ބޭންކް އޮފް މޯލްޑިވްސް އިން އިއްޔެ އާންމު ކުރި އިސްތިހާރެއްގައި، ދުންފަތުގެ އިސްތިއުމާލު ކުރަން ބޭނުން ކުރާ އާލާތެއް ކަމަށްވާ ގުޑުގުޑާއެއް ދައްކައިފި އެވެ.
ދުންފަތް އިސްތިއުމާލު ކުރަން ބޭނުން ކުރާ ގުޑުގުޑާގެ ފޮޓޯއެއް ބީއެމްއެލް އިން ބޭނުން ކުރީ، ރޯދަ މަހަށް އެ ބޭންކުން ހިންގާ ޕްރޮމޯޝަނެއްގެ އިސްތިހާރުގަ އެވެ. އެއީ ރާގެއް ދިމާކޮށްގެން ރޯދަ ވީއްލުމަކާއި ބީއެމްއެލްގެ ގިފްޓް ކާޑެއް ލިބޭ ޕްރޮމޯޝަނެކެވެ.
ބީއެމްއެލްގެ ސޯޝަލް މީޑިއާ ޕްލެޓްފޯމްތައް ކަމަށްވާ އެކްސް، ފޭސްބުކް އަދި އިންސްޓަގްރާމްގައި އެ އިސްތިހާރު ވަނީ އާންމުކޮށްފަ އެވެ. މި ހަބަރު ޝާއިއު ކުރުމާ ހަމައަށް ބީއެމްއެލްގެ ބަހެއް ލިބޭތޯ މި ނޫހުން މަސައްކަތްކޮށްފައިވާނެ އެވެ.
މިދިޔަ އަހަރު އަމަލު ކުރަން ފެށި ދުންފަތް ކޮންޓްރޯލް ކުރުމާ ގުޅޭ އާންމު ގަވާއިދުގެ 36 ވަނަ މާއްދާގެ އެއް ވަނަ ނަންބަރުގައި ބުނެފައި ވަނީ، ދުންފަތުގެ ގެއްލުން ބަޔާންކޮށްދިނުމަށް މެނުވީ އަދި އެކަމާ ގުޅޭ ގޮތުން ހޭލުންތެރިކަން އިތުރުކުރަން މެނުވީ، ދުންފަތާއި ދުންފަތުގެ ބާވަތްތަކުގެ ފޮޓޯއެއް މީޑިއާގައި ޝާއިއުކޮށްގެން ނުވާނެ ކަމަށެވެ.
އެ ގަވާއިދުގެ 36 ވަނަ މާއްދާގެ ހަތް ވަނަ ނަންބަރުގައި ބުނެފައިވާ ގޮތުން، ސީދާ ގޮތުންނާއި ނުސީދާ ގޮތުން ދުންފަތުގެ އެއްވެސް ބާވަތެއް ތަފާތު ވަސީލަތްތައް ބޭނުންކޮށްގެން އާންމު ކުރުމާއި ޕްރޮމޯޓް ކުރުން ވެސް ހިމެނޭނީ ދުންފަތް އިސްތިހާރު ކުރުމުގެ ތެރޭގަ އެވެ.
އޭގެ އިތުރުން، އެ ގަވާއިދުގައި 68 ވަނަ މާއްދާގެ ޕ. ގައި ބުނެފައިވާ ގޮތުން، ދުންފަތް ވިއްކާ ފަރާތްތަކުން ބޭނުންކުރާ އެއްޗެއްގެ ތަސްވީރު ބޭނުން ކުރުން ހިމެނޭނީ ދުންފަތް އިސްތިހާރު ކުރުމުގެ ގޮތުގަ އެވެ.
