އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ވަގުތީ ޗެއާޕާސަން އަބްދުލްޣަފޫރު މޫސާގެ އިތުބާރު ނެތްކަމުގެ މައްސަލައެއް އެ ޕާޓީގެ ގައުމީ މަޖިލީހަށް ވެއްދުމަށްޓަކައި ސޮއި ހޯދަން ފަށައިފި އެވެ.
ޣަފޫރުގެ އިތުބާރު ނެތްކަމުގެ މައްސަލައެއް ވައްދަން މި މަސައްކަތް ކުރަނީ ކުރީގެ ރައީސް މުހައްމަދު ނަޝީދާއި ޕާޓީގެ ކުރީގެ ޗެއާޕާސަން ފައްޔާޒް އިސްމާއިލް ލީޑު ކުރައްވާ ފެކްޝަނުންނެވެ.
އަދަދު އަށް އެނގިފައިވާ ގޮތުގައި ގައުމީ މަޖިލީހުގެ ޖަލްސާއެއް ބާއްވަން ހުށަހަޅާ ހުށަހެޅުމަށް މިހާރު 51 ސޮއި ވަނީ ލިބިފަ އެވެ. ޣަފޫރުގެ އިތުބާރު ނެތްކަމުގެ މައްސަލަ ވައްދަން ވެސް ފުދޭވަރަކަށް ސޮއި ލިބިފައިވާކަން އެނގިފައިވެ އެވެ.
ޣަފޫރުގެ އިތުބާރު ނެތްކަމުގެ މައްސަލައެއް ގައުމީ މަޖިލީހަށް ވައްދަން މި މަސައްކަތް ކުރަނީ، ހޮނިހިރު ދުވަހު ބޭއްވި ލޯކަލް ކައުންސިލްތަކުގެ އިންތިހާބާއި ފެންނަ ނުފެންނަ ވޯޓުން ލިބުނު ކާމިޔާބީ ފާހަގަ ކުރަން ބޭއްވި ޖަލްސާގައި ވާހަކަ ދެއްކެވުމުގެ ފުރުސަތު ނަޝީދަށް ނުދޭން ނިންމުމުންނެވެ.
ޖަލްސާގައި ވާހަކަ ދެއްކެވުމުގެ ފުރުސަތު ނަޝީދަށް ނުދޭން ނިންމުމުން މަސްލަހު ގެއްލި، އެތެރޭގެ ސިޔާސީ ކޯޅުން އާންމުންނާ ހަމައަސް ތިލަވި އެވެ. އަދި އެއް ފެކްޝަނުން އަނެއް ފެކްޝަނުގެ މައްޗަށް ބޮޑެތި ތުހުމަތުތަކެއް އަމާޒުކުރަމުންދިޔަ އެވެ.
ނަޝީދާއި ފައްޔާޒުގެ ފެކްޝަނުގެ އިތުރުން މައިގަނޑު ފެކްޝަނަކަށް ދެން އުޅެނީ ކުރީގެ ރައީސް އިބްރާހިމް މުހައްމަދު ސޯލިހުގެ ފެކްޝަނާއި ޕާޓީގެ ރައީސް އަބްދުﷲ ޝާހިދުގެ ފެކްޝަނެވެ.
އޭގެ އިތުރުން މަޖިލިސް މެންބަރު އަހުމަދު ޝަމްހީދުގެ ފެކްޝަނަކާއި ކުރީގެ ނައިބު ރައީސް ފައިސަލް ނަސީމުގެ ފެކްޝަނެއް ވެސް އެމްޑީޕީގައި މިވަގުތު ހަރަކާތްތެރިވެ އެވެ.
