ނިމިދިޔަ އިންތިހާބުތަކާއި ރިފަރެންޑަމްއިން ސަރުކާރަށް ލިބުނު ބޮޑު ނާކާމިޔާބީގެ ޒިންމާ، ވަޒީރުންނާއި ރައްޔިތުންގެ މަޖިލީހުގެ މެންބަރުންގެ ބޮލުގައި ރައީސުލްޖުމްހޫރިއްޔާ މުހައްމަދު މުއިއްޒު އަޅުއްވައިފި އެވެ.
އާދީއްތަ ދުވަހުގެ ރޭ މުލިއާގޭގައި ވަޒީރުންނާއި ސަރުކާރުގެ އިސްވެރިންނާ އެކު ބޭއްވި ބައްދަލުވުމެއްގައި، އިންތިހާބުން ބަލިވިކަމަށް މުއިއްޒު ވަނީ ފުރަތަމަ ފަހަރަށް އިއުތިރާފުވެވަޑައިގެންފައެވެ. ނަމަވެސް، އެ ބައްދަލުވުމުގައި ބައިވެރިވި ބައެއް ބޭފުޅުން މައުލޫމާތު ދެއްވި ގޮތުގައި، ރައީސް ގަބޫލު ކުރައްވަނީ މި ނާކާމިޔާބީގެ އަސްލަކީ ބައެއް ވަޒީރުންނާއި މަޖިލިސް މެންބަރުން ސަރުކާރާ ދެކޮޅަށް ސިއްރިއްޔާތުގައި ކުރެއްވި މަސައްކަތްތަކެވެ.
މި ބައްދަލުވުމުގެ ތެރެއިން ފިނޭންސް މިނިސްޓަރު މޫސާ ޒަމީރު ވަނީ، މި ނަތީޖާއަކީ ޕޮޒިޓިވްކޮށް ނަގައި، މިހާރު ހުރި މައްސަލަތައް އިސްލާހުކޮށްގެން ކުރިއަށް ދިއުމުގެ މުހިންމުކަމާ ބެހޭގޮތުން ވާހަކަ ދައްކަވައިފައެވެ. ނަމަވެސް، ރައީސް މުއިއްޒު ވަނީ ވަރަށް ބޮޑަށް ކޯފާވެ، "ތިމަންނައަށް އެހެން ގޮތަކަށް ވިސްނަދޭން މަސައްކަތް ނުކުރުމަށް" ވިދާޅުވެފަ އެވެ.
ރައްޔިތުންގެ މަޖިލީހުގައި ކުރާ މަސައްކަތްތަކުގެ ސަބަބުން ވެސް ސަރުކާރަށް "ޑެމޭޖު" ލިބޭ ކަމަށް ވިދާޅުވެ، އެމަނިކުފާނު ވަނީ އެ ބައްދަލުވުމުގައި ނުރުހުން ފާޅުކުރައްވައިފަ އެވެ.
އޭގެ އިތުރުން، މަޖިލިސް މެންބަރުންނާއި ވަޒީރުން އެދިގެން "ކޮށްނުދެއްވަނީ ކޮން ކަމެއްތޯ؟" ސުވާލު އުފައްދަވައި އެމަނިކުފާނު ވަނީ ދެން އެހެން އެކަން ނުވާނެކަމުގެ އިންޒާރު ދެއްވައި، ކެބިނެޓަށް ބަދަލު ގެންނަން ޖެހިއްޖެ ނަމަ، އެކަން ވެސް ކުރައްވާނެ ކަމަށް ވިދާޅުވެފަ އެވެ.
މިނިސްޓަރުންނާއި މެންބަރުންގެ އިހުމާލުން ބަލިވި ކަމަށް ރައީސް ވިދާޅުވިއިރު، ރައީސް އަމިއްލައަށް މާލޭގައި ހުންނަވައިގެން ކުރެއްވި ކެމްޕޭން ވެސް ވަނީ ނާކާމިޔާބުވެފަ އެވެ.
ރޯދަމަހުން ފެށިގެން މާލޭގެ ގޭގެއަށް މުއިއްޒު "ދޮރުން ދޮރަށް" ހިންގެވިއިރު، ފަސްޓް ލޭޑީ ސާޖިދާ މުހައްމަދު ރޭގަނޑު ޖަގަހަ ހަރަކާތްތަކުގައި އިސްކޮށް އުޅުއްވިއެވެ. ނަމަވެސް، މާލޭގެ މެޖޯރިޓީން ސަރުކާރަށް ބުނީ "ނޫނެކޭ" އެވެ.
އައްޑޫ ސިޓީ، ފުވައްމުލައް ސިޓީ އަދި ކުޅުދުއްފުށި ސިޓީއަށް ފަސްޓް ލޭޑީ ކުރެއްވި ދަތުރުތަކުން ވެސް ސަރުކާރަށް ތާއީދެއް ނުހޯދުނެވެ. މި ސިޓީތަކުގެ ގިނަ ގޮނޑިތައް ކާމިޔާބުކުރީ އިދިކޮޅު ފަރާތްތަކުންނެވެ.
ސަރުކާރުން އެންމެ ބޮޑު އިސްކަމެއް ދީގެން ކުރިއަށް ގެންދިޔަ ހިޔާލު ހޯދުމުގެ ވޯޓުގެ ނަތީޖާއަކީ ރައީސް މުއިއްޒަށް ލިބިވަޑައިގަތް އެންމެ ބޮޑު ހައިރާންކަމެވެ. އެ ވޯޓުގެ ވަގުތީ ނަތީޖާ ދައްކާ ގޮތުން ދެ އިންތިހާބު އެއްކޮށް ބޭއްވުމަށް މުއިއްޒު ބޭނުންވި ބަދަލު ގާނޫނުއަސާސީއަށް ގެންނަން ނުފެންނަ ކަމަށް ވޯޓުގައި ބައިވެރިވި މީހުންގެ 68 ޕަސެންޓު މީހުން ވަނީ ބުނެފަ އެވެ.
އެރޭގެ ބައްދަލުވުމުގައި މުއިއްޒު ވިދާޅުވި ގޮތަށް، ބައެއް ކުންފުނިތަކުގެ ވެރިންނާއި ސިޔާސީ އެކި މަގާމުތަކުގައި ތިއްބެވި ބޭފުޅުން އެ މަގާމުތަކުން ވަކިކުރުމުގެ މަސައްކަތް މިހާރު ވަނީ ފަށައިފަ އެވެ.
އެގޮތުން. މިހައިތަނަށް ފެނަކަ ކޯޕަރޭޝަންގެ މެނޭޖިން ޑިރެކްޓަރު، މުހައްމަދު ނަޖާހު އާއި އެ ކުންފުނީގެ އިސް ބައެއް ވެރިންގެ އިތުރުން އެމްޕީއެލްގެ ސީއީއޯ، މުހައްމަދު ރިޝްވާންގެ އިތުރުން، އެމްޑަބްލިއުއެސްސީގެ ޑީއެމްޑީ، އިބްރާހިމް ޝާހިދު އަދި، ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ގެ ޑީއެމްޑީ، މުހައްމަދު އަސްބާހު އަލީ ނަސީރު ވަނީ މަގާމުން ވަކިކޮށްފަ އެވެ.
އޭގެ އިތުރުން، ޔޫއޭއީގައި ހުންނަވާ ދިވެހި ސަފީރު، މުހައްމަދު ހުސައިން ޝަރީފު (މުންދު) އާއި ޖެނީވާގައި ހުންނަވާ ދާއިމީ މަންދޫބު، ޑރ. ސަލްމާ ރަޝީދު ވެސް ވަނީ މަގާމުން ވަކިކޮށްފަ އެވެ.
ސިޔާސީ މުވައްޒަފުން މަދުކުރަން ފަށަނީ؛ ޕާފޯމަންސް ރިޕޯޓްތައް ފޮނުވަން އަންގައިފި
އިންތިހާބުގައި ސަރުކާރަށް ކުރިމަތިވި ނާކާމިޔާބީއާއި އިގުތިސާދީ ގޮންޖެހުންތަކާ ގުޅިގެން، ސިޔާސީ މަގާމުތަކުގައި ތިއްބެވި ގިނަ އަދަދެއްގެ މުވައްޒަފުން ވަކިކުރުމުގެ މަސައްކަތް އަންނަ ހަފުތާގައި ފަށާނެ ކަމަށް މައުލޫމާތު ލިބޭ. މަގާމުތަކުގައި ތިއްބެވި ފަރާތްތަކުގެ ޕާފޯމަންސް ރިޕޯޓްތައް ފޮނުވަން އޮފީސްތަކަށް ވަނީ އަންގާފައި
މި ވަގުތު އުމްރާގެ އަޅުކަމަށް، ސައޫދީއަރަބިއްޔާގައި ހުންނެވި، ރައީސުލްޖުމްހޫރިއްޔާ މުހައްމަދު މުއިއްޒު އެނބުރި ރާއްޖެ ވަޑައިގަތުމަށްފަހު، އަދި އިތުރު މުވައްޒަފުން ވަޒީފާއިން ވަކިކުރައްވާނެ ކަމަށް މުއުތަބަރު ފަރާތްތަކުން މި ނޫހަށް ވަނީ މައުލޫމާތު ދީފަ އެވެ. އޭގެ ތެރޭގައި ސިޔާސީ މަގާމުތަކުގައި ތިބި މުވައްޒަފުން ހިމެނެ އެވެ.
