ފީފާ ރެޖިސްޓާޑް އެކުވެރިކަމުގެ ދެ ވަަނަ މެޗުގައި މިއަދު ފަހު ވަގުުތު ލަނޑު ޖަހައި، ބަންގްލަދޭޝް އިން 2-1 އިން ރާއްޖެ އަތުން މޮޅުވެއްޖެ އެވެ.
މިއީ، މިދިޔަ އަހަރެއްހާ ދުވަސްތެރޭ ރާއްޖޭން ބައިނަލްއަގުވާމީ ފުޓްބޯޅައިގައި ކުޅުނު ދެ ވަނަ މެޗެެވެ.
މީގެ ތިން ދުވަސް ކުރިން ރާއްޖޭން ބަންގްލަދޭޝް އަތުން 1-0 އިން މޮޅުވި މެޗަށް ރާއްޖޭން ނެރުނު ފުރަތަމަ އެގާރަ އަށް މިއަދު ވަނީ ބަދަލެއް ގެނެސްފަ އެވެ. އެ ގޮތުން، ހަމްޒާ މުހައްމަދު (ހަމްޕު)ގެ ބަދަލުގައި އަހުމަދު ރިޒްވާން (ރިޒޭ) ވަނީ ކުޅެން ނުކުމެފަ އެވެ.
ބަންގްލަދޭޝަށް ބަލާއިރު، އެ ޓީމުން މިއަދުގެ މެޗަށް ނެރުނު ފުރަތަމަ އެގާރަ އަށް ތިން ބަދަލެއް ވަނީ ގެނެސްފަ އެވެ.
ބަޝުންދަރާ ކިންގްސް އެރީނާގައި މިއަދު ކުޅުނު މެޗުގައި ފުރަތަމަ މެޗެކޭ އެއްގޮތަށް ރާއްޖެ އަށް ލީޑުނަަގައިދިނީ އަލީ ފާސިރު (ސެންޓޭ) އެވެ. ސެންޓޭ ލަނޑު ޖެހީ މެޗުގެ 23 ވަަނަ މިނިޓްގައި އިބްރާހިމް މަހުދީ (ފޭދޫ އިއްބެ) ދިން ބޯޅައަކުންނެވެ. ބަންގްލަދޭޝްގެ ފަހަތަށް ކުޅޭ ޓޯޕޫ ބަރްމަން ހެދި ގޯހެއްގެ ފައިދާނަގައި، ފޭދޫ އިއްބެ އޭރިއާތެރެއިން ސެންޓޭ އަށް ދިން ބޯޅަ އޭނާ ވަނީ ތިރިތިރިން ގޯލަށް ފޮނުވާލައިފަ އެވެ.
ނަތީޖާ ހަމަަހަމަކޮށްދޭން ބަންގްލަދޭޝްގެ ރަކީބް ހުސެއިން އޭރިއާބޭރުން ޖެހި ބޯޅައެއް ބޭރަށް ދިޔައިރު، އޭރިއާތެރެއަށް އޭނާ ނަގައިދިން ހުރަހެއްގައި އަހުމަދު ފަހީމް ފޮނުވާލި ބޯޅަ ރާއްޖޭގެ ކީޕަރު ހުސެން ޝަރީފް ވަނީ މަތަކޮށްފަ އެވެ. އޭގެ ރީބައުންސް އޭރިއާތެރެއިން ލިބުމުން، ޝެއިހް މޮރްސަލީން ޖެހި ޝޮޓް ދިޔައީ ހުރަސް ދަނޑިމަތިންނެވެ.
މިއަދުގެ މެޗަށް ބަންގްލަދޭޝް އިން ނެރުނު ފުރަތަމަ އެގާރަ ކުޅުންތެރިން.
ބަންގްލަދޭޝް އިން ފުރަތަމަ ހާފު ނިމުމުގެ ކުރިން އެއްވަރުކުރި އެވެ. އެ ޓީމުގެ ލަނޑު ޖެހީ، 43 ވަަނަ މިނިޓްގައި މުޖީބުއްރަހުމާން ޖޯނީ އެވެ. ކުރިން މެޗުގައި ބަދަލަކަށް އަރައި ރަނގަޅު ކުޅުމެއް ދެއްކި، ޖޯނީ މި ލަނޑު ޖެހީ އޭރިއާ ރޮނގުމަތިން ގޯލުގެ ދުރު ކަނަށް ބޯޅަ ފޮނުވާލައިގެންނެވެ. މިއީ، ގައުމީ ޖޯޒީގައި އޭނާގެ ދެ ވަނަ ގޯލެވެ.
ދެ ވަނަ ހާފްގެ ކުޅުން ފަށައިގެން ދެ ވަނަ މިނިޓްގައި ބަންގްލަދޭޝްގެ ރަކީބް އޭރިއާބޭރުން ޖެހި ބޯޅަ ކީޕަރު ހުސެން ވަނީ މަތަކޮށްފަ އެވެ. އޭގެ ފަސް މިނިޓް ފަހުން، ރާއްޖެ އަށް އަލުން ލީޑުނަގަން ހުސް ފުރުސަތެއް ލިބުނެވެ. ނާއިޒު ހަސަން (ދާދު) ނަގައިދިން ހުރަަހަކަށް އޭރިއާތެރެއިން ހުސްކޮށް އަރައި، ރިޒޭ ބޮލުން ފޮނުވާލި ބޯޅަ ބަންގްލަދޭޝް ކީޕަރު މިތުލް މަރްމާ ވަނީ މަތަކޮށްފަ އެވެ. އޭގެ އިރުކޮޅެއް ފަހުން، ފޭދޫ އިއްބެ ނަގައިދިން ބޯޅައަކަށް އަރައި، ސެންޓޭ ޖެހި ޝޮޓް ދިޔައީ ހުރަސްދަނޑިމަތިންނެވެ.
ލީޑުނަގަން ބަންގްލަދޭޝް އަށް މެޗުގެ 84 ވަަނަ މިނިޓްގައި ރަނުގެ ފުރުސަތެއް ލިބުނެވެ. ބަންގްލަދޭޝްގެ ޝަަހަރިއާރް އިމޯން އޭރިއާބޭރުން ޖެހި ބޯޅަ ކީޕަރު ހުސެން އަތުގައި ޖެހިފައި ރީބައުންސަށް ނުކުތް ވަގުތު ޕިއާޝް އަހުމަދު ނޯވާ ޖެހި ބޯޅަ ގޯލާ ސީދާނުވި އެވެ.
ބަންގްލަދޭޝް މޮޅުވި ގޯލު ޖެހީ މެޗުގެ އިތުރު ވަގުތުގެ ގޮތުގައި ދެއްކި ހަތް މިނިޓްގެ ތެރެއިން ތިން ވަނަ މިނިޓްގަ އެވެ. އޭރިއާތެރެއަށް ހުރަސްކޮށްލި ބޯޅައަކަށް ހުސްކޮށް އަރައި މި ލަނޑު ޖެހީ ބަދަލަަކަށް ކުޅެން އެރި، މިޑްފީލްޑަރު، ޕަޕޯން ސިންގް އެވެ.
މިއީ، ބައިނަލްއަގުވާމީ ފުޓްބޯޅައިގައި ބަންގްލަދޭޝް އިން ރާއްޖެ އަތުން ހޯދި ނުވަ ވަނަ މޮޅެވެ. ރާއްޖޭން ހަތް މެޗު ކާމިޔާބުކުރިއިރު، ހަތަރު މެޗު ނިމުނީ އެއްވަރުވެގެންނެވެ.
