ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ މިހާރުގެ ލީޑަޝިޕް މަގާމުތަކަށް އިންތިހާބުވިއިރު، އެފްއޭއެމާއި ދެކުނު އޭޝިއާގެ މައި ފުޓްބޯޅަ އިދާރާ، ސައުތު އޭޝިއަން ފުޓްބޯލް ފެޑެރޭޝަން (ސާފް)އާ ދެމެދު ގުޅުން އޮތީ އެންމެ ރަނގަޅަކަށް ނޫނެވެ. އެއް ސަބަބަކީ، ރާއްޖޭގައި 2021 ވަނަ އަހަރު ބޭއްވި ސާފް ޗެމްޕިއަންޝިޕް ފުޓްބޯޅަ މުބާރާތުގެ ޗެމްޕިއަން އާއި ރަނަރަޕަށް ދޭން ޖެހޭ އިނާމް ފައިސާ ދީފައިނުވުމެވެ. އެ ގޮތުން، އެފްއޭއެމްގެ ރައީސް، އަހުމަދު ތޯރިގު (ޓޮމް)ގެ ލީޑަޝިޕުން މުހިންމު ކަމެއް ގޮތުގައި ދެކި، ޗެމްޕިއަން އާއި ރަނަރަޕަށް ދޭން ޖެހޭ އިނާމް ފައިސާ އަށް ވާ 75000 ޑޮލަރު ދެއްކި އެވެ. އެއާ އެކު ސާފް އާއި އެފްއޭއެމްގެ ގުޅުން ބަދަހިވުމަށް މަގުކޮށިގެން ދިޔަ އެވެ.
އެ ގުޅުން އިތުރަށް ހަރުދަނާކުރަން ލިބިގެންދިޔަ ފުރުސަތަކީ، ދާދި ފަހުން ރާއްޖޭގައި ބޭއްވިގެންދިޔަ 20 އަހަރުން ދަށުގެ ސާފް ޗެމްޕިއަންޝިޕް އެވެ. މިއީ، ސާފްގެ އުމުރުފުރާ މުބާރާތެއް ރާއްޖޭގައި ހޯސްޓްކުރި ފުރަތަމަ ފަހަރެވެ. މީގެ ކުރިން، 2019 ވަނަ އަހަރުގެ ޖުލައި މަހު އައްޑޫ ސިޓީގައި ވަނީ، ޔުއެފާ އެސިސްޓް 15 އަހަރުން ދަށުގެ މުބާރާތެއް ބާއްވައިފަ އެވެ. ރާއްޖޭން ވަނީ 2008 ވަނަ އަހަރާއި 2021 ވަނަަ އަހަރުގެ ސާފް ޗެމްޕިއަންޝިޕް ހޯސްޓްކޮށްފަ އެވެ. މީގެ ތެރެއިން، 2008 ގެ މުބާރާތް ހޯސްޓްކުރީ ސްރީ ލަންކާއާ ގުޅިގެންނެވެ. އެކަަމަކު، 2021 ވަނަ އަހަރުގެ މުބާރާތް އޮތީ މާލޭގަ އެވެ.
މީގެ ކުރިން، ރާއްޖޭގައި ހޯސްޓްކުރި ހުރިހާ ފުޓްބޯޅަ މުބާރާތެއްގެ އެކިއެކި ތަޖުރިބާތަކުގެ އަލީގައި، އަދި ރާއްޖޭގެ ފުޓްބޯޅަ އެކި މައްސަލަތަކުގެ ތެރެއިން ހައްލުތަކެއް ހޯދަމުންދާ ދަނޑިވަޅެއްގައި ސާފް 20 އަަހަރުން ދަށުގެ މުބާރާތް ސާފް އިން ބޭނުންވާ ގޮތަށް ހޯސްޓްކުރުމަކީ ކާމިޔާބެއްގެ ގޮތުގައި އެފްއޭއެމް އިން ދެކެނީ ގިނަ ސަބަބުތަކެއް ހުރުމުންނެވެ.
އެފްއޭއެމްގެ އެކްޓިން ޖެނެރަލް ސެކްރެޓަރީ، އަހުމަދު ޒަރިީރު ވިދާޅުވީ، ހަގީގަތުގައި ވަރަށް ބޮޑެތި ގޮންޖެހުންތަކެއް ހުރި ކަމުގައި ވިޔަސް މުބާރާތް ކާމިޔާބުކަމާ އެކު ހޯސްޓްކުރެވުނު ކަމަށެވެ.
"އެންމެ ބޮޑު ޗެލެންޖަަކަށް ވީ އެންމެ އެކަށީގެންވާ ޓްރެއިނިން ޕިޗުތަކެއް ނެތުން، އެކަމަކު ވެސް މުބާރާތުގެ ގިނަ ކަންތައްތައް ދިޔައީ ވަރަށް ރަނގަޅަށް،" ޒަރީރު ވިދާޅުވި އެވެ.
ގޮންޖެހުންތަކެއް ހުރި ކަމުގައި ވިޔަސް، މި މުބާރާތް ރާއްޖޭގައި ހޯސްޓްކުރުމުގެ މުހިންމު މަގުސަދުތަކެއް ޒަރީރު ވަނީ ފާހަގަކުރައްވައިފަ އެވެ.
"އިންޓަނޭޝަނަލް ރިލޭޝަންސް (ބައިނަލްއަގުވާމީ އެކި އެސޯސިއޭޝަން އާއި ފެޑެރޭޝަންތަކާ އޮންނަ ގުޅުން) ރަނގަޅުވީމަ ހޯސްޓްކުރަން ޗާންސް ލިބުނީ ވެސް. ދެން، މި މުބާރާތާ އެކު، (ސާފް 20 އަހަރުން ދަށުގެ މުބާރާތާ އެކު) ސާފްގެ ގައުމުތަކާ އޮތް ގުޅުން ވެސް މިހާރު ވަރަށް ރަނގަޅު،" ޒަރީރު ވިދާޅުވި އެވެ.
އެންމެ ފަހުން، ރާއްޖޭގައި ހޯސްޓްކުރި 2021 ވަނަ އަހަރު ސާފް ޗެމްޕިއަންޝިޕަށް ފަހު، ސާފްގެ ގައުމުތަކާއި ރާއްޖޭގެ ގުޅުން ގޯސްވެގެންދިޔައީ، ފައިސާގެ އެކިއެކި ކަންކަމާ ހެދި އެވެ. މާލީ މައްސަލަތަކަކީ، އެފްއޭއެމްގެ އެންމެ ފަހުން އޮތް ލީޑަޝިޕާ ހެދި، ރާއްޖޭގެ ފުޓްބޯޅަ ބޮޑު އަޑިގަނޑަަށް ވެއްޓިފައި އޮތް ކަމެކެވެ. ސާފްއާ ދެމެދު އޮތް އެ މާލީ މައްސަލަތަކާ ހެދި ރާއްޖެ އަށް ފިޔަވަޅު އެޅުމަށް ވެސް ސާފްގެ ބައްދަލުވުންތަކުގައި މީގެ ކުރިން ވާހަކަ ދައްކާފައިވެ އެވެ. އެކަމަކު، އޭރު އެ އޮތް ނުތަނަވަސްކަން ބޮޑު ހާލަތުން ރާއްޖޭގެ ފުޓްބޯޅަ، ދެކުނު އޭޝިއާގައި ހިނގައިގަންނަން ފުރުސަތު ލިބިގެންދިޔައީ، މި ފަހަރު މި ހޯސްޓްކުރި، ސާފް 20 އަހަރުން ދަށުގެ މުބާރާތުގެ ސަބަބުންނެވެ.
ޒަރީރު ވިދާޅުވީ، ސާފް 20 އަހަރުން ދަށުގެ މުބާރާތުގެ ކަންކަމުގައި، ޕޮލިހުންނާއި އެމްޓީސީސީ، މާލެ ސިޓީ ގްރޫޕް އޮފް ހޮސްޕިޓަލްސް، ޕީއެސްއެމް އަދި ސްޕޯޓްސް މިނިސްޓްރީން ދިން އެއްބާރުލުމަށް ޝުކުރުއަދާކުރުމަށެވެ.
މުބާރާތުގައި އެންމެ ޗެލެންޖިންކޮށް ދިޔަ އެއް ކަންތައް ކަމަށްވާ، އެކި ގައުމުތަކުގެ ސަޕޯޓަރުންގެ އެ ކަންކަން، އެކި ހާލަތުގައި ދިމާވި ގޮތްގޮތަށް ބަލައި، ރަނގަޅަށް މެނޭޖް ކުރުމުގައި ޕޮލިހުންނާއި އެކި ފަރާތްތަކުން ދިން އެއްބާރުލުން އެފްއޭއެމް އިން ވަނީ ފާހަގަކޮށްފަ އެވެ.
ޖުމްލަ ގޮތެއްގައި، މި ފަހަރުގެ 20 އަހަރުން ދަށުގެ ސާފް ޗެމްޕިއަންޝިޕްގެ އެކި ކަންކަމާ ގުޅޭގޮތުން، ސާފްގެ އޮފިޝަލުންނާއި ގައުމުތަކުގެ ކޯޗުން ވަނީ ހިތްހަަމަޖެހުން ފާޅުކޮށްފަ އެވެ. އެކަމަކު، ބައެއް ކޯޗުން ވަނީ، އިންތިޒާމްތައް އިތުރަށް ރަނގަޅުކުރެވޭނެ ކަންކަން ވެސް ފާހަގަކޮށްފަ އެވެ. އެ ގޮތުން، ޓްރެއިނިން ވަސީލަތްތަކާއި އެހެނިހެން ކަންކަން. ހިމެނެ އެވެ.
