ލޯކަލް ކައުންސިލް އިންތިހާބުގައި ދ. މީދޫގައި ބެހެއްޓި ވޯޓު ފޮށްޓެއްގެ މައްސަލަ އިލެކްޝަންސް ކޮމިޝަނަށް ހުށަހެޅުމުން، އެ ވޯޓު ފޮށި އަލުން ގުނަން އެ ކޮމިޝަނުން ނިންމައިފި އެވެ.
އަދަދު އަށް އެނގިފައިވާ ގޮތުގައި ކައުންސިލް އިންތިހާބުގައި ދ. މީދޫގެ ގޮނޑިތަކަށް ވާދަކުރި އެމްޑީއޭ އަދި ޕީއެންސީން ހުށަހެޅި ޝަކުވާތަކާ ގުޅިގެން އެ ފޮށި އަލުން ގުނަން ހަމަޖެހިފައިވަނީ ހަވީރު 16:00 ޖަހާއިރު އިލެކްޝަންސް ކޮމިޝަނުގެ އިންތިހާބީ މަރުކަޒުގަ އެވެ.
ދ. މީދޫ ކައުންސިލް ރައީސްގެ މަގާމަށް ތިން ކެނޑިޑޭޓުން ވާދަކުރި އެވެ. އޭގެތެރެއިން ޕީއެންސީގެ ކެންޑިޑޭޓް ސުހާ އިބްރާހިމަށް 393 ވޯޓު ލިބިފައިވާއިރު، އެމްޑީއޭގެ ކެންޑިޑޭޓް މުހައްމަދު ޝާހިދަށް ލިބުނީ 392 ވޯޓެވެ. އަމިއްލަ ގޮތުން ވާދަކުރި އިބްރާހިމް ނަސީމަށް ލިބުނީ 100 ވޯޓެވެ.
ނަމަވެސް އެމްޑީއޭއިން އިލެކްޝަނަށް ހުށަހެޅި މައްސަލަ ބެލުމަށްފަހު އިލެކްޝަނުން ވަނީ ޕީއެންސިއަށް ދީފައިވާ ވޯޓެއް ބާތިލުކޮށްފަ އެވެ. އެއާއެކު ކައުންސިލް ރައީސަކަށް ވާދަކުރާ އެމްޑީއޭގެ ކެންޑިޑޭޓް އަދި ޕީއެންސީގެ ކެންޑިޑޭޓަށް ލިބުނު ވޯޓު މިހާރު ވަނީ އެއްވަރުވެފަ އެވެ.
އެމްޑީއޭއިން މައްސަލަ ހުށަހެޅީ ލ. ފޮނަދޫގައި ބެހެއްޓި ވޯޓު ފޮށްޓަށް ދ. މީދޫގެ ހަތަރު މީހުން ރަޖިސްޓްރީ ކޮށްފައިވާއިރު، އޭގެ ތެރެއިން ހަތަރު މީހުން ވެސް ވޯޓުލާފައިވާ ކަމަށް އޮތުމުންނެވެ. އެމްޑީއޭއިން ބުނީ އޭގެތެރެއިން އެކަކު ވޯޓުލީ ދުވަހު ހުރީ ދ. މީދޫގައި ކަމަށާއި އޭނާ ވޯޓުލާން ލ. ފޮނަދޫއަށް ނުދާ ކަމަށެވެ.
މި މައްސަލަ އިލެކްޝަންސް އިން ބެލި ބެލުމުން ލ. ފޮނަދޫގައި ބެހެއްޓި ވޯޓު ފޮށްޓަށް ރަޖިސްޓްރީކުރި ހަމައެކަނި ރ. މީދޫ މީހާއަށް އިލެކްޝަނުގެ އޮފިޝަލަށް ދ. މީދޫގެ ވޯޓު ކަރުދާސްކޮޅު ދެވިފައިވާކަން އެނގިފައިވެ އެވެ. އެ ވޯޓު އިލެކްޝަނުން ވަނީ ބާތިލުކުރަން ނިންމާފަ އެވެ.
ދ. މީދޫގެ ކައުންސިލްގެ ދެ ގޮނޑި އަދި ޑަބްލިއުޑީސީ އެއް ގޮނޑި ކަމިޔާބުކުރީ ޕީއެންސީންނެވެ. އެމްޑީއޭއިން ވަނީ ޑަބްލިއުޑީސީގެ އެއް ގޮނޑި ކާމިޔާބުކޮށްފަ އެވެ.
