އަންނަ މަހު މާލޭގައި ބާއްވާ ޑައިމަންޑް ޖުބިލީ އިންޓަނޭޝަނަލް ފުޓްބޯޅަ މުބާރާތުގައި ވާދަކުރަން ފުރަތަމަ ނިންމި ސްރީ ލަންކާ އިން މުބާރާތުން ވަކިވުމާ ގުޅިގެން، އެ ޖާގަ އަށް އަފްގާނިސްތާނުން އެ މުބާރާތުގައި ވާދަކުރަން ނިންމާފައިވާ ކަމުގެ މައުލޫމާތު ލިބިއްޖެ އެވެ.
ރާއްޖޭގެ ފުޓްބޯޅަ އަށް 75 އަހަރު ފުރުމުގެ މުނާސަަބަތުގައި، ޑައިމަންޑް ޖުބިލީ އިންވިޓޭޝަނަލް ކަޕްގެ ނަމުގައި މި އަހަރުގެ ޖޫން 1-10 އަށް ސީނިއާ ގައުމީ ޓީމުތަކަށް ބާއްވާ މުބާރާތެއް ބާއްވަން އެފްއޭއެމް އިން އޮތީ ނިންމައިފަ އެވެ.
މި މުބާރާތުގައި ބައިވެރިވުމުގެ ދައުވަތު އެންމެ ފުރަތަމަ ފޮނުވީ ސްރީ ލަންކާ، ބަންގްލަދޭޝް އަދި ނޭޕާލަށެވެ.
ނޭޕާލު ފުޓްބޯޅަ ހާލަތު އޮތްގޮތުން މުބާރާތުގައި ކުޅެވެން ނެތްކަން އެންގިއިރު، ލަންކާ އިން ވަނީ، އެ މުބާރާތުގައި ކުޅެން ނިންމިކަން އިއުލާނު ވެސް ކޮށްފަ އެވެ. އެކަމަކު، ބަންގްލަދޭޝްގެ ސީނިއާ ޓީމުން ވަނީ އެ ފުރުސަތު ދޫކޮށްލައިފަ އެވެ.
އަންނަ މަހު ބަންގްލަދޭޝް ސީނިއާ ފުޓްބޯޅަ ޓީމުން ދާނީ ޔޫރަޕްގައި، ސެން މެރީނޯއާ ދެކޮޅަށް ކުޅޭށެވެ. އެއީ، އެ ގައުމުގެ ތާރީހުގައި ވެސް ޔޫރަޕްގައި ކުޅޭނެ ފުރަތަމަ މެެޗެވެ. ބަންގްލަދޭޝް އިން ފަހުން ނިންމާފައިވަނީ ޑައިމަންޑް ޖުބިލީ މުބާރާތުގައި 23 އަަހަރުން ދަށުގެ ޓީމު ވާދަކުރާ ގޮތަށެވެ.
ލަންކާ އިން ރާއްޖޭގެ މުބާރާތުން ވަކިވިކަން އެފްއޭއެމް އަށް ވެސް އަންގާފައިވާއިރު، ލަންކާ ފުޓްބޯޅަ ފެޑެރޭޝަނުން ތަފާތު އުޒުރުތައް ވަނީ ދައްކައިފަ އެވެ.
އެކަމަކު، އެނގިފައިވާ ގޮތުގައި، ލަންކާ އިން އެންމެ ބޮޑަށް، ރާއްޖޭގެ ޑައިމަންޑް ޖުބިލީ މުބާރާތުގައި ކުޅުމަށް ދެ ވަނަ ވިސްނުމަކަށް ދިޔަ އެއް ސަބަބަކީ، ބަންގްލަދޭޝް އިން މި މުބާރާތަށް 23 އަހަރުން ދަށުގެ ޓީމު ފޮނުވަން ނިންމުމެވެ.
އަފްގާނިސްތާނުން، ރާއްޖޭގައި ކުޅޭ ޑައިމަންޑް ޖުބިލީ މުބާރާތުގެ މި ފުރުސަތުގެ ބޭނުންހިފަން ކުރިން ވެސް ބޭނުންވެފައި ހުރިއިރު، ލަންކާ އިން މުބާރާތުން ވަކިވުމާ އެކު، އެ ޖާގަ ހޯދުމަށްޓަކައި އަވަސްވެގަތެވެ. އަދި، އެ ޓީމުން އަންނަނީ މިހާރު މުބާރާތުގައި ކުޅުމަށްޓަކައި ހަމަޖައްސަން ޖެހޭ ކަންކަން ފުރިހަމަ ކުރަމުން ކަމުގެ މައުލޫމާތު "އަދަދު ސްޕޯޓްސް" އަށް ވަނީ ލިބިފަ އެވެ.
އަފްގާނިސްތާން އިން މީގެ ކުރިން ވަނީ، 2014 ވަަނަ އަަހަރު ރާއްޖޭގައި ބޭއްވި އޭއެފްސީ ޗެލެންޖް ކަޕްގައި ކުޅެފަ އެވެ. މާލެ އާއި އައްޑޫ ސިޓީގައި ހޯސްޓްކުރި އެ މުބާރާތުގައި، އަފްގާނިސްތާން ހިމެނުނީ އައްޑޫ ސިޓީގައި ކުރިއަށްދިޔަ ގްރޫޕް ބީގަ އެެވެ. އަފްގާނިސްތާނުން ގްރޫޕް ބީގެ ދެ ވަނަ ހޯދީ ފިލިޕީންސް އަށް ވުރެން ފަހަތުން ނިންމައިގެންނެވެ. ސެމީ ފައިނަލުގައި ފަލަސްތީން އަތުން ބަލިވިއިރު، ތިން ވަނަ ހޮވަން ކުޅުނު މެޗުގައި ޕެނަލްޓީ ޖަހައިގެން ރާއްޖެ ވަނީ އަފްގާނިސްތާން އަތުން މޮޅުވެފަ އެވެ.
އަފްގާނިސްތާނުން ވަނީ 2003 އިން ފެށިގެން 2015 އާ ހަމައަށް ދެކުނު އޭޝިއާގެ ގައުމުތަކުގެ ކުޅޭ ފުޓްބޯޅަ މުބާރާތް ސާފް ޗެމްޕިއަންޝިޕްގައި ކުޅެފަ އެވެ. އެ ގޮތުން، ސާފް ޗެމްޕިއަންޝިޕްގެ ހަތް މުބާރާތެއްގައި އަފްގާނިސްތާނުން ކުޅުނުއިރު، ފަހު ތިން މުބާރާތުގެ ފައިނަލުގައި ވާދަކޮށް، 2013 ވަނަ އަހަރުގެ މުބާރާތުގެ ޗެމްޕިއަންކަން ވެސް ހޯދި އެވެ.
ރާއްޖޭން މިހާރު އަންނަނީ، ޑައިމަންޑް ޖުބިލީ ފުޓްބޯޅަ މުބާރާތަށް ތައްޔާރުވުމަށް ފަރިތަކުރުންތައް ކުރިއަށްގެންދަމުންނެވެ.
