ރާއްޖޭގެ ފުޓްބޯޅަ އަށް 75 އަހަރު ފުރުމުގެ މުނާސަބަތުގައި ޖޫން މަހު ކުޅެން ރާވާފައި އޮތް ޑައިމަންޑް ޖުބިލީ އިންވިޓޭޝަނަލް މުބާރާތުގައި ރާއްޖެއާ ދެކޮޅަށް ސްރީ ލަންކާ އާއި ޕާކިސްތާން އަދި ބަންގްލަދޭޝްގެ 23 އަހަރުން ދަށުގެ ޓީމު ކުޅެން ނިންމާފަައިވާ ކަަމުގެ މައުލޫމާތު ލިބިއްޖެ އެވެ.
ޑައިމަންޑް ޖުބިލީ އިންވިޓޭޝަނަލް ކަޕްގެ ނަމުގައި، ޖޫން 1-10 އަށް ސީނިއާ ގައުމީ ޓީމުތަކަށް ބާއްވާ މުބާރާތެއް ބާއްވަން އެފްއޭއެމް އިން އޮތީ ނިންމައިފަ އެވެ. މި މުބާރާތުގައި ބައިވެރިވުމުގެ ދައުވަތު އެންމެ ފުރަތަމަ ފޮނުވީ ސްރީ ލަންކާ، ބަންގްލަދޭޝް އަދި ނޭޕާލަށެވެ.
ލަންކާ އިން ވަނީ، އެ މުބާރާތުގައި ކުޅެން ނިންމިކަން އިއުލާނުކޮށްފަ އެވެ. އެކަމަކު، ބަންގްލަދޭޝް އިން ވަނީ އެ ފުރުސަތު ދޫކޮށްލައިފަ އެވެ. ޖޫން މަހު ބަންގްލަދޭޝް އިން ދާނީ ޔޫރަޕްގައި، ސެން މެރީނޯއާ ދެކޮޅަށް ކުޅޭށެވެ. އެހެން ނަަމަވެސް، ބަންގްލަދޭޝް އިން މިހާރު ނިންމާފައިވަނީ މި މުބާރާތުގަައި 23 އަަހަރުން ދަށުގެ ޓީމު ވާދަކުރާ ގޮތަށެވެ.
ރާއްޖޭގެ ޑައިމަންޑް ޖުބިލީ މުބާރާތުގެ ދައުވަތެއް ޕާކިސްތާނަށް
ރާއްޖޭގެ ފުޓްބޯޅަ އަށް 75 އަހަރު ފުރުމުގެ މުނާސަބަތުގައި ޖޫން މަހު ކުޅެން ރާވާފައި އޮތް ޑައިމަންޑް ޖުބިލީ އިންވިޓޭޝަނަލް މުބާރާތުގައި ވާދަކުރުމުގެ ދައުވަތެއް ޕާކިސްތާންގެ ގައުމީ ޓީމަށް ލިބިފައިވާ ކަމަށް ޕާކިސްތާން ފުޓްބޯލް ފެޑެރޭޝަން (ޕީއެފްއެފް)އާ ހަވާލާދީ އެ ގައުމުގެ މީޑިއާ އިން ވަނީ ރިޕޯޓްކޮށްފައި.
ނޭޕާލުން މުބާރާތުގައި ވާދަނުކުރެވޭނެކަން އެފްއޭއެމަށް އަންގާފައިވާއިރު، އެންމެ ފަހުން، ރާއްޖޭން މުބާރާތުގެ ދައުވަތު ފޮނުވި، ޕާކިސްތާންގެ ފުޓްބޯލް ފެޑެރޭޝަން (ޕީއެފްއެފް) އިން ވަނީ މުބާރާތުގައި ބައިވެރިވާނެކަމުގެ ޔަގީންކަން ދީފަ އެވެ. އެހެންކަމުން، މުބާރާތުގައި ރާއްޖެއާ ދެކޮޅަށް ކުޅޭނެ ތިން ޓީމެއް ޔަގީންވެގެން ދިޔައީ އެވެ.
ސާފް ސަރަަހައްދުގެ ގައުމުތަކުގެ މެދުގައި އެންމެ ފަހުން، ރާއްޖޭގައި ހޯސްޓްކުރި މުބާރާތަކީ، 2021 ވަނަ އަހަރުގެ ސާފް ޗެމްޕިއަންޝިޕް އެވެ. އެ ފަހަރުގެ މުބާރާތުގައި ޕާކިސްތާން ވާދަކޮށްފައިނުވެ އެވެ. އެކަމަކު، ޕާކިސްތާނުން ވަނީ މީގެ ކުރިން އެތައް ފަހަރެއްގެ މަތިން ރާއްޖެ އަށް މެޗުތައް ކުޅެން އަތުވެފަ އެވެ. ޕާކިސްތާންގެ ގައުމީ ޓީމު އެންމެ ފަހުން ރާއްޖެ އަތުވެފައިވަނީ، 2023 ވަނަ އަހަރު މާޗް މަހުގައި. ލ. ގަމު ޒޯން ސްޓޭޑިއަމްގައި ކުޅުނު އެކުވެރިކަމުގެ މެޗަކަށެވެ. އެ މެޗުން ރާއްޖެ ވަނީ 1-0 އިން މޮޅުވެފަ އެވެ.
ޑައިމަންޑް ޖުބިލީ އިންވިޓޭޝަނަލް 19 އަހަރުން ދަށުގެ މުބާރާތެއް ވަނީ ސްކޫލްތަކަށް ބާއްވައިފަ އެވެ. އެފްއޭއެމް އިން މި މުބާރާތް ބޭއްވީ ދާދި ފަހުން ރާއްޖޭގައި ބޭއްވި 20 އަހަރުން ދަށުގެ ސާފް ޗެމްޕިއަންޝިޕަށް ޓީމެއް އެކުލަވާލުމާ ވެސް އެކުގަ އެވެ.
