އިންޑިއާގެ ޝިމްލާގައި މިހާރު ކުރިއަށްދާ ސައުތު އޭޝިއަން ޔޫތު ޓޭބަލް ޓެނިސް މުބާރާތުގެ 15 އަހަރުން ދަށުގެ އަންހެން ޓީމު އިވެންޓުން ރާއްޖޭން ތާރީހީ ރިހި މެޑަލެއް ހޯދައިފި އެވެ.
އެ ގޮތުން، 15 އަހަރުން ދަށުގެ އަންހެން ޓީމު އިވެންޓުން ރާއްޖޭން ރިހި މެޑަލް ހޯދިއިރު، ޓޭބަލް ޓެނިސް އެސޯސިއޭޝަން އޮފް މޯލްޑިވްސް (ޓީޓީއޭއެމް) އިން މައުލޫމާތު ދޭގޮތުގައި މިއީ ސައުތު އޭޝިއަން ޔޫތު ޓޭބަލް ޓެނިސް މުބާރާތުން ރާއްޖޭގެ 15 އަހަރުން ދަށުގެ ޓީމު މެޑައްޔެއް ހޯދި ފުރަތަމަ ފަހަރެވެ.
މި ފަހަރުގެ މުބާރާތުގައި، ރިހިމެޑަލް ހޯދި ޓީމުގައި ހިމެނެނީ އައިޝަތު މަލާކް ތަސީން، އައިޝަތު އަލްސާ ނާފިޒު އަދި ސާރާ މޫސާ ޖަމީލެވެ.
ރާއްޖޭން ސަރަހައްދުގެ ޔޫތު މުބާރާތުގެ އަންހެން ޓީމު އިވެންޓުގެ ދެ ވަނަ ހޯދީ ބަންގްލަދޭޝް، ނޭޕާލް އަދި ސްރީ ލަންކާ ބަލިކުރުމަށް ފަހު އެވެ. މުބާރާތުގައި ރާއްޖެ ބަލިވީ ސަރަހައްދުގެ ގަދަބާރު، އިންޑިއާއާއި ވާދަކޮށްގެންނެވެ. އިންޑިއާ އަތުން ރާއްޖެ ބަލިވީ 3-0 ންނެވެ.
މުބާރާތުގައި ރާއްޖޭން ވަނީ ބަންގްލަދޭޝް އަތުން 3-1 އިން އަދި ސްރީ ލަންކާ އާއި ނޭޕާލް އަތުން 3-2 އިން މޮޅުވެފަ އެވެ.
މާދަމާގެ ނިޔަަލަށް ކުރިއަށްދާ މި މުބާރާތަކީ، އަންނަ ޖޫން މަހު އޮމާންގެ ވެރި ރަށް، މަސްކަޓްގައި އޮންނަ އޭޝިއަން ޗެމްޕިއަންޝިޕުގެ ކޮލިފިކޭޝަނެވެ. ދެކުނު އޭޝިއާ މުބާރާތުގައި ރާއްޖޭން ވާދަކުރަނީ، 15 އަހަރުން ދަށުގެ ކެޑޭޓް ކެޓަގަރީ އާއި 19 އަހަރުން ދަށުގެ ޖޫނިއާ ކެޓަގަރީގަ އެވެ. މި ދެ ކެޓަގަރީން ވެސް އަންހެން އަދި ފިރިހެން ޓީމު ވާދަކުރާ ގޮތަށް ވަނީ ހަމަޖެހިފަ އެވެ.
ނަވާރަ އަހަރުން ދަށުގެ އަންހެން ޓީމުން ވަނީ 3-1 އިން ބަންގްލަދޭޝް ބަލިކޮށްފަ އެވެ. އެކަމަކު، ސްރީ ލަންކާ އާއި އިންޑިއާ އަތުން 3-0 އިން ވަނީ ބަލިވިއިރު، ނޭޕާލް އަތުން ބަލިވީ 3-2 އިންނެވެ.
ދެ އުމުރުފުރާގެ ފިރިހެން ޓީމު ވެސް ކުޅުނު މެޗުތަކުން ވަނީ ނާކާމިޔާބާ ކުރިމަތިލާން ޖެހިފަ އެވެ.
