ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަން ކުރިއަށް އޮތް ޖޫން 6، ގައި ބާއްވަން އިލެކްޝަންސް ކޮމިޝަނުން މިއަދު ނިންމައިފި އެވެ.
ހިތަދޫ އުތުރު ދާއިރާގެ ގޮނޑި ހުސްވީ މެންބަރު މުހައްމަދު ސިނާނުގެ ކިބައިގައި މެންބަރުކަމުގެ ޝަރުތު ހަމަނުވާ ކަމަށް ސުޕްރީމް ކޯޓުން އިއްޔެ ނިންމުމުންނެވެ.
ރާއްޖޭގެ އެންމެ މަތީ ކޯޓުން އިއްޔެ ކަނޑައެޅީ ސާބިތު ދަރަންޏެއް އޮވެ، އެ ދަރަންޏާ އެއްގޮތަށް ފައިސާ ދައްކާފައިނުވާތީ ރައްޔިތުންގެ މަޖިލީހުގެ މެންބަރުކަމުން ސިނާނު ވަކިވެފައިވާ ކަމަށެވެ.
އިލެކްޝަންސް ކޮމިޝަނުން މިއަދު ނެރުނު އިއުލާނުގައި އިންތިހާބަށް ކުރިމަތިލުމުގެ ސުންގަޑިއަކަށް ދިނީ އޭޕްރީލް 29، ގެ 15:00 އެވެ. އީމެއިލް މެދުވެރިކޮށް އަދި އިލެކްޝަންސްގެ އޮފީހަށް ހާޒިރުވެގެން ވެސް އިންތިހާބަށް ކުރިމަތިލާން އެދި ފޯމު ހުށަހެޅޭނެ އެވެ.
ގާނޫނުއަސާސީގައި ބުނެފައިވާ ގޮތުން ރައްޔިތުންގެ މަޖިލީހުގެ ގޮނޑިއެއް ހުސްވެއްޖެ ނަމަ، 60 ދުވަހުގެ ތެރޭގައި އެ ގޮނޑިއަށް އަލުން މީހަކު އިންތިހާބު ކުރަންޖެހެ އެވެ.
ހުކުމާ އެއްގޮތަށް ސިނާނު ނުދެއްކީ މޯލްޑިވްސް އިސްލާމިކް ބޭންކުން ނަގާފައި އޮތް ފަސް މިލިއަން ރުފިޔާގެ ލޯނެކެވެ. އެ ލޯނު އޭނާ އަދާ ކުރީ އެ މައްސަލަ ސުޕްރީމް ކޯޓަށް ވެއްދުމުނެވެ.
