މިދިޔަ ހޮނިހިރު ދުވަހު ބޭއްވި ލޯކަލް ކައުންސިލް އަދި އަންހެނުންގެ ކޮމިޓީ (ޑަބްލިއުޑީސީ) ގެ އިންތިހާބުގައި ވޯޓު އެއްވަރުވެގެން ދެ ވަނަ ބުރު ބާއްވަން ޖެހޭ ގޮނޑިތަކުގެ އިންތިހާބު އަންނަ ހޯމަ ދުވަހު ބާއްވާނެ ކަމަށް އިލެކްޝަންސް ކޮމިޝަން (އީސީ) އިން މިއަދު އިއުލާންކޮށްފި އެވެ.
އީސީން ދެވަނަ ބުރު އޮންނާނެ ދާއިރާތަކެއް ރަސްމީކޮށް އިއުލާނެއް ނުކުރެ އެވެ. ނަމަވެސް، އެ ކޮމިޝަނުން މިހާތަނަށް ހާމަކޮށްފައިވާ ނަތީޖާތަކުން ދައްކާ ގޮތުގައި ވޯޓު އެއްވަރުވީ ފަސް ގޮނޑިއެއްގެ އެވެ. އެއީ ކައުންސިލު ދެ ގޮނޑި އާއި ޑަބްލިއުޑީސީގެ ތިން ގޮނޑި އެވެ.
ވޯޓު އެއްވަރުވީ ގޮނޑިތައް
- ބ. ދޮންފަނު ކައުންސިލްގެ އަންހެނުންނަށް ހާއްސަ ގޮނޑި: ޕީއެންސީ ކެންޑިޑޭޓު އައިޝަތު މުނާ އާއި އެމްޑީޕީ ކެންޑިޑޭޓު އާމިނަތު ރަފާހު، 113 ވޯޓު
- ފުވަމުއްލަކު ދަނޑިމަގު ދާއިރާ: ޕީއެންސީ ކެންޑިޑޭޓު އައިޝަތު އަބްދުލް ގާދިރު އާއި އަމިއްލަ ކެންޑިޑޭޓު ޝިޒާ އިބްރާހިމް، 484 ވޯޓު
- ހއ. ކެލާ ޑަބްލިއުޑީސީ ރައީސް: އެމްޑީޕީ ކެންޑިޑޭޓު މަހުދިއްޔާ އާދަމް އާއި ޕީއެންސީ ކެންޑިޑޭޓު ހައްވާ ފަޒްނާ، 587 ވޯޓު
- ހދ. ނޭކުރެންދޫ ޑަބްލިއުޑީސީ މެންބަރު: ޕީއެންސީ ކެންޑިޑޭޓު ފާތިމަތު ރިއުޒާ އާއި އަމިއްލަ ކެންޑިޑޭޓު ފާތިމަތު ނިޝާދާ، 300 ވޯޓު
- ލ. މާވަށް ޑަބްލިއުޑީސީ މެންބަރު: ޕީއެންސީ ކެންޑިޑޭޓު ފާތިމަތު ޝަފިއްޔާ އާއި އެމްޑީޕީ ކެންޑިޑޭޓު މަރިޔަމް މާއިޝާ، 564 ވޯޓު
މިދިޔަ އިންތިހާބަކީ ލޯކަލް ކައުންސިލް އިންތިހާބެއްގައި އެންމެ ގިނަ އަދަދަކަށް މީހުން ވޯޓު ލާން ނިކުތް ފަހަރެވެ. މި ފަހަރުގެ އިންތިހާބުގައި 215،346 މީހަކު ވޯޓުލާފައި ވާއިރު، މިއީ ވޯޓު ލުމުގެ ހައްގު ލިބިފައިވާ މީހުންގެ 73 ޕަސެންޓެވެ.
މި އިންތިހާބުގައި ކައުންސިލުތަކުން އެންމެ ގިނަ ގޮނޑި ކާމިޔާބުކުރީ އެމްޑީޕީންނެވެ. ޑަބްލިއުޑީސީ ގިނަ ގޮނޑިތައް ކާމިޔާބުކުރީ ޕީއެންސީންނެވެ.
