ޕެންޝަން އޮފީހުގު ބޯޑުގައި ޕްރައިވެޓް ސެކްޓާ ތަމްސީލުކުރާ މެންބަރުންގެ ތެރެއިން ހުސްވެފައިވާ މަގާމަށް ކުރިމަތިލާން ހުޅުވާލި ފުރުސަތުގައި އެކަށީގެންވާ އަދަދަށް އެޕްލިކޭޝަން ނުލިބުމުން އެ މަގާމަށް ކުރިމަތިލާން އެ އޮފީހުން މިއަދު އަލުން ހުޅުވާލައިފި އެވެ.
ޕެންޝަން އޮފީހުގެ ބޯޑުގައި ޕްރައިވެޓް ސެކްޓާ ތަމްސީލުކުރަން ހަތަރު މެންބަރުން ތިބެ އެވެ. ނަމަވެސް އެ އޮފީސް މެދުވެރިކޮށް ހިންގަން އުޅޭ ބޮންޑު ގަނެވިއްކުމުގެ މުއާމަލާތާ ގުޅިގެން އެ ހަތަރު މެންބަރުންގެ ތެރެއިން ދެ މެންބަރަކާއި އެ ބޯޑުގެ ޗެއާމަނާއި ބޯޑުގެ އިތުރު މެންބަރަކާއި ސީއީއޯ އާއި ސީއެފްއޯ ވަނީ މަގާމުން އިސްތިއުފާ ދީފަ އެވެ.
ޕްރައިވެޓް ސެކްޓާ ތަމްސީލުކުރަން ޕެންޝަން ބޯޑުގައި ތިބި މެންބަރުންގެ ތެރެއިން ބޮންޑު މުއާމަލާތުގެ މައްސަލައިގައި ފުރަތަމަ އިސްތިއުފާ ދެއްވީ، މިދިޔަ އަހަރުގެ އޮކްޓޫބަރު 22 ގައި އެ މަގާމު ދޫކޮށްލެއްވި އަހުމަދު ސަރުވަޝް އާދަމް އެވެ.
ސަރުވަޝް އިސްތިއުފާ ދެއްވުމާ ގުޅިގެން ބޯޑުން ހުސްވީ މަގާމަށް މީހަކު ނުވަނީސް، ބާކީ ތިބި ތިން މެންބަރުންގެ ތެރެއިން މުހައްމަދު މާދިން ލަތީފް ވަނީ މި މަހުގެ 4، ގައި މަގާމުން އިސްތިއުފާ ދެއްވާފަ އެވެ.
ޕެންޝަން ގާނޫނުގައި އޮންނަ ގޮތުން ބޯޑަށް މެންބަރުން ހޮވުމުގެ ފުރަތަމަ މަރުހަލާ ހިންގާނީ ސިލެކްޝަން ކޮމިޓީއަކުންނެވެ. މި ކޮމިޓީން ތިން މީހެއްގެ ނަން ޝޯޓްލިސްޓުކުރަން ޖެހެ އެވެ. މިހެންކަމުން، ބޭނުންވީ ވަރަށް މީހުން ކުރިމަތިނުލާ ކަމަށް ޕެންޝަން އޮފީހުން ބުނީ މި މަގާމަށް ކުރިމަތިލީ މީހުންގެ ތެރޭގައި ޝޯޓްލިސްޓްކޮށްފައި ފޮނުވާނެ ތިން ނަން ނުލިބުމުން ކަމަށް ވަރަށް ބޮޑަށް ބުރަވެވެ އެވެ.
ޕެންޝަން އޮފީހުގެ މި މަގާމުގެ އިތުރުން، ހުސްވެފައިވާ އެހެން މަގާމުތަކަށް ކުރިމަތިލާން ވަނީ ހުޅުވާލާފަ އެވެ. މިހެން ނަމަވެސް އަދި ޕެންޝަން އޮފީހުން އިސްތިއުފާ ދިން އެއްވެސް މަގާމަކަށް، ސަރުކާރުގެ މިނިސްޓްރީތައް ތަމްސީލުކުރާ މެންބަރުންގެ ފިޔަވައި، މީހަކު ނުވެ އެވެ.
މި މައްސަލަ ޖެހިގެން އުޅޭ ބޮންޑު މުއާމަލާތަކީ ޕެންޝަން އޮފީސް ހިމެނޭ ގޮތަށް އެމްއެމްއޭ އާއި ފިނޭންސް މިނިސްޓްރީ ބައިވެރިވެގެން ހިންގާ މުއާމަލާތެކެވެ. މި މުއާމަލާތް ހިންގަނީ ޕެންޝަން އޮފީހުން ކުރިން ގަނެފައިވާ 2.4 ބިލިއަން ރުފިޔާގެ ބޮންޑުތަކެއް އެމްއެމްއޭއަށް ވިއްކާލުމަށް ފަހު، އެ ފައިސާ ސަރުކާރުން ވިއްކާ ދިގު މުއްދަތުގެ އާ ޑުއަލް ކަރަންސީ ބޮންޑަކަށް އިންވެސްޓުކޮށްގެންނެވެ.
ޕެންޝަން އޮފީހުން ބުނާ ގޮތުގައި މިއީ އެ ފަންޑުގެ ބައިވެރިންނަށް ފައިދާ ހުރި ރަނގަޅު މުއާމަލާތަކެވެ. ނަމަވެސް ގިނަ ބަޔަކު، ބޯޑުން އިސްތިއުފާ ދިން ފަންނީ މީހުން ހިމެނޭހެން، ކަންބޮޑުވަނީ މި މުއާމަލާތުގެ ސަބަބުން ކުރު ރާސްތާގައި އިގުތިސޯދަށް އަސަރުކޮށް، ދުރު ރާސްތާގައި ފަންޑުގެ އަގު ދަށަށް ދިޔުމުގެ ފުރުސަތު ބޮޑުވުމެވެ.
މި މުއާމަލާތަކީ އެމްއެމްއޭގައި ނެތް ފައިސާ ބޭނުންކޮށްގެން ހިންގާ މުއާމަލާތަކަށް ވާތީ އާއި މި ފައިސާ ސަރުކާރުގެ ކުރު މުއްދަތުގެ ހަރަދުތައް ހަމަޖައްސަން ބޭނުންކޮށް، އިގުތިސޯދަށް ވަންނާނެތީ މިއީ ފައިސާ ޗާޕުކުރުން ކަމަށް މާހިރުން ބުނެ އެވެ.
