އިންޑިއާއަށް މި މަސް ނިމުމުގެ ކުރިން ދައްކަންޖެހޭ 400 މިލިއަން ޑޮލަރާ ރޯލްއޯވާ ކުރުމުގެ މަޝްވަރާއަށް ހުރިހާ ސިޔާސީ ޕާޓީތަކެއްގެ މަޝްވަރާ ހޯދަން ކުރީގެ ރައީސް މުހައްމަދު ނަޝީދު މިއަދު ގޮވާލައްވައިފި އެވެ.
ނަޝީދު އެކްސް ގައި ކުރެއްވި ޕޯސްޓެއްގައި ވިދާޅުވީ އިދިކޮޅު އެމްޑީޕީން ހުށަހަޅާފައިވާ ބޮޑު ބަދަލުގެ އެންމެ މުހިންމު ބޭނުމަކީ ދަރަނީގެ ކަންކަމާ ގުޅޭ މަޝްވަރާ ހިންގުން ކަމަށްވާއިރު، ސަރުކާރުން މަޝްވަރާގެ މޭޒު ދޮށަށް އަންނަން ޖެހޭ ކަމަށެވެ.
"އިންޑިއާ ސަރުކާރާއެކު ދައްކާ ވާހަކައަކީ ހުރިހާ ޕާޓީއެއް އެއްބަސްވެ ދެކެވޭ ވާހަކައަކަށް ވެއްޖެއްޔާ، އެ ވާހަކަތައް ކާމިޔާބުވުމުގެ ފުރުސަތު ބޮޑުވާނެ. އަޅުގަނޑު އެދެނީ ސަރުކާރު މަޝްވަރާގެ މޭޒުދޮށަށް އައުމަށް،" ނަޝީދު ވިދާޅުވި އެވެ.
އިންޑިއާއިން ދީފައިވާ 400 މިލިއަން ޑޮލަރު މި މަސް ނިމުމުގެ ކުރިން އަނބުރާ ދައްކަން ޖެހޭ ކަމަށް ނަޝީދު ވިދާޅުވި އެވެ. ނަޝީދު ވިދާޅުވީ އެ ފައިސާ އަނބުރާ ދެއްކުން ދެ ފަހަރެއްގެ މަތިން ލަސްކޮށްދީފައިވާއިރު، ތިންވަނަ ފަހަރަށް ލަސްކުރުމަކީ އިންޑީއާގެ މާލިއްޔަތު ގަވާއިދު ތަންދޭ ކަމެއް ނޫން ކަމަށް އެ ގައުމުގެ ނޫސްތަކުން ބުނާ ކަމަށެވެ.
ނަޝީދު އިތުރަށް ވިދާޅުވީ މި މަސް ތެރޭގައި ރާއްޖެއިން 500 މިލިއަން ޑޮލަރުގެ ސުކޫކުގެ ފައިސާ ދައްކާފައިވާއިރު، ރާއްޖެ ޑިފޯލްޓްވެއްޖެނަމަ މުޅި މާލީ ނިޒާމަށް އަދި ސަރުކާރާއި އަމިއްލަ ވިޔަފާރިތަކަށް ވަރަށް ބޮޑު އަސަރެއް ކުރާނެ ކަމަށެވެ.
މިއީ ސަރުކާރުން މަޝްވަރާގެ މޭޒު ދޮށަށް އައުމަށް ނަޝީދު ގޮވާލި ދެވަނަ ފަހަރެވެ. ނަމަވެސް އިދިކޮޅާއެކު މަޝްވަރާގެ މޭޒަށް އަންނަން ޖެހޭ ކަމަށް ގަބޫލުނުކުރައްވާ ކަމަށް މުހައްމަދު މުއިއްޒު އިއްޔެ ވިދާޅުވި އެވެ.
މުއިއްޒު ވިދާޅުވީ އިދިކޮޅު ޕާޓީތަކާ މަޝްވަރާ ކުރުން ރައްޔިތުން އެމަނިކުފާނާ ހަވާލުކޮށްފައިވާ މެންޑޭޓުން ބޭރު ކަމަށެވެ.
"އަޅުގަނޑު ހިތުން ރައްޔިތުން އަޅުގަނޑަށް ދީފައިވާ މެންޑޭޓުން ބޭރު ކަމެއް އެއީ. ރައްޔިތުން އަޅުގަނޑަަށް ދީފައިވާ މެންޑޭޓަކީ ފަސް އަހަރުގެ ދައުރެއް ތިމަންނަމެން ހަވާލުކުރީއޭ، އަޅުގަނޑު އިއުލާނުކުރި މެނިފެސްޓޯ އާއި ވައުދުތަކާ އެއްގޮތަށް ކަންކަން ކުރަން. އެހެންވީމަ އަޅުގަނޑު ދާނީ ރައްޔިތުން އަޅުގަނޑާ ހަވާލުކުރި މަސައްކަތައިގެން ކުރިއަށް،" މުއިއްޒު ވިދާޅުވި އެވެ.
އިންޑިއާގެ ނޫސްތަކުން ބުނާ ގޮތުގައި އިންޑިއާއަށް ރާއްޖެއިން ދައްކަން ޖެހޭ 400 މިލިއަން ޑޮލަރު އަނބުރާ ދެއްކުން ފަސްކޮށްދޭން ދިވެހި ސަރުކާރުން ވަނީ އެދިފަ އެވެ.
ސަރުކާރުން މި މަސް ތެރޭގައި 500 މިލިއަން ޑޮލަރާއި ސުކޫކުގެ ފައިދާއަށްވާ ރޭޓަށްވާ 24.68 މިލިއަން އެމެރިކާ ޑޮލަރާއެކު ޖުމްލަ 524.68 މިލިއަން އެމެރިކާ ޑޮލަރު ސަރުކާރުން ދައްކައި ހަލާސްކުރީ ދައުލަތުގެ ރަސްމީ ރިޒާވާއި ސޮވަރިން ޑިވެލޮޕްމަންޓް ފަންޑުގައި ހުރި ޑޮލަރު ބޭނުންކޮށްގެންނެވެ.
