މޯލްޑިވިއަން ޑިމޮކްރެޓިކް ޕާޓީއަށް ކުރިއަށް އޮތް ރިޔާސީ އިންތިހާބު ކާމިޔާބު ކުރެވޭނީ އާންމު މެންބަރުންގެ މަސްލަހަތު އިސްކުރާ މީހަކު އެ ޕާޓީގެ ހުންގާނާ ހަވާލުވެގެން ކަމަށް ޕާޓީގެ ޗެއާޕާސަންގެ މަގާމަށް ވާދަ ކުރައްވާނެކަން އިއުލާނު ކުރައްވާފައިވާ ގަލޮޅު ދެކުނު ދާއިރާގެ މަޖިލިސް މެންބަރު، މީކާއިލް އަހުމަދު ނަސީމް ވިދާޅުވެއްޖެ އެވެ.
ސޯޝަލްމީޑިއާގައި މިއަދު އާންމު ކުރެއްވި ވީޑީއޯއެއްގައި މީކާއިލް ވިދާޅުވީ 2028 ގައި އޮންނަ ރިޔާސީ އިންތިހާބު ކާމިޔާބު ކުރުމަށްޓަކައި ގެއްލިފައިވާ އިތުބާރު، އެމްޑީޕީން އަނބުރާ ހޯދަންޖެހޭ ކަމަށެވެ.
"އެކަން ކުރެވޭނީ ވަކިވަކި ލީޑަރުންނާއި ވަކިވަކި ފަރުދުންގެ މަސްލަހަތަށްވުރެ ޕާޓީގެ އާންމު މެންބަރުންގެ މަސްލަހަތު އިސްކޮށްދޭނެ ފަރާތެއް ޕާޓީގެ ހުންގާނާ ހަވާލުވެގެން،" މީކާއީލް ވިދާޅުވި އެވެ.
މީކާއިލްއަކީ އެމްޑީޕީގެ ހުސްވެފައިވާ ޗެއާޕާސަންގެ މަގާމަށް ކުރިމަތިލައްވާނެކަން އިއުލާނު ކުރައްވާފައިވާ އެކަކެވެ. އެ މަގާމަށް ވާދަކުރައްވާނެކަން މީކާއިލް އިއުލާނުކުރެއްވީ މިދިޔަ ނޮވެމްބަރު މަހު އެވެ.
އެމްޑީޕީގެ ޗެއާޕާސަންގެ މަގާމު ހުސްވީ އެ މަގާމު ފުރުއްވަމުން ގެންދެވި ކުރީގެ އިގްތިސާދީ މިނިސްޓަރު ފައްޔާޒް އިސްމާއިލް އެ މަގާމުން އިސްތިއުފާ ދެއްވުމުންނެވެ. ފައްޔާޒް މަގާމުން އިސްތިއުފާ ދެއްވީ ގައުމީ މަޖިލީހުގެ ބައްދަލުވުމެއްގެ ތެރެއިންނެވެ.
ރައްޔިތުންގެ މަޖިލީހަށް ދެވަނަ ދައުރަކަށް 2024 ގައި އިންތިހާބުވި އެމްޑީޕީއަށް ނިސްބަތްވާ ހަތަރު މެންބަރުންގެ ތެރެއިން މީކާއިލްއަކީ އެކަކެވެ. މީގެ އެއް އަހަރު ކުރިން އޮތް މަޖިލިސް އިންތިހާބުގައި ގަލޮޅު ދެކުނު ދާއިރާގެ ގޮނޑި މީކާއިލް ދިފާއުކުރެއްވި އެވެ.
މީކާއިލް އެމްޑީޕިއާ ގުޅުނީ 2012 ވަނަ އަހަރު ކުރީގެ ރައީސް މުހައްމަދު ނަޝީދު ހިންގެވި އެމްޑީޕީގެ ފުރަތަމަ ސަރުކާރު ބަގާވާތަކުން ވައްޓާލުމާ ގުޅިގެންނެވެ. އެ ޕާޓީގެ ޒުވާނުންގެ ހިތްވަރުގެ ރައީސްކަން ވެސް މީކާއިލް ކުރެއްވި އެވެ. އަދި މިވަގުތު ވެސް އޭނާއަކީ އެ ޕާޓީގެ ގައުމީ މަޖިލީހުގެ މެންބަރެކެވެ.
އެމްޑީޕީގެ އަސާސީ ގަވާއިދުގައިވާ ގޮތުން ޗެއާޕާސަން އަކީ ޕާޓީގެ އެތެރޭގެ ކަންކަން ރާވާ އިންތިޒާމުކޮށް ބަލަހައްޓާ އެންމެ އިސް ފަރާތެވެ. ޗެއާޕާސަންގެ ދައުރަކީ ފަސް އަހަރު ދުވަހު އެވެ. ފައްޔާޒު ވަނީ އެ މަގާމުގައި ތިން އަހަރާއި ހަ މަސްދުވަސް ހޭދަކުރައްވާފަ އެވެ.
އެ މަގާމު ހުސްވުމާއެކު، ވަގުތީގޮތުން އެ މަސްއޫލިއްޔަތު އުފުއްލަވަމުން ގެންދަވަނީ، ހަނިމާދޫ ދާއިރާގެ މަޖިލިސް މެންބަރު، އަބްދުލްޣަފޫރު މޫސާ އެވެ. ނަމަވެސް، އެ މަގާމުގައި ހުންނަވައި، މި ފާއިތުވި ދެ ދުވަހެއްގެ ތެރޭގައި އޭނާ ނިންމެވި ނިންމެވުންތަކާމެދު ޕާޓީގެ އެތެރޭގައި ވަނީ ނުތަނަވަސްކަން އުފެދިފަ އެވެ.
އެ ހިތްހަމަނުޖެހުންތަކުގެ ތެރެއިން، ވަގުތީ ޗެއާޕާސަންގެ މަގާމުން ޣަފޫރު ވަކިކުރުމަށް، އޭނާގެ އިތުބާރު ނެތްކަމުގެ ވޯޓެއް ނެގުމަށް އެމްޑީޕީގެ ގައުމީ މަޖިލީހުގެ މެންބަރުންތަކެއް ދަނީ ސޮއި ހަމަކުރަމުންނެވެ.
އެ މަސައްކަތް ކުރަމުން ދަނީ ކުރީގެ ޗެއާޕާސަން، ފައްޔާޒް އިސްމާއިލް އާއި ކުރީގެ ރައީސް، މުހައްމަދު ނަޝީދުއަށް ތާއީދު ކުރާ ފެކްޝަނުންނެވެ. މައުލޫމާތު ލިބިފައިވާ ގޮތުގައި ޣަފޫރުގެ އިތުބާރު ނެތްކަމުގެ މައްސަލަ މިއަދުގެ ވަގުތެއްގައި ހުށަހަޅާނެ އެވެ.
ޗެއާޕާސަންގެ މަސްއޫލިއްޔަތުތަކުގެ ތެރޭގައި ޕާޓީގެ ފަރާތުން ސަރުކާރާއި އެހެނިހެން ސިޔާސީ ފަރާތްތަކާއި މުއާމަލާތް ކުރުމާއި، އެތެރޭގެ އިންތިހާބުތައް ރާވާ އިންތިޒާމު ކުރުމާއި، ކޮންގުރެސް އާއި ގައުމީ މަޖިލީހާއި ގައުމީ ހިންގާ ކޮމިޓީގެ ރިޔާސަތު ބެލެހެއްޓުމާއި، ޕާޓީގެ އިދާރީ ކަންކަމުގެ މަސްއޫލިއްޔަތު އުފުލުން ހިމެނެ އެވެ.
