ރައްޔިތުންގެ މަޖިލީހުގެ ޖަލްސާއެއް ނުބާއްވާތާ މަސްދުވަސް ފާއިތުވެއްޖެ އެވެ.
ރައްޔިތުންގެ މަޖިލީހުގެ ޖަލްސާއެއް އެންމެފަހުން ބޭއްވީ މާޗު 8، ގަ އެވެ. އެއީ މި އަހަރުގެ މިހައިތަނަށް ބޭއްވި ފަސްވަނަ ޖަލްސާ އެވެ. އޭގެ ތެރެއިން އެއް ޖަލްސާއަކީ މަޖިލިސް ހުޅުވި ދުވަހު، ރިޔާސީ ބަޔާން އިއްވުމަށް ބޭއްވި ޖަލްސާ އެވެ.
މަޖިލީހުގެ ގަވާއިދުގެ 47 ވަނަ މާއްދާގައި ބަޔާން ކޮށްފައި އޮންނަނީ ހާއްސަ ހާލަތެއް ދިމާވެގެން ނުވަތަ، މަޖިލީހުން އެހެން ގޮތެއް ކަނޑަނާޅާހައި ހިނދަކު، މަޖިލީހުގެ ދައުރުގެ ތެރޭގައި ހިނގާ އާންމު ޖަލްސާތައް ހަފުތާއަކު މަދުވެގެން ތިން ދުވަހު ބާއްވަންވާނެ ކަމަށެވެ.
މި އަހަރުގެ ފުރަތަމަ ދައުރުގެ ފުރަތަމަ ޖަލްސާ ބޭއްވީ ފެބްރުއަރީ 5، ގަ އެވެ. އޭގެ ފަހުން މިއަދާ ހަމައަށް، ބަންދު ދުވަސްތައް ނުހިމަނައި ހަފުތާއަކު ތިން ޖަލްސާގެ މަގުން 20 ޖަލްސާ ބާއްވަން ޖެހެ އެވެ.
މިހައިތަނަށް އެންމެ ފަސް ޖަލްސާ ބާއްވާފައިވާއިރު، މި އަހަރުގެ ފުރަތަމަ ދައުރު އަންނަ މެއި މަހުގެ 15 ވަނަ ދުވަހު ނިމޭނެ އެވެ. އެއަށްފަހު މަޖިލިސް މެންބަރުން އަނެއްކާވެސް އެއް މަސްދުވަހުގެ ޗުއްޓީއަކަށެވެ.
މެދުއިރުމަތީގައި ކުރަމުންދިޔަ ހަނގުރާމައާ ގުޅިގެން ދުނިޔޭގެ އިގުތިސާދަށް ކުރިމަތިވި ހީނަރުކަމުގެ އަސަރު، ދިވެހިރާއްޖެއަށް އެކި ގޮތްގޮތުން ކުރަމުންދިޔައިރު، ވެސް މަޖިލީހުގެ ޖަލްސާތައް ނުބާއްވައި ވެރިކަންކުރާ ޕީއެންސީގެ މަޖިލިސް މެންބަރުން އުޅުއްވީ ކެމްޕޭނުގައި ކަމަށް އިދިކޮޅު އެމްޑީޕިން އޭރު ބުނަމުންދިޔަ އެވެ.
އެކަމާ ބެހޭގޮތުން އެމްޑީޕީގެ ޑެޕިއުޓީ ޕީޖީ ލީޑަރު، ހުސައިން ޒިޔާދު (ފިއްޓޭ) ވިދާޅުވީ މަޖިލީހުގެ ޖަލްސާއެއް މިދިޔަ މުއްދަތުގައި ނުބޭއްވީ އިންތިހާބުގެ ނަތީޖާއަށް އަސަރުކޮށްފާނެތީ ކަމަށެވެ.
"މަޖިލީހުގެ ޖަލްސާއެއް ނުބާއްވަނީ ރިފަރެންޑަމް ވޯޓު އޮތީމާ، އޭގެ ދިފާއުގައި ދެއްކޭނެ ވާހަކައެއް ނެތީމާ، މަޖިލިސް ބޭއްވީމާ، މެންބަރުން ދައްކަން ޖެހެނީ ސަރުކާރު މޮޅުކޮށްފައި ވާހަކަ، އެކަމަކު ރަށަށް ދިޔައީމާ މީހުން އެއްޗެހި ގޮވަނީ، އެހެންވެގެން މަޖިލީހުގެ ޖަލްސާއެއް ނުބާއްވާ އެ ތިބީ، އެކަމަކު ދެން މިހާރު އިންތިހާބު ނިމުނީތާ، އެހެންވީމާ އަންނަ ހަފުތާގައި މަޖިލިސް އޮންނާނެ،" ފިއްޓޭ ވިދާޅުވި އެވެ.
އޭނާ ވިދާޅުވީ މަޖިލީހުގައި ކުރާނެ މަސައްކަތް ނެތް ކަމަށާއި ހަމައެކަނި ކުރާން އޮތް މަސައްކަތަކީ ނޮން ރެޒިޑެންޓް ސަފީރުން އައްޔަނުކުރުމުގެ މަސައްކަތް ކަމަށެވެ.
މިދިޔަ އަހަރު ތެރޭގައި ވެސް ޕީއެންސީގެ މެޖޯރިޓީ އޮތް މަޖިލީހުގެ ޖަލްސާތައް ކުރިއަށް ނުގެންދާ މައްސަލައިގައި އިދިކޮޅު ފަރާތްތަކުން ހިތްހަމަނުޖެހުން ފާޅުކުރަމުންދިޔަ އެވެ. އެހެންނަމަވެސް، ޕީއެންސީން ބުނަމުންދިޔައީ އެ ޕާޓީން ސަރުކާރު ޖަވާބުދާރީ ކުރުވަމުންދާ ކަމަށެވެ.
