އިޒްރޭލު އަދި ޒަޔަނިސްޓުންނާ ގާތް ގުޅުމެއް އޮންނަ ޔޫއޭއީގެ މުހައްމަދު އަލައްބާރަށް ރަސްމާލެ ވިއްކާލަން އުޅޭ މައްސަލައިގައި ރައްޔިތުންގެ މަޖިލީހަށް ޕެޓިޝަނެއް ހުށަހަޅައިފި އެވެ
އިދިކޮޅު ޕީއެންއެފްގެ އެކްޓިވިސްޓު، ހަލީމަތު ޒުހައިރާ ހުށަހެޅި އެ ޕެޓިޝަނުގައި ގޮވާލާފައި ވަނީ ރަސްމާލެ ވިއްކާލުމަށް އެއްވެސް ގާނޫނެއް ހެދުމުގެ ކުރިން އިންކުއަރީއެއް ހިންގުމަށެވެ.
"ދައުލަތުން އެއްވެސް އެންމެ ފަހުގެ އެއްބަސްވުމެއް ނިންމުމުގެ ކުރިން ނުވަތަ މިކަމަށް މަގުފަހިކުރާ އެއްވެސް ގާނޫނެއް ފާސްކުރުމުގެ ކުރިން ސަރުކާރާއި ކަމާގުޅޭ އެންމެހައި މުއައްސަސާތަކުން ހެކިބަހާއި ލިޔެކިޔުންތައް ހޯދުމަށް މަޖިލީހަށް ލިބިދީފައިވާ ބާރުތަކުގެ ބޭނުން ހިފައިގެން މި އެއްބަސްވުމާ މެދު ހުޅުވާލެވިފައިވާ ފުރިހަމަ އާންމު އިންކުއަރީއެއް ހިންގުމަށް ކަމާބެހޭ ކޮމިޓީއަށް އެންގެވުން،" އެ ޕެޓިޝަނުގައި ބުނެފައިވެ އެވެ.
އޭގެ އިތުރުން، ރަސްމާލޭ މައްސަލައަށް މަޖިލީހަށް އާންމު ބަހުސެއް ކުރުމަށާއި ރަސްމާލެ ޑީލުގައި ސޮއި ކުރަނީ ގާނޫނުއަސާސީގެ 251 ވަނަ މާއްދާއާ އެއްގޮތަށް ބިދޭސީއަކަށް ބިމެއް މިލްކުނުވާނެ ގޮތަކަށްކަން މިނިވަން ގާނޫނީ ފަރާތަކުން ލަފަޔެއް ހޯދަން ވެސް ޕެޓިޝަނުގައި ގޮވާލާފައިވެ އެވެ.
"ޓްރާންސްފާކުރާއިރު އައުކުރެވޭ ކުލީގެ މުއްދަތުތައް ހިމެނޭގޮތުން މި އެއްބަސްވުން ގާނޫނުއަސާސީގެ 251 ވަނަ މާއްދާ އާ އެއްގޮތްވޭތޯ ބެލުމަށްޓަކައި މިނިވަން ގާނޫނީ ލަފާ ހޯދުމާއި އަދި ގާނޫނުއަސާސީގެ 95 ވަނަ މާއްދާ ގެ ދަށުން މި މައްސަލަ ސުޕްރީމް ކޯޓުގެ އިސްތިޝާރީ ލަފައަކަށް ފޮނުވުމާމެދު މަޖިލީހުން ނިންމެވުން،" ޕެޓިޝަނުގައި ބުނެފައިވެ އެވެ.
ސަރުކާރުން ބުނަނީ ރަސްމާލެ ދޫކޮށްލަނީ 99 އަހަރަށް ކަމަށެވެ. އެކަމަކު އަލައްބާރުގެ އީގަލް ހިލްސް ކުންފުނިން ބުނީ ރަސްމާލެއިން ފުރަތަމަ ލިބޭ 99 އަހަރުގެ ކުލީގެ މުއްދަތު ހަމަވުމުގެ ކުރިން އެތަން ވިއްކާލައިފި ނަމަ 99 އަހަރުގެ ކުލީގެ އާ މުއްދަތެއް ފެށޭނެ ކަމަށެވެ.
ދައުލަތުގެ ފައިސާއިން ފުށިދިއްގަރުފަޅު ހިއްކައިގެން ހަދަމުން އަންނަ ރަސްމާލޭގެ 500 ހެކްޓަރު އީގަލް ހިލްސްއަށް ވިއްކާލުމުގެ ކޮމާޝަލް ޓާމްސްގައި ސޮއި ކުރީ ސެޕްޓެމްބަރު 21، ގަ އެވެ. އެ ޕްރޮޖެކްޓުގެ ދާއިމީ އެގްރިމެންޓުގައި ސޮއި ކުރަން މަސައްކަތް ކުރަނީ ނޮވެމްބަރު 11، ގަ އެވެ. އެއީ ރާއްޖޭގެ ޖުމްހޫރީ ދުވަހެވެ.
ރަސްމާލެ ވިއްކާލަން ސަރުކާރުން ޑީލެއް ހެދީ، އެތަނުގެ ވެލިފުކެއް އެންމެ ދުވަހަކަށް ނަމަވެސް ބޭރުގެ ބަޔަކަށް ކުއްޔަށް ނުވަތަ ހިލޭ ވެސް ނުދޭން ރައީސް މުހައްމަދު މުއިއްޒު ވައުދުވެވަޑައިގެންނެވުމަށްފަހު އެވެ.
"އެތަނުން [ރަސްމާލެއިން] ހިއްކާ ކޮންމެ ބިމެއްގެ، ކޮންމެ ވެލިފުކަކީ ދިވެހި ރައްޔިތުންނަށް މިލްކުވާ ވެލިފުކެއް. އެއްވެސް ބޭރު ފަރާތަކަށް އެންމެ ދުވަހަކަށް ވެސް ކުއްޔަށް ދޭން، ނޫނީ ހިލޭ ވެސް ލިބޭނެ ބިމެއްނޫން، ދެން އެތަނުން ހިކިގެން ދާނީކީއެއް،" މުއިއްޒު ވިދާޅުވެފައިވެ އެވެ.
