ފުޓްބޯލް އެސޯސިއޭޝަން އޮފް މޯލްޑިވްސް އިން 17 އަހަރުން ދަށަށް ބާއްވާ ސްކޫލްތަކުގެ ފުޓްބޯޅަ މުބާރާތް، ރާއްޖެ ޖޫނިއާ ފުޓްބޯލް ޗެމްޕިއަންޝިޕް (ކުރީގެ އިންޓަ ސްކޫލް)، ހުޅުމާލޭ ސިންތެޓިކް ޓްރެކުގެ ދަނޑުގަައި ކުޅޭ ގޮތަށް ހަމަޖައްސައިފި އެވެ.
މާދަމާ ހަވީރު ފަށާ މި މުބާރާތް ވެގެންދާނީ ހުޅުމާލޭ ޓްރެކް ދަނޑުގައި ކުޅޭ ފުރަތަމަ ފުޓްބޯޅަ މުބާރާތަަށެވެ. މީގެ ކުރިން، މި ދަނޑުގައި މުޅިން ކުރިއަށްގެންގޮސްފައިވަނީ، އެތުލެޓިކްސްގެ މުބާރާތްތަކެވެ.
އެފްއޭއެމް އިން 2021 ވަނަ އަހަރުގެ ސާފް ޗެމްޕިއަންޝިޕް ރާއްޖޭގައި ހޯސްޓްކުރަން ކުރި ބިޑްގައި ދެ ވަނަ ދަނޑެއްގެ ގޮތުގައި، ހުޅުމާލެ ޓްރެކް ދަނޑު ހިމެނި އެވެ. އެކަމަކު، މުޅި މުބާާރާތް ކުޅެފައިވަނީ، ގަލޮޅު ދަނޑުގަ އެވެ. އޭގެ ޖެހިގެން އައި އަހަރު، ގަލޮޅު ދަނޑު މަރާމާތަށް ބަންދުކުރުމަށްޓަކައި، ހުޅުމާލޭ ޓްރެކް ދަނޑުގައި މެޗުތައް ކުޅޭ ގޮތަށް ޕްލޭން ކުރި އެވެ. އެކަމަކު، އެ ގޮތަށް ވިސްނި ނަމަވެސް ގަލޮޅު ދަނޑުގެ މަސައްކަތް ނުފެށި، ކުރިއެކޭ އެއްގޮތަށް ގަލޮޅު ދަނޑުގައި މެޗުތައް ކުޅެމުން ދަނީ އެވެ.
އިންޓަ ސްކޫލްގެ ބަދަލުގައި ދެން އޮންނާނީ ރާއްޖެ ޖޫނިއާ ޗެމްޕިއަންޝިޕް
ރާއްޖޭގެ ސްކޫލްތަކުގެ މެދުގައި ބާއްވާ ކުޅިވަރު މުބާރާތްތަކަށް ކިޔަމުން އައި "އިންޓަ ސްކޫލް" ނަން "ރާއްޖެ ޖޫނިއާ ޗެމްޕިއަންޝިޕް" އަށް ބަދަލުކޮށް، އެކި ރީޖަންތަކަށް ބަހާލައިގެން މުބާރާތްތައް ބޭއްވުމަށް އެޑިއުކޭޝަން މިނިސްޓްރީން ވަނީ ކުޅިވަރު އެސޯސިއޭޝަންތަކާ ގުޅިގެން ކުރި މަޝްވަރާތަކަށް ފަހު ނިންމާފައި.
މި ވަގުތު ދެ ވަނަ ޑިވިޝަން ފުޓްބޯޅަ މުބާރާތް ވެސް ކުރިއަށްދާތީއާ އެކު، ހެންވޭރު ދަނޑުގެ ހާލަތު އޮތްގޮތުންނާއި ޓާފް ދަނޑުގައި ސްކޫލްތަކުގެ މުބާރާތް ބޭއްވުމަށް އެންމެ އެކަށޭނެ ގޮތް ކަމަށްނުވާތީވެ، މިނިސްޓްރީ އޮފް ޔޫތު އެމްޕަވާމަންޓް، ސްޕޯޓްސް އެންޑް ފިޓްނަސްއާ މަޝްވަރާ ކުރުމަށް ފަހު، ހުޅުމާލެ ޓްރެކް ދަނޑުގައި މެޗުތައް ކުޅޭ ގޮތަށް ހަމަޖެއްސީ އެވެ.
މާދަމާ އިން ފެށިގެން އަންނަ މަހުގެ 17 ވަނަ ދުވަހުގެ ނިޔަލަށް ހުޅުމާލެ ޓްރެކް ދަނޑުގައި، ރާއްޖެ ޖޫނިއާ ފުޓްބޯލް ޗެމްޕިއަންޝިޕްގެ މެޗުތައް ކުރިއަށްދާއިރު، މި މުބާރާތުގައި މި ސަރަހައްދުން 25 ސްކޫލްތަކެއް ވާދަކުރެ އެވެ.
މުބާރާތުގައި ވާދަކުރާ ސްކޫލްތަކަކީ، ގުޅި ސްކޫލް، އަހުމަދިއްޔާ އިންޓަނޭޝަނަލް، ކަލާފާނު ސްކޫލް، އިމާދުއްދީން ސްކޫލް، ކެޔޮދޫ ސްކޫލް، ހުރަވީ ސްކޫލް، މާފުށި ސްކޫލް، މުހިއްދީން ސްކޫލް، ގުރައިދޫ ސްކޫލް، ޖަމާލުއްދީން ސްކޫލް، ހިރިޔާ ސްކޫލް، ރެހެންދި ސްކޫލް، ހުރާ ސްކޫލް، އދ. އަތޮޅު ތައުލީމީ މަރުކަޒު، ތާޖުއްދީން ސްކޫލް، ފިންލެންޑް އިންޓަނޭޝަނަލް ސްކޫލް، ސަލާހުއްދީން ސްކޫލް، އަރަބިއްޔާ ސްކޫލް، އިސްކަންދަރު ސްކޫލް، ގާޒީ ސްކޫލް، މަޖީދިއްޔާ ސްކޫލް، ކ. އަތޮޅު މަދަރުސާ، ހިންމަފުށި ސްކޫލް، އަމީނިއްޔާ ސްކޫލް އަދި ދަރުމަވަންތަ ސްކޫލް އެވެ.
ޓްރެކް ދަނޑުގައި މުބާރާތް ކުރިއަށްގެންދިއުމަށްޓަކައި، ވިނަގަނޑުގައި ރޯލަރު އެޅުމާއި އިތުރު މަސައްކަތްތައް މިހާރު ކުރިއަށް އެބަދެ އެވެ.
ހުޅުމާލެ ސިންތެޓިކް ޓްރެކް ދަނޑަކީ މީގެ ކުރިން، ސްޕޯޓްސް މިނިސްޓްރީން އެތުލެޓިކްސް އެސޯސިއޭޝަންގެ ހަރަކާތްތަކަށް ދީފައި އޮތް ދަނޑެކެވެ. އެ ދަނޑުގައި، ގައުމީ އެތުލެޓިކްސްގެ ޖޫނިއާ އާއި ސީނިއާ ގައުމީ ޓީމުގެ ޕްރެކްޓިސްތަކުގެ އިތުރުން، ގަވާއިދުން އެތުލެޓިކްސްގެ އެކަޑަމީތަކުގެ ޓްރެއިނިންތައް ކުރިއަށްގެންދެ އެވެ. އެ ގޮތުން، މި ދުވަސްވަރަކީ، ސްކޫލްތަކުގެ ކްރިކެޓް މުބާރާތް މާލެ ޓްރެކް ދަނޑުގައި ކުރިއަށްދާ ދުވަސްވަރަކަށްވެފައި، ހުޅުމާލެ ޓްރެކް ދަނޑުގައި، ސްކޫލްތަކުގެ ފުޓްބޯޅަ މުބާރާތް ބާއްވަން ތައްޔާރުވާއިރު، އެތުލެޓިކްސްގެ އެކަޑަމީތަކުގެ ހަރަކާތްތައް ތާވަލު ކުރެވިފައިވާ ގޮތަށް ކުރިއަށްގެންދެވޭނެ ތަނެއް ނެތެވެ.
