެންދާ ސިލްސިލާ ހަރާތްތަކުގެ އިތުރުން، އިދިކޮޅު ޕީއެންއެފްއިން ވެސް ދަނީ މާލޭގައި ސިލްސިލާ މުޒާހަރާތަކެއް ކުރަމުންނެވެ.
