ރާއްޖޭގައި ވަޒީފާ އަދާކުރާ އަދާކުރާ ގިނަ ދިވެހިންގެ ރިޓަޔަމަންޓު ފަންޑުތައް ބަލަހައްޓާ ޕެންޝަން އޮފީހުގައި ޗެއާޕާސަން އާއި ސީއީއޯ އާއި ސީއެފްއޯއެއް ނެތި އެ އިދާރާއިން މަސައްކަތް ކުރަމުން އަންނަތާ ގިނަ ދުވަސްތަކެއް ވެއްޖެ އެވެ.
ޕެންޝަން އޮފީހުގެ މި މަގާމުތަކުގައި ކުރިން ތިބި މީހުން އިސްތިއުފާ ދިނީ، އެ އޮފީސް މެދުވެރިކޮށް 2.4 ބިލިއަން ރުފިޔާގެ ފައިސާ ޗާޕުކުރުމާ އެއްވަރުގެ މުއާމަލާތެއް ހިންގަން އުޅުމުންނެވެ. މި މައްސަލައިގައި ޕެންޝަން އޮފީހުގެ އޭރުގެ ވެރިންނާއި ގިނަ ބޯޑު މެންބަރުން ވެސް އިސްތިއުފާ ދެއްވި އެވެ.
ފައިސާ ޗާޕުކުރުމުގެ މުއާމަލާތާ ދެކޮޅު ހެދުމަށް ފަހު ޕެންޝަން އޮފީހުގެ ބޯޑުން އެންމެ ފުރަތަމަ އިސްތިއުފާ ދިން މީހަކު، އެ ބޯޑުގައި ޕްރައިވެޓް ސެކްޓާ ތަމްސީލުކުރައްވަން އިންނެވި މުހައްމަދު ސަރުވަޝް އާދަމެވެ. އޭނާ އިސްތިއުފާ ދެއްވީ މިދިޔަ އަހަރުގެ އޮކްޓޫބަރު 22، ގައި އެވެ.
މި މަގާމަށް މީހަކު ހޯދަން ޕެންޝަން އޮފީހުން އެތައް ފަހަރެއްގެ މަތިން އިއުލާންކުރި ނަމަވެސް މިއަދާ ހަމައަށް އެ މަގާމުގައި މީހަކު ނެތެވެ.
ސަރުވަޝްގެ ފަހުން އިސްތިއުފާ ދެއްވީ، އެ އޮފީހުގެ ސީއެފްއޯގެ މަގާމުގައި ހުންނެވި ހައްވާ ފަޖުވާ އެވެ. އޭނާ މަގާމުން އިސްތިއުފާ ދެއްވީ މިދިޔަ އަހަރުގެ ނޮވެމްބަރު 4، ގައި އެވެ.
ފަޖުވާ ހުރި މަގާމަށް މީހަކު ހޯދަން ވެސް ފަސް ފަހަރެއްގެ މަތިން އިއުލާންކޮށްފައިވެ އެވެ. ނަމަވެސް މިއަދާ ހަމައަށް ވެސް ސީއެފްއޯއެއް ނެތެވެ.
މި ދެ މީހުން އިސްތިއުފާ ދިން ފަހުން، ފިނޭންސް މިނިސްޓްރީ ތަމްސީލުކުރައްވަން ބޯޑުގައި އިންނެވި އަޝްރަފް ރަޝީދު ވަނީ، މިދިޔަ އަހަރުގެ ޑިސެމްބަރުގައި އިސްތިއުފާ ދެއްވާފަ އެވެ. ފިނޭންސުން ވަނީ އޭނާގެ ބަދަލުގައި އައިމިނަތު ޝަޒްރާ މޫސާ ހަމަޖައްސާފަ އެވެ.
ޕެންޝަން އޮފީހުގެ ފުރަތަމަ ބުރުގެ އިސްތިއުފާތަކަށް މަސްތަކެއް ފަހުން، އެ ބޯޑުގެ ޗެއާޕަސަންގެ މަގާމުގައި ހުންނެވި އަހުމަދު އިނާޒު ވަނީ މިދިޔަ ފެބްރުއަރީ މަހުގެ 1 ގައި އިސްތިއުފާ ދެއްވާފަ އެވެ.
އިނާޒު އިސްތިއުފާ ދިނުމުން ޖެހިގެން އައި ދުވަހު ޗެއާޕާސަންގެ މަގާމަށް ކުރިމަތިލާން ހުޅުވާލި އެވެ. އެ ފަހުން އިތުރު އިއުލާނެއް ވެސް ކުރި އެވެ. ނަމަވެސް މިއަދާ ހަމައަށް އެ ބޯޑުގެ ޗެއާޕާސަންގެ މަގާމު އޮތީ ހުހަށެވެ.
އިނާޒުގެ ފަހުން ޕެންޝަން އޮފީހުގެ ސީއީއޯ ސުޖާތާ ހަލީމް ވެސް ވަނީ އިސްތިއުފާ ދެއްވާފަ އެވެ. އޭނާ އިސްތިއުފާ ދެއްވި ނަމަވެސް އެ މަގާމަށް މީހަކު ހޯދަން އިއުލާނެއް ނުކުރެ އެވެ.
ޕެންޝަން އޮފީހުގެ ބޯޑުން އިސްތިއުފާ ދެއްވި ތިން ވަނަ މީހަކީ ޕްރައިވެޓް ސެކްޓާ ތަމްސީލުކުރައްވަން ބޯޑުގައި އިންނެވި މުހައްމަދު މާދިން ލަތީފެވެ. މާދިން އިސްތިއުފާ ދެއްވުމުން ބޯޑުން ހުސްވީ މަގާމަށް ވެސް މިއަދާ ހަމައަށް މީހަކު ނުވެ އެވެ.
ޕެންޝަން އޮފީހާއި އެ އޮފީހުގެ ބޯޑުން އިސްތިއުފާ ދިން މަގާމުތަކަށް މީހުން އައްޔަނު ނުކޮށް މިހާ ދިގުލައިގެންދާ ސަބަބު ސާފުކުރަން އެ އޮފީހަށް ގުޅުމުން ބުނީ އެކަށީގެންވާ ވަރަށް ހުށަހެޅުންތައް ނުލިބެނީ ކަމަށެވެ.
މި ވަގުތު ޕެންޝަން އޮފީހުގެ ބޯޑުގައި ޗެއާޕާސަން އާއި ޕްރައިވެޓް ސެކްޓާ ތަމްސީލުކުރަން ތިބޭ ހަތަރު މެންބަރުންގެ ތެރެއިން ދެ މެންބަރުން ނެތުމުން، އަށް މެންބަރުން ތިބެން ޖެހޭ ބޯޑުގައި ތިބީ ހަތަރު މެންބަރުންނެވެ. އެއީ ޝަޒްރާ އާއި ސޯޝަލް ސެކިއުރިޓީ އާސިފް ހަނީފް އާއި ޕްރައިވެޓް ސެކްޓާ ތަމްސީލުކުރަން ތިއްބަވާ މިޒުނާ އަހުމަދާއި އަބްދުލް މަޖީދު އަލީ އެވެ.
ޕެންޝަން އޮފީހުގެ ވެރިންނާއި ބޯޑު މެންބަރުން އިސްތިއުފާ ދިން މައްސަލަ ބިނާވާ 2.4 ބިލިއަން ރުފިޔާގެ ބޮންޑު މުއާމަލާތް އެ އޮފީހުން ހިންގި ކަމެއް ނުވަތަ ނޫން ކަމެއް ސާފެއް ނުވެ އެވެ. ހަމަ ޔަގީނުން ވެސް މިދިޔަ އަހަރުގެ ނިޔަލާ ހަމައަށް، ޕެންޝަން އޮފީހުން ބުނެފައިވާ ފަދަ ދިގު މުއްދަތުގެ ޑުއަލް ކަރަންސީ ބޮންޑަކަށް އިންވެސްޓުކޮށްފައިވާ ކަމަކަށް އެ އޮފީހުގެ އިންވެސްޓްމަންޓް ޑިސްކްލޯޝާތަކުގައި ނެތެވެ.
