އިންޑިއާގެ އެހީތެރިކަމާއެކު މާލެއިން ތިލަފުށްޓާ ދެމެދު ގުޅުވައިލުމަށް އަޅާ ބްރިޖުގެ މަސައްކަތު ދުވެއްޔާމެދު ހިތްހަމަޖެހިވަޑައިނުގަންނަވާ ކަމަށް ރައީސުލްޖުމްހޫރިއްޔާ މުހައްމަދު މުއިއްޒު ވިދާޅުވެއްޖެ އެވެ.
މިއަދު އޮތް ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން މުއިއްޒު ވިދާޅުވީ ތިލަމާލެ ބްރިޖުގެ މަސައްކަތް ދަނީ ވަރަށް ލަސްކޮށް ކަމަށެވެ. ނަމަވެސް، ސަރުކާރުން ކޮށްދޭންޖެހޭ ހުރިހާ ކަމެއް ކޮށްދެމުންދާ ކަމަށް އެމަނިކުފާނު ވިދާޅުވި އެވެ.
"ހަގީގަތުގައި ވަރަށް ލަސް ދާާލެއް، ދެން އެކަމަކު ސަރުކާރުން ކޮށްދޭންޖެހޭ ހުރިހާ ކަމެއްވިއްޔާ ކޮށްދެމުން މިދަނީ، މި ދޭތެރެއިން މުއްދަތު އިތުރުކޮށްދޭން ވެސް ވަރަށް ބޮޑަށް އެދިގެން އަޅުގަނޑުމެން ހަމަ، ވަރަށް ބޮޑަށް ބަލާފައި ދެން މުއްދަތު ވެސް އިތުރަށް ދީފިން، ހަމަ ޔަގީނުން ވެސް އަޅުގަނޑު ހިތްހަމައެއް ނުޖެހޭ ދާ ސްޕީޑާމެދުގައެއް، އަޅުގަނޑުގެ ހިތެއް ނުބުނޭ އެއްގޮތަކަށް ވެސް އެ ޕްރޮޖެކްޓާއި ސްޕީޑު ކަމުދާ ރައްޔިތަކު ހުންނާނެހެނެއް ވެސް،" މުއިއްޒު ވިދާޅުވި އެވެ.
މުއިއްޒު ވިދާޅުވީ މިދިޔަ އަހަރުގެ ރިޔާސީ ބަޔާނުގައި އެ ޕްރޮޖެކްޓު ނިމޭނެ ތާރީހެއް ދެއްވި ނަމަވެސް، އެ ތާރީހަށް މަސައްކަތް ނުނިމުނު ކަމަށެވެ. އަދި، އެއީ ދިވެހި ސަރުކާރުގެ މައްސަލައެއް ނޫން ކަމަށް މުއިއްޒު ވިދާޅުވި އެވެ. މި އަހަރުގެ ރިޔާސީ ބަޔާނުގައި އެ ވާހަކަ ނުހިމެނީ، އެ ސަބަބާހުރެ ކަމަށް ވެސް މުއިއްޒު ވިދާޅުވި އެވެ.
"ދެން އެ ޕްރޮޖެކްޓު ނިމުނީމަ އަޅުގަނޑުމެން ވަރަށް އުފާކުރާން އެކަމާ އިނގޭތޯ؟ ދެން ސަރުކާރުން ކޮށްދޭންޖެހޭ ކަންކަން ކޮށްދެމުން މިދަނީ، މިހާރު ދީފައި އޮތް ޑޭޓު އެބަދޭ 2027 އަށް، ކުރިން އޮތީ 2026، މި އަހަރު،" މުއިއްޒު ވިދާޅުވި އެވެ.
އިންޑިއާގެ އެފްކޮންސްއާ ހަވާލުކޮށްގެން ކުރިއަށް ގެންދާ އެ މަޝްރޫއުގެ މަސައްކަތް 2024 ގެ މެއި މަހުގެ ނިޔަލަށް ނިންމަން އަމާޒު ހިފި ނަމަވެސް، އެކި ސަބަބުތަކާ ގުޅިގެން ޓައިމްލައިނަށް ވަނީ ބަދަލުތަކެއް ގެނެސްފަ އެވެ.
މިގޮތުން ވިލިމާލެއާ ހަމައަށް ބްރިޖުގެ މަސައްކަތް ނިންމަން ކަނޑައަޅާފައި އޮތީ މާޗު 31، 2026 އަށެވެ. އަދި، ގުޅީފަޅުން ތިލަފުށްޓަށް ބްރިޖު ގުޅާލަަން ހަމަޖެހިފައި އޮތީ ސެޕްޓެމްބަރު 30، 2026 އަށެވެ. ނަމަވެސް، މިއަދުގެ ނޫސްވެރިންގެ ބައްދަލުވުމުގައި މުއިއްޒު ވިދާޅުވީ އެ ތާރީހު އަންނަ އަހަރަށް ފަސްވެފައިވާ ކަމަށެވެ. ނަމަވެސް، ފަސްވީ ކޮން ތާރީހެއް ކަމެއް މުއިއްޒު ވިދާޅެއްނުވެ އެވެ.
-
ނޯޓް: މި ހަބަރު އެންމެ ފުރަތަމަ ޝާއިއުކުރިއިރު އިންޑިއާގެ ހިލޭ އެހީގެ ދަށުން ކަމަށް ޖެހިފައިވަނީ މައުލޫމާތުގެ ކުށަކުންނެވެ. މި މަޝްރޫއު ހިންގަން އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން 400 މިލިއަން ޑޮލަރާއި އެ ގައުމުގެ ހިލޭ އެހީގެ ގޮތުގައި 100 މިލިއަން ޑޮލަރު ދީފައިވެ އެވެ.
