އާންމުކޮށް ބޭނުންކުރާ އަސާސީ މުދާ ރާއްޖެއަށް އެކްސްޕޯޓުކުރާ އަދަދު އިތުރުކޮށްދިނުމަށް ދިވެހި ސަރުކާރުން އެދުމުން، އެ ހުއްދަ އިންޑިއާ ސަރުކާރުން ދީފި އެވެ.
ރާއްޖޭގައި ހުންނަ އިންޑިއާގެ ހައި ކޮމިޝަނުން މިއަދު ނެރުނު ބަޔާނެއްގައި ބުނީ ކުރިއަށް އޮތް އަހަރަށް އަސާސީ މުދާ ރާއްޖެއަށް އެކްސްޕޯޓު ކުރުމުގެ ހުއްދަ އިތުރުކޮށްދިނީ ދިވެހި ސަރުކާރުން އެދުނު މިންވަރަށް ކަމަށެވެ.
އެ ގޮތުން، އެ ގައުމުން ދިވެހިރާއްޖެއަށް އެކްސްޕޯޓު ކުރުމުގެ ހުއްދަ ދިން ބާވަތްތަކަކީ:
- އަލުވި
- ފިޔާ
- ހަނޑޫ، ހަކުރު، ފުށް
- މުގު
- ހިލަ، ހިލަވެލި
މީގެ ތެރެއިން ކުރިއަށް އޮތް އަހަރަށް ދިވެހިރާއްޖެއަށް ހަނޑޫ އެތެރެ ކުރުމަށް ކަނޑައެޅި ކޯޓާ، މިދިޔަ އަހަރާ އަޅާބަލާއިރު، ވަނީ 77 ޕަސެންޓު އިތުރުކޮށްފަ އެވެ.
އިންޑިއާގެ ބަޔާނުގައި، ދެ ގައުމުގެ ދެމެދުގައި އޮންނަ ހާއްސަ އުސޫލުގެ ދަށުން ކުރިއަށް އޮތް އަހަރަށް ކަނޑައެޅި ކޯޓާއަކީ 1981 ވަނަ އަހަރުން ފެށިގެން ދިވެހިރާއްޖެއަށް ކަނޑައެޅި އެންމެ ބޮޑު ކޯޓާ ކަމަށެވެ.
މީގެ ކުރީ އަހަރުތަކެކޭ އެއްގޮތަށް، ކުރިއަށް އޮތް އަހަރަށް ކަނޑައެޅި ކޯޓާއަށް ވެސް، އެ ގައުމުން އަޅާ އެއްވެސް ފިޔަވަޅެއްގެ ހިޔަނި ނޭޅޭނެކަމުގެ ޔަގީންކަން އިންޑިއާއިން ވަނީ ދީފަ އެވެ. އެހެންކަމުން، އެއްވެސް ހާލަތެއް ކުރިމަތިވެގެން، މުދާ އެކްސްޕޯޓު ކުރުން މަނާކުރި ނަމަވެސް، ރާއްޖެއަށް ކަނޑައެޅި ކޯޓާއަށް މުދާ އެކްސްޕޯޓު ކުރާނެ އެވެ.
މީގެ ކުރިން ރާއްޖެއަށް ނުދޭވަރުގެ ކޯޓާއެއް، އަސާސީ މުދާ އެކްސްޕޯޓު ކުރުމަށް ދިނުމުން ހާމަވަނީ އިންޑިއާގެ އަވައްޓެރިންނަށް އިސްކަންދިނުމުގެ ސިޔާސަތުގެ ދަށުން ދިވެހިރާއްޖޭގެ އިންސާނީ ތަރައްގީއަށް އެހީތެރިވުމަށް އެ ގައުމުން ދޭ އިސްކަން ކަމަށް އިންޑިއާ އެމްބަސީގެ ބަޔާނުގައި ބުންޏެވެ.
