ތިން އިންތިހާބުގައި ލިބުނު ނާކާމިޔާބީއާ ގުޅިގެން ވެރިން އިސްތިއުފާ ދޭން މަޖުބޫރުކުރި ކުންފުނިތަކުގެ ތެރޭގައި ހިމެނޭ މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ އަދި މެނޭޖިން ޑިރެކްޓަރަކަށް ހުސެއިން ޝަފީގު މިއަދު އައްޔަންކޮށްފި އެވެ.
މިކަން ސަރުކާރުން އަދި ހާމަނުކުރި ނަމަވެސް، އިތުބާރު ހުރި މަސްދަރުތަކުން އަދަދު ނޫހަށް ވަނީ މިކަން ކަށަވަރުވެފަ އެވެ. މިއަދުގެ ވަގުތެއްގައި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) މިކަން އިއުލާންކުރާނެ ކަމަށް ބެލެވެ އެވެ.
ޝަފީގު ވެގެން ދާނީ މި ސަރުކާރުގައި އެމްޕީއެލްއާ ހަވާލުވާ ތިން ވަނަ ސީއީއޯ އަދި އެމްޑީއަށެވެ. މި މަގާމަށް ފުރަތަމަ އައްޔަނުކުރީ މުހައްމަދު ވަޖީހެވެ. އޭނާ މަގާމުން ވަކިކުރީ އީސް މުހައްމަދު މުއިއްޒު އާއި ރައްޔިތުންގެ މަޖިލީހުގެ ރައީސް އަބްދުއްރަހީމްއާ މައްސަލަ ޖެހުނު ދުވަސްވަރުގަ އެވެ.
އޭނާއަށް ފަހު އެ މަގާމަށް އައްޔަނުކުރި ރިޝްވާންގެ މޭސްތިރިކަމުގައި އެމްޕީއެލް ގާތްގަނޑަކަށް 14 މަސް ދުވަހު ހިންގާފައިވެ އެވެ. އޭނާ އިސްތިއުފާ ދިނީ، އެމްޕީއެލްގެ ބަނދަރުން ކޮންޓެއިނަރު ނެރެން ހޭދަވާ ވަގުތު އިތުރުވެ، ގިނަ އަދަދެއްގެ މުދާ ތާށިވެފައި ހުރި ދަނޑިވަޅެއްގަ އެވެ.
މިހެން ނަމަވެސް އޭނާއަށް އިސްތިއުފާ ދޭން އެންގީ، މި މައްސަލައިގައި ނޫން ކަމަށް މި ނޫހަށް ވަނީ މައުލޫމާތު ލިބިފަ އެވެ.
