އެމެރިކާ އާއި އިޒްރޭލުން އިސްވެ، އީރާންއާ ދެކޮޅަށް ކުރަމުންދިޔަ ހަނގުރާމަ ވަގުތީގޮތުން ހުއްޓާލުމާއެކު، ދުނިިޔޭގެ ބާޒާރުގައި ތެލުގެ އަގު ހެޔޮވި ނަމަވެސް، ފިއުލް ސަޕްލައި މޯލްޑިވްސްއިން ވިއްކާ ޑީސެލްގެ އަގު މިއަދު ބޮޑުކޮށްފި އެވެ.
އަދަދު އަށް އެނގިފައިވާ ގޮތުގައި ބައުޒަރުތަކާއި ޕަމްޕު ސްޓޭޝަންތަކުން ވިއްކާ ޑީސެލް ލީޓަރަކުން މިއަދު ބޮޑުކޮށްފައި ވަނީ 2ރ. އެވެ. ނަމަވެސް، މި ބަދަލު ފިއުލް ޝެޑުތަކުން ވިއްކާ ޑީސެލްގެ އަގަށް ގެނެސްފައެއް ނުވެ އެވެ.
އެފްއެސްއެމްއިން ވިއްކާ ޑީސެލްގެ އަގަށް ގެނައި ބަދަލާއެކު، ޑީސެލް ލީޓަރެއްގެ އަގު ވަނީ 30ރ. އަށް އަރައިފަ އެވެ. މިއީ ކޮވިޑު ދުވަސްވަރު ވެސް ޑީސެލް ލިބެންހުރި އަގަށްވުރެ ބޮޑު އަގެކެވެ. ކޮވިޑު ދުވަސްވަރު، އެންމެ ތާށި ބޮޑުވި ދުވަސްވަރު ވެސް ޑީސެލް ލީޓަރެއްގެ އަގު ރާއްޖޭގައި ހުރީ 19ރ. އަށެވެ.
މި ބަދަލު ގެނައުމުގެ ކުރިން، އީރާން ހަނގުރާމައާ ގުޅިގެން އެފްއެސްއެމްގެ ބައުޒަރުތަކާއި ޕަމްޕު ސްޓޭޝަންތަކުން ޑީސެލް ވިއްކަމުންދިޔައީ 28.32ރ. އަށެވެ.
އެފްއެސްއެމްއިން މި ބަދަލު ގެނެސްފައިވާއިރު، ދުނިޔޭގެ ބާޒާރުގައި ފާއިތުވި 24 ގަޑިއިރު ތެރޭގައި ތެލުގެ އަގު ވަނީ ވަރަށް ބޮޑަށް ދަށަށް ގޮސްފަ އެވެ. އެގޮތުން، ސާފުނުކުރާ ތެލުގެ އަގު 15 ޕަސެންޓު ވަނީ ހެޔޮވެފަ އެވެ. އެއާއެކު ސާފުނުކުރާ ތެޔޮ ފީފާއެއްގެ އަގު 92 ޑޮލަރާއި 94 ޑޮލަރާ ދެމެދުގެ އަގެއްގައި ވަނީ ހިފެހެއްޓިފަ އެވެ.
އީރާނާ ދެކޮޅަށް އެމެރިކާއިން ކުރަމުންދިޔަ ހަނގުރާމަ ވަގުތީގޮތުން ހުއްޓާލުމާއެކު، ދުނިޔޭގެ ސްޓޮކް މާކެޓުތަކަށް ވެސް ވަނީ އޭގެ ހެޔޮ އަސަރު ކޮށްފަ އެވެ.
އީރާން ހަނގުރާމައާ ގުޅިގެން އެފްއެސްއެމްގެ ޝެޑުތަކުން ވިއްކާ ތެލުގެ އަގު ވެސް ވަނީ މީގެ ކުރިން ބޮޑުކޮށްފަ އެވެ. އެ ކުންފުނީގެ ޝެޑުތަކުން ވިއްކާ ތެލުގެ އަގު އެންމެ ފުރަތަމަ ބޮޑުކުރީ މާޗު 5، ގަ އެވެ. އެ ދުވަހު 13.50ރ. އަށް ހުރި ޕެޓްރޯލް ލީޓަރެއް 16.01ރ. ބޮޑުކުރިއިރު 13.92ރ ހުރި ޑީސަލް ލީޓަރެއްގެ އަގު 17.54ރ. ބޮޑުކުރި އެވެ.
