މެދުއިރުމަތީގައި މިހާރު ކުރިއަށްދާ ހަނގުރާމައިގެ ސަބަބުން ރާއްޖޭގެ އިގްތިސާދު ކުރިއަރަމުން އަންނަ މިންވަރު މަޑުޖެހި، މި އަހަރުގެ ތެރޭގައި އިގްތިސާދު ކުރިއަރާނީ އެންމެ ޕަސެންޓަކުން ކަމަށް އޭޝިއަން ޑިވެލޮޕްމަންޓް ބޭންކުން ލަފާކޮށްފި އެވެ.
މިދިޔަ އަހަރު ރާއްޖޭގެ އިގްތިސާދަށް ވަނީ 5.4 ޕަސެންޓުގެ ކުރިއެރުމެއް ލިބިފަ އެވެ. އެކަމަކު މި އަހަރު އިގްތިސާދު ކުރިއަރާނީ އެންމެ ޕަސެންޓަކުން ކަމަށް އޭޑީބީ އިން ލަފާ ކުރެ އެވެ. އަދި އަންނަ އަހަރު ގާތްގަނޑަކަށް ތިން ޕަސެންޓުގެ ކުރިއެރުމެއް އިގްތިސާދަށް ލިބޭނެ ކަމަށް ވެސް އޭޑީބީ އިން ލަފާ ކުރެ އެވެ.
"ރާއްޖެއިން ވަނީ އޭޕްރީލް 2، ގައި ސުކޫކު އަނބުރާ ދައްކައިފަ. ނަމަވެސް ރާއްޖެއަށް އަދިވެސް ގޮންޖެހުންތައް އެބަހުރި. ފަތުރުވެރިކަން ދަށްވުމާއި ތެލުގެ އަގު ބޮޑުވުމުން ދައުލަތުގެ ބަޖެޓަށް އޭގެ ޕްރެޝަރު އަންނާނެ. ފިސްކަލް ރިފޯމްތައް މި ދަނޑިވަޅު ގެނައުން މުހިންމީ އެހެންވެ،" އޭޑީބީގެ ސީނިއާ އިކޮނޮމިސްޓް ޖޫލްސް ހިއުގޮޓް ވިދާޅުވި އެވެ.
އޭޑީބީ އިން މިއަދު ނެރުނު ރިޕޯޓެއްގައި ބުނެފައި ވަނީ ރާއްޖޭގެ އިގްތިސާދު ކުރިއަރާ މިންވަރު މަޑުޖެހޭނެ ކަމަށް ލަފާ ކުރެވޭ މައިގަނޑު ސަބަބަކީ ހަނގުރާމައާ ގުޅިގެން ފަތުރުވެރިކަން ދަށްވުމާއި ތެލުގެ އަގު ބޮޑުވުމެވެ.
މެދުއިރުމަތީގެ ހަނގުރާމަ ފެބްރުއަރީ 28، ފައި ފެށުނު އިރު ލޯކަލް ކައުންސިލްތަކުގެ އިންތިހާބު ބާއްވަން އޮތީ ކުޑަތަންވެފަ އެވެ. ހަނގުރާމަ ފެށުމުން ހަރަދު ކުޑަ ކުރުމުގެ ބަދަލުގައި، ސަރުކާރުން ވަނީ އަލަށް އެތައް ހާސް ވަޒީފާއެއް އުފައްދައި، ކެމްޕެއިނަށް ބޮޑު ހަރަދެއް ކޮށްފަ އެވެ.
ހަނގުރާމަ ނިމުމާއެކު ސަރުކާރުން ވަނީ ހަރަދު ކުޑަކުރުމުގެ ފިޔަވަޅުތައް އަޅަން ފަށައިފަ އެވެ. އޭގެ ތެރޭގައި މުވައްޒަފުން ކެނޑުމާއި އިތުރު ވަގުތު މަދު ކުރުމާއި އޮފީހަށް ނުކުންނަންޖެހޭ ވަގުތު މަދުކުރުން ހިމެނެ އެވެ.
