ދ. މީދޫ ކައުންސިލްގެ ރައީސް ކަމަށް ވާދަ ކުރި ދެ ކެންޑިޑޭޓަކު އެއްވަރުވުމުން އަލުން ވޯޓު ގުނަމުން ދަނިކޮށް، ވެރިކަން ކުރާ ޕީޕަލްސް ނެޝަނަލް ކޮންގްރެސްގެ ކެންޑިޑޭޓުގެ ވޯޓެއް ބާތިލް ކުރި މައްސަލަ ހޫނުވެ ވޯޓު ގުނުން މެދުކަނޑާލައިފި އެވެ.
މީދޫ ކައުންސިލްގެ ރައީސްގެ މަގާމަށް ވާދަކުރި ޕީއެންސީގެ ސުހާ އިބްރާހިމް އާއި މޯލްޑިވްސް ޑިވެލޮޕްމަންޓް އެލަޔަންސްގެ މުހައްމަދު ޝާހިދަށް ލިބުނީ 392 ވޯޓެވެ. ދާއިރާގެ ވޯޓު ފޮށްޓެއް އަލުން ގުނަން ޕީއެންސީގެ އިތުރުން، އެމްޑީއޭ އިން ވެސް އެދުނެވެ.
މައްސަލަ ޖެހުނު ފޮށި މިއަދު މާލޭގައި ގުނަނިކޮށް މައްސަލަ ޖެހެން މެދުވެރިވީ، ޕީއެންސީގެ ކެންޑިޑޭޓަށް ލިބިފައިވާ ވޯޓެއް ބާތިލު ކުރުމުން ކަމަށް އެތަނުގައި ތިބި މި ނޫހުގެ ނޫސްވެރިން ބުނެ އެވެ.
"ވޯޓު ގުނުން ކުރިއަށްގެންދެވޭނެ މާހައުލެއް މިތަނަކު ނެތް. އަޑުގަދަކޮށް، ހަޅޭއްލަވާ މީހުން ތަނުން ބޭރު ކުރެވޭތޯ ފުލުހުން ދަނީ މިހާރު މަސައްކަތް ކުރަމުން،" ނޫސްވެރިޔާ ބުންޏެވެ.
މިދިޔަ ހޮނިހިރު ދުވަހު ބޭއްވި ލޯކަލް ކައުންސިލްތަކުގެ އިންތިހާބުގައި ގިނަ ގޮނޑި ކާމިޔާބު ކުރީ އިދިކޮޅު މޯލްޑިވިއަން ޑިމޮކްރެޓިކް ޕާޓީ އިންނެވެ. އެ ޕާޓީ އިން 238 ގޮނޑި ގެންދިޔަ އެވެ. ޕީއެންސީއަށް ލިބުނީ 216 ގޮނޑި އެވެ.
ގިނަ ކައުންސިލްތަކުގެ ރައީސްގެ މަގާމަށް ވެސް އައީ އެމްޑީޕީގެ ކެންޑިޑޭޓުންނެވެ. އަދި ރާއްޖޭގެ ފަސް ސިޓީގެ މޭޔަރުގެ މަގާމާއި ސިޓީ ކައުންސިލްތަކުގެ މެޖޯރިޓީ ވެސް ލިބުނީ އެމްޑީޕީއަށެވެ.
އޭގެ އިތުރުން، ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށްލަން ފެނޭތޯ ނެގި ވޯޓުގައި ވެސް ސަރުކާރުން ވަނީ ބަލިވެފަ އެވެ. ވޯޓު ދިން މީހުންގެ ތެރެއިން 68 ޕަސެންޓު މީހުން ބުނެފައި ވަނީ ދެ އިންތިހާބު އެއްކުރަން ނުފެންނަ ކަމަށެވެ.
