ސާފް 20 އަހަރުން ދަށުގެ ފުޓްބޯޅަ މުބާރާތުގައި ކުޅުނު ޒުވާން ކުޅުންތެރިން ހިމަނައިގެން، ޖޫން މަހު މާލޭގައި ބާއްވާ ޑައިމަންޑް ޖުބިލީ އިންޓަނޭޝަނަލް ފުޓްބޯޅަ މުބާރާތުގައި ވާދަކުރާ ރާއްޖޭގެ ގައުމީ ފުޓްބޯޅަ ޓީމުގެ ޕްރިލިމިނަރީ ސްކޮޑު އިއުލާނުކޮށްފި އެވެ.
ރާއްޖޭގެ ފުޓްބޯޅަ އަށް 75 އަހަރު ފުރުމުގެ މުނާސަބަތުގައި ބާއްވާ މުބާރާތް ޖޫން 1-10 އަށް ކުރިއަށްގެންދާ ގޮތަށް ނިންމާފައިވާއިރު، މި މުބާރާތުގައި ރާއްޖޭގެ އިތުރުން ދެން ކުޅޭނީ، ސްރީ ލަންކާ، ޕާކިސްތާން އަދި ބަންގްލަދޭޝްގެ 23 އަހަރުން ދަށުގެ ގައުމީ ޓީމެވެ.
އެ މުބާާރާތުގައި ވާދަކުރަން ނޭޕާލަށް ދިން ފުރުސަތުގައި އެ ޓީމަށް ބޭނުންކުރެވެން ނެތްކަމަަށް އެންގީ، އެ ގައުމުގެ ފުޓްބޯޅައިގެ ހާލަތު ގޯސްކޮށް އޮތުމުންނެވެ.
ގައުމީ ފުޓްބޯޅަ ޓީމުގެ ކޯޗު، ހަންގޭރީގެ އިސްތަވާން އުރުބާނީގެ ކޯޗުކަމުގައި، ޑައިމަންޑް ޖުބިލީ އިންޓަނޭޝަނަލް މުބާރާތަށް ގައުމީ ޓީމުން ޕްރެކްޓިސް ފަށަން ނިންމާފައި އޮތީ މި މަހު 26 ވަނަ ދުވަހު އެވެ.
ސްކޮޑުގައި ހިމަނާފައިވާ ކުޅުންތެރިންނަށް ބަލާއިރު، 20 އަހަރުން ދަށުގެ ގަައުމީ ޓީމުގެ މުހައްމަދު އިލާން އިމްރާން، ނާޝިއު އަހުމަދު ޝިހާމް، ނައްސާހު އިބްރާހިމް ނާސިރު، ޒަހުރާން ހަސަން ޒިޔާދު، އަހުޒަމް ރަޝީދު އަދި އީތަން އިބްރާހިމް ޒަކީ ހިމެނެ އެވެ. މީގެ އިތުރުން، ބުރު ސްޕޯޓްސް ކްލަބަށް މޮޅު ކުޅުމެއް ދެއްކި، މުހައްމަދު ނައިސަމް ނަދީމް އަށް ވެސް ގައުމީ ސްކޮޑުން ފުރުސަތު ލިބިފައިވެ އެވެ.
ޓިމޯ ލެސްޓޭއާ ދެކޮޅަށް ރާއްޖޭން ކުޅުނު އޭޝިއަން ކަޕް ކޮލިފައިން މެޗަށް ނެގި ސްކޮޑުގައި ނުހިމެނޭ ކުޅުންތެރިންނަށް ބަލާއިރު، މި ފަހަރު ސްކޮޑަށް އެނބުރި އައީ، ނިއު ރޭޑިއަންޓް ސްޕޯޓްސް ކްލަބްގެ ހަަސަން ރާއިފް އަހުމަދު (ހަންނަ)، މާޒިޔާ ސްޕޯޓްސް އެންޑް ރެކްރިއޭޝަންގެ ހަމްޒާ މުހައްމަދު (ހަމްޕު) އެވެ. އަދި، ކުރިން ގައުމީ ސްކޮޑުގައި ހިމެނުނު، އަހުމަދު މާއިޝް ރަޝީދު (މާއި) އަށް ވެސް ވަނީ މި ފަަހަރުގެ ސްކޮޑުން ޖާގަ ލިބިފަ އެވެ.
