އިންޑިއާގައި ބުދަ ދުވަހު ފަށާ ސައުތު އޭޝިއަން ޔޫތް ޓޭބަލް ޓެނިސް ޗެމްޕިއަންޝިޕުން މެޑަލް ހޯދުމުގެ އަމާޒުގައި ގައުމީ ޖޫނިއާ ޓީޓީ ޓީމުން މުބާރާތަށް ތައްޔާރުވެއްޖެ އެވެ.
ޝިމްލާގައި މި މަހު 8-11 އަށް ކުރިއަށްދާ މި މުބާރާތަކީ، އަންނަ ޖޫން މަހު އޮމާންގެ ވެރި ރަށް، މަސްކަޓްގައި އޮންނަ އޭޝިއަން ޗެމްޕިއަންޝިޕުގެ ކޮލިފިކޭޝަނެވެ. ދެކުނު އޭޝިއާ މުބާރާތުގައި ރާއްޖޭން ވާދަކުރަނީ، 15 އަހަރުން ދަށުގެ ކެޑޭޓް ކެޓަގަރީ އާއި 19 އަހަރުން ދަށުގެ ޖޫނިއާ ކެޓަގަރީގަ އެވެ. މި ދެ ކެޓަގަރީން ވެސް އަންހެން އަދި ފިރިހެން ޓީމު ވާދަކުރާ ގޮތަށް ވަނީ ހަމަޖެހިފަ އެވެ.
މި މުބާރާތުގައި ރާއްޖޭން ވާދަކުރާ، ފިރިހެން ޓީމުގައި ހިމެނެނީ މުހައްމަދު ހަލަފް ރާފިއު، އައްޔޫބު އިޒްކާން ސަލީމު، ފާޒް އިމްޔާޒް ލަތީފް، އަވުން އިބްރާހިމް ލަތީފް، މުހައްމަދު އާލް އިމްރާން އެވެ. އަދި، އަންހެން ޓީމުގައި ހިމެނެނީ ފާތިމަތު ދީމާ އަލީ، އައިޝަތު އަލްސާ ނާފިޒު، މިޝްކާ މުޙައްމަދު އިބްރާހިމް، ސާރާ މޫސާ ޖަމީލު އަދި އައިޝަތު މަލަކް ތާސީން އެވެ.
ޤައުމީ ޓީޓީ ޓީމުގެ ކޯޗު، އީރާނުގެ މަހްދީ ހޮޝްމަރަމް ވަނީ، އެސޯސިއޭޝަންގެ އެހީތެރިކަމާ އެކު، އީރާނުގެ ޕެއަރިން ދެ ކުޅުންތެރިންނާ އެކު ރާއްޖޭގެ ސީނިއާ ޤައުމީ ޓީމުގެ ކުޅުންތެރިންގެ ވެސް އެހީ ހޯދައިގެން މި މުބާރާތަށް ތައްޔާރުވެފަ އެވެ. ގައުމީ ޖޫނިއާ ޓީޓީ ކުޅުންތެރިން މި މުބާރާތަކުން މެޑަލަށް ޓާގެޓް ކުރާއިރު، މި ޓީމުގައި، ސީނިއާ ގައުމީ ޓީމުގެ ކުޅުންތެރިން ވެސް ހިމެނެ އެވެ.
ދެ އުމުރުފުރާއިން ރާއްޖޭގެ ޓީޓީ ޓީމުން ދެކުނު އޭޝިއާ މުބާރާތުގައި ވާދަކުރާނެ އިވެންޓްތަކަކީ، ޓީމު އިވެންޓް، މިކްސް ޑަބަލްސް، ޑަބަލްސް އަދި ސިންގަލްސް އިވެންޓްތަކުގަ އެވެ.
މި މުބާރާތުގައި ރާއްޖޭގެ ޓީމުން ވާދަކުރަނީ، ސިންގަލްސް، ޑަބަލްސް އަދި މިކްސްޑް ޑަބަލްސްގެ 4 އިވެންޓެއްގައެވެ. މި މުބާރާތަކީ އޭޝިއަން ޗެމްޕިއަންޝިޕަށް ކުޅުންތެރިން ހޮވުމަށް ބާއްވަ ކޮލިފިކޭޝަނެވެ.
