ބައެއް ވިޔަފާރިތަކުން ޑޮލަރު ސަޕޯޓުގެ ބޭނުން ނަހަމަ ގޮތުގައި ހިފާތީ އެކަން ހުއްޓުވުމުގެ ގޮތުން ވިޔަފާރިތަކުން ކުރާ ޓީޓީތަކަށް ޑޮލަރު ވިއްކުމުގައި އެތެރޭގެ ކޮންޓްރޯލްތަކެއް ގެންގުޅޭ ކަމަށް ބޭންކް އޮފް މޯލްޑިވްސް (ބީއެމްއެލް) އިން މިއަދު ބުނެފި އެވެ.
ބީއެމްއެލްގެ މެނޭޖުމަންޓުން ބޭއްވި ނޫސްވެރިންގެ ބައްދަލުވުމެއްގައި މިކަން ހާމަކުރީ ބައެއް ޓީޓީތަކަށް ޑޮލަރު ސަޕޯޓު ނުލިބޭ ކަމަށް ވިޔަފާރިވެރިންގެ ފަރާތުން ލިބެމުންދާ ޝަކުވާތަކާ ގުޅިގެން ޖަވާބުދާރީ ވަމުންނެވެ.
މިކަމާ ގުޅޭ މައުލޫމާތު ދެމުން، ބީއެމްއެލްގެ ބޭންކުގެ ރީޓެއިލް އަދި އެސްއެމްއީ ބޭންކިން ޑިރެކްޓަރު، މޫސާ ނިމާލު ވިދާޅުވީ އެ ބޭންކުން ޑޮލަރު ވިއްކާ ބޭންޑުތައް ކަނޑައެޅީ ކުދި ވިޔަފާރިތަކަށް ބޮޑަށް އެހީދެވޭނެ ގޮތަކަށް ބޭންޑުތަކެއް ކަނޑައަޅައިގެން ކަމަށެވެ.
ބީއެމްއެލްއިން ޑޮލަރު ވިއްކުމުގައި ކަނޑައެޅި ބޭންޑުތަކުގެ ދަށުން، 2500 ޑޮލަރުން ދަށުގެ ޓީޓީތަކަށް 50 ޕަސެންޓު، 2500 ޑޮލަރާއި 5000 ޑޮލަރާ ދެމެދުގެ ޓީޓީތަކަށް 30 ޕަސެންޓު، 5000 ޑޮލަރަށް ވުރެން އަގު ބޮޑު ޓީޓީތަކަށް 15 ޕަސެންޓު ޑޮލަރު ސަޕޯޓު ލިބެ އެވެ. އަދި، އެއް ޓީޓީއަކަށް ޑޮލަރު ސަޕޯޓުގެ ގޮތުގައި ދެވޭނެ އެންމެ މަތީ ލިމިޓަކީ 10،000 ޑޮލަރު ކަމަށް އޮތީ ކަނޑައަޅާފަ އެވެ.
ބީއެމްއެލްއަށް ފުރަތަމަ ކުއާޓަރުގައި 631 މިލިއަން ރުފިޔާގެ ސާފު ފައިދާ
ބޭންކަށް ނިމުނު ކުއާޓަރުގައި ބޮޑު އާމްދަނީއަކާއި ސާފު ފައިދާއެއް ލިބުނު ނަމަވެސް، އިރާން ހަނގުރާމައިގެ ސަބަބުން ޓޫރިޒަމަށް އައި ހީނަރުކަމާ ގުޅިގެން ޑޮލަރު ގޮންޖެހުންތައް އެބަހުރި ކަމަށް ބޭންކުން ބުނި.
މިއީ ކުދި ވިޔަފާރިތަކަށް ފަސޭހަކޮށްދޭން ބޭންކުން ކުރި ކަމެއް ނަމަވެސް، ނިމާލް ވިދާޅުވީ، ބައެއް ވިޔަފާރިތަކުން މީގެ ނާޖައިޒު ފައިދާ ނަގައި، އިންވޮއިސްތައް ބައިބަޔަށް ބަހާލައިގެން ޑޮލަރު ސަޕޯޓުގެ ބޭނުންކުރަމުން ދިޔަ ކަމަށް އެ ބޭންކަށް ފާހަގަކުރެވުނު ކަމަށެވެ.
"މިހެން ހެދުމުން ބޮޑެތިކޮށް ހަދާ ޓީޓީއަށް ވެސް ކުދި ވިޔަފާރިތަކަށް ލިބޭ ވަރަށް އަޅުގަނޑުމެންނަށް [ޑޮލަރު] ވިއްކަން ޖެހޭ ކަހަލަ ގޮތަކަށް މެދުވެރިވީ. އެހެންމަ، އެކަން ހައްލުކުރަން އަޅުގަނޑުމެން ބޭނުންވެގެން ބައެއް ކަހަލަ ބަދަލުތަކެއް ގެނައިން." އޭނާ ވިދާޅުވި އެވެ.
ނިމާލް ވިދާޅުވީ، މި ވޭތުވި ދެ ދުވަހުގެ ތެރޭގައި ޓީޓީތަކަށް ޑޮލަރު ސަޕޯޓު ނުލިބޭ ކަމަށް ބުނެ ވާހަކަ ދެކެވެނީ މިހެންވެ ކަމަށެވެ. މިއީ އެ ވިޔަފާރިއެއްގެ ނިސްބަތުން ބޭންކުން އެހީތެރިކަން ފޯރުކޮށްދިނުމުގެ މަގުސަދުގައި ގެނައި ބަދަލެއް ކަމަށް އޭނާ ވިދާޅުވި އެވެ.
ބީއެމްއެލްއިން ގެނައި ކޮންޓްރޯލްތަކާއެކީ، ޑޮލަރު ސަޕޯޓު ފޯރުކޮށްދެނީ "ކޭސް ބައި ކޭސް" ބޭސިސްއަކުން ކޮންމެ ޓީޓީއަކަށް، އެ ވިޔަފާރިއަކަށް ކުރިން ޑޮލަރު ވިއްކާފައިވާ މިންވަރަށް ވެސް ބަލައިގެން ކަމަށް ނިމާލް ވިދާޅުވި އެވެ.
"ކޮންމެ ޓީޓީއަކަށް ވެސް މިހާރު އަޅުގަނޑުމެން މި މަސް ތެރޭގައި ވިއްކުނީ ކިހާ ވަރަކަށްތޯ ބަލާފަ، އެ ވިޔަފާރިއަކާ އެކަށީގެންވާ ވަރަށް އަޅުގަނޑުމެންނަށް މި އަހަރު، މި މަސް ތެރޭގައި ދޫކުރެވިފަ ހުރިތޯ ބަލާ، އެ ކަހަލަ ގޮތަކަށް އަޅުގަނޑުމެން މި ދެ ދުވަހަކު އެ ބަދަލުތަކެއް ގެނައިމަ އައި ޝަކުވާތަކެއް ކަން ނޭނގެ ބޮޑަށް އެއީ،" އޭނާ ވިދާޅުވި އެވެ.
ކުރިން ޑޮލަރު ވިއްކާފައިވާ ނިސްބަތުން ބައެއް ޓީޓީތަކަށް ޑޮލަރު ނުވިއްކާ ގޮތަށް ބީއެލްއެލްއިން އުސޫލުތަކެއް ކަނޑައެޅިއިރު، ވިޔަފާރިވެރިން މި ޝަކުވާކޮށްގެން އެ ހަބަރު ޖެހުމުން ބީއެމްއެލް ވަނީ އެ ކަން ދޮގުކޮށްފަ އެވެ. މި ނޫހުން ޖެހި ހަބަރުގައި ލިޔުނީ މި މަހުގެ ނިޔަލަށް ޑޮލަރު ސަޕޯޓު ނުލިބޭނެ ކަމަށް ބައެއް ވިޔަފާރިތަކަށް އަންގާފައިވާ ކަމަށް، އެ ވިޔަފާރިވެރިން ބުނާ ކަމަށެވެ.
ވިޔަފާރިވެރިންގެ ބަސް ދޮގުކޮށް، ޓީޓީއަށް ޑޮލަރު ދޫކުރުން ހުއްޓާނުލާ ކަމަށް ބީއެމްއެލް އިން ބުނެފި
ވިޔަފާރިތަކަށް ޓީޓީ ހެދުމަށް ދޫކުރާ ޑޮލަރު ސަޕޯޓު ބީއެމްއެލްއިން މެދުކަނޑާލި ކަމަށް ބުނި ހަބަރަކާ ގުޅޮގެން ބޭންކުން ހާމަކުރި ގޮތުގައި ކަނޑައެޅިފައިވާ އުސޫލުގެ ތެރެއިން ވިޔަފާރިތަކަށް ޑޮލަރު ވިއްކަމުންދާ ކަމަށް. އަދި މިދިޔަ އަހަރާ އަޅާބަލާއިރު މިއަހަރު ޑޮލަރު ވިއްކި މިންވަރު ވަނީ 142 ޕަސެންޓު އިތުރު ކަމަށް ބުނި.
ބީއެމްއެލްއިން އިއްޔެ މީޑިއާތަކަށް ފޮނުވި މެސެޖެއްގައި ބުނީ އެ ހަބަރުގައި ހުރީ ހަގީގަތާ ހިލާފު، ދޮގު މައުލޫމާތު ކަމަށެވެ. އަދި، އެހާތަނަށް އެއްވެސް ޓީޓީއަކަށް ޑޮލަރު ސަޕޯޓު ނުދީ ނޯންނާނެ ކަމަށް ވެސް އެ ބޭންކުން ބުންޏެވެ.
މިހެން ބުންޏަސް، މިއަދުގެ ނޫސްވެރިންގެ ބައްދަލުވުމުގައި ނިމާލް އާއި ބޭންކުގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފު ދެއްކެވި ވާހަކަތަކުން، ބައެއް ވިޔަފާރިތަކުގެ ލިމިޓު ހަމަވެފައިވާތީ އެ ވިޔަފާރިތަކަށް އިތުރަށް ޑޮލަރު ނުވިއްކާ ގޮތަށް ނިންމިކަން ކަށަވަރުވެ އެވެ.
ޑޮލަރު ވިއްކާ މިންވަރަށް ބިނާކޮށް، ޑޮލަރު ސަޕޯޓު ނުދިނުމުގެ އިތުރުން ބީއެމްއެލްއިން ވަނީ ބައެއް ކަހަލަ ވިޔަފާރިތަކަށް ޑޮލަރު ސަޕޯޓު ނުދޭ ގޮތަށް ނިންމާފަ އެވެ. އޭގެ ތެރޭގައި ފޮރެކްސް އާއި ގިފްޓު ކާޑު ފަދަ ވިޔަފާރިތައް ހިމެނޭ ކަމަށް އެ ބޭންކުން ބުންޏެވެ.
ބޭންކުން ވިޔަފާރިތަކަށް ޑޮލަރު ސަޕޯޓުގެ ގޮތުގައި ދޫކުރާ ޑޮލަރު ފޯރުކޮށްދެނީ މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ)، އިންނެވެ.
