ހޮނިހިރު ދުވަހު ބޭއްވި ލޯކަލް ކައުންސިލް އިންތިހާބުގައި އެންމެ ގިނަ ވޯޓާއި އެންމެ ގިނަ ގޮނޑި ވެސް އިދިކޮޅު މޯލްޑިވިއަން ޑިމޮކްރަަޓިކް ޕާޓީ (އެމްޑީޕީ) އިން ކާމިޔާބުކޮށްފި އެވެ.
އިންތިހާބުގެ ވަގުތީ ނަތީޖާ މިހާތަނަށް އިލެކްޝަންސް ކޮމިޝަނުން ހާމަކޮށްފައި ނުވެ އެވެ. ނަމަވެސް، މި ހަބަރުގެ ބޭނުމަށް އަދަދު ނޫހުން އެއްކުރި މައުލޫމާތުތަކުން ދައްކާ ގޮތުގައި އެމްޑީޕީއަށް ވަނީ 246 ކައުންސިލް ގޮނޑި ލިބިފަ އެވެ.
އެ ނަތީޖާއިން ދައްކާ ގޮތުގައި ސިޓީތަކުގެ މޭޔަރުން ހިމެނޭހެން އިންތިހާބުކުރާ 52 ގޮނޑީގެ ތެރެއިން އެމްޑީޕީން ވަނީ 46 ގޮނޑި ކާމިޔާބުކޮށްފަ އެވެ. ޕީއެންސީއަށް ލިބުނީ އެންމެ ހަ ގޮނޑި އެވެ.
އެމްޑީޕީއިން ކާމިޔާބުކުރި 246 ގޮނޑިއަށް އެ ޕާޓީއަށް 140،746 ވޯޓު ލިބިފައިވެ އެވެ. އެ ޕާޓީގެ ކެންޑިޑޭޓުން ގޮނޑި ކާމިޔާބުކުރީ އެވުރެޖު ގޮތެއްގައި 51 ޕަސެންޓުންނެވެ.
ޕީއެންސީއަށް 218 ގޮނޑި ނެގުނުއިރު އެ ޕާޓީއަށް އެ ގޮނޑިތަކަށް ލިބިފައިވަނީ 76،685 ވޯޓެވެ. ރާއްޖޭގެ އާބާދީ ކުޑަ ރަށްރަށުން ޕީއެންސީއިން ގިނަ ގޮނޑި ކާމިޔާބުކުރި އެވެ.
އަމިއްލަ ގޮތުން ވާދަކުރި ކެންޑިޑޭޓުންނަށް 81 ގޮނޑި ލިބިފައިވާ އެމްޑީއޭއަށް ލިބުނީ 10 ގޮނޑި އެވެ. ޑިމޮރެޓްސްއަށް ދެ ގޮނޑި ލިބުނުއިރު އަދާލަތު ޕާޓީ އާއި ޖުމްހޫރީ ޕާޓީއަށް ލިބުނީ އެންމެ ގޮނޑިއެކެވެ.
އިތުރު ކެންޑިޑޭޓުން ވާދަނުކުރާތީ ވޯޓު އެޅުމުގެ މާ ކުރިން ޕީއެންސީއަށް އޮތީ 28 ކައުންސިލް ގޮނޑި ޔަގީންވެފަ އެވެ. އެމްޑީޕީއަށް ލިބުނީ ވޯޓާ ނުލައި އެއް ގޮނޑި އެވެ.
ވަގުތީ ނަތީޖާއަށް ބަލައި އެ ގޮނޑިތައް އެއްކޮށްލުމުން ޕީއެންސީއަށް 246 ގޮނޑި ލިބޭއިރު އެމްޑީޕީއަށް 247 ގޮނޑި ލިބެ އެވެ.
އެހެން ނަމަވެސް، އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގައި އެންމެ ގިނަ ގޮނޑި ހޯދީ ޕީއެންސީންނެވެ.
މި ނަތީޖާއަށް ބަދަލު އައުމަކީ އެކަށީގެންވާ ކަމެކެވެ.
