ފީފާ ރެޖިސްޓާޑް އެކުވެރިކަމުގެ ފުރަތަމަ މެޗުގައި މީގެ ތިން ދުވަސް ކުރިން، ރާއްޖެ އަތުން 1-0 އިން ބަލިވި މެޗުގައި ބަންގްލަދޭޝް އަށް ލަނޑެއް ނުޖެހުމުގައި ދިމާވި މައްސަލަ އަށް ދެ ވަނަ މެޗުގައި ހައްލެއް ހޯދަން ބޭނުންވާ ކަމަށް އެ ޓީމުގެ ކޯޗު ހަވިއޭ ކަބްރޭރާ ބުނެފި އެވެ.
މީގެ ތިން ދުވަސް ކުރިން، ބަޝުންދަރާ ކިންގްސް އެރީނާގައި ކުޅުނު މެޗުން ރާއްޖެ ވަނީ ބަންގްލަދޭޝް އަތުން 1-0 އިން މޮޅުވެފަ އެވެ. މިއީ، މި ދެ ގައުމުގެ ފުޓްބޯޅަ ތާރީހުގައި ވެސް ބަންގްލަދޭޝް އިން އަމިއްލަ ދަނޑުގައި ކުޅުނު މެޗަކުން ރާއްޖެ އަތުން ބަލިވި ފުރަތަމަ ފަހަރެވެ.
"ވަރަށް ދަށް ނަތީޖާއެއް، ވަރަށް ހިތްދަތި ނަތީޖާއެއް ފުރަތަމަ މެޗުގައި ނުކުތީ، ވަރަށް ރަނގަޅަށް ކުޅެފައި ވަރަށް އުންމީދާ އެކު ތިބީ މޮޅަކަށް، އެކަމަކު އެކަން ހާސިލެއް ނުވި، އެހެންވީމަ އެކަން ވީ މެންޓަލީ ވެސް ކުޅުންތެރިންނަށް އުނދަގޫ ކަމަކަށް،" ދެ ވަނަ މެޗުގެ ކުރިން ޓީސްޕޯޓްސް އަށް ދިން އިންޓަވިއުއެއްގައި ކަބްރޭރާ ބުންޏެވެ.
ފުރަތަމަ މެޗަށް ފަހު ބަންގްލަދޭޝް އިން ދެ ވަނަ މެޗުގެ ކުރިން މި ލިބުނު މުއްދަތުގައި ކުރިއަށްގެންދިޔައީ، "އެކްޓިވް ރިކަވަރީ ސެޝަންތަކެއް" ކަމަށް ކަބްރޭރާ ވަނީ ބުނެފަ އެވެ. ކަބްރޭރާ ދެކޭގޮތުގައި، އެންމެ މުހިންމު ކަަމަކީ، ފިޒިކަލީ އަދި މެންޓަލީ ވެސް ރިކަވާވެގެން ދެ ވަަނަ މެޗަށް ބަންގްލަދޭޝް ޓީމު ނުކުތުމެވެ.
"އުންމީދުތައް މި ހުރީ ވަރަށް މަތީގައި ދެ ވަނަ މެޗާ ކުރިމަތިލާއިރު، އެއީ އަހަރެމެން ރިކަވާވާން ކުރަން ޖެހޭ ހުރިހާ ކަމެއް ވަރަށް ފުރިހަމަކޮށް މިދިޔައީ. މޮޅުވާން ކުރަންޖެހޭ ހުރިހާ ކަމެއް ކުރަމުން މި އަންނަނީ،" ރާއްޖެ އަތުން ބަންގްލަދޭޝް އަށް ދެ މޮޅު ހޯދައިދީފައިވާ ކަބްރޭރާ ބުންޏެވެ.
"މެޗުން މޮޅުވެވޭނެހާ ފުރުސަތު ފުރަތަމަ މެޗުގައި އަަހަރެމެން ތަނަވަސްކުރިން. ހަަމައެކަނި ގޯލެއް ނުޖެހުނު މައްސަލަ މި ފެނިގެންދިޔައީ، ކުޅުމުގައި ހުރީ ގިނައިން ޕޮޒިޓިވް ކަންކަން. ވަރަށް އުނދަގޫ ބަޔާންކޮށްދެން ވެސް ފުރަތަމަ މެޗުގައި ކީއްވެތޯ ގޯލެއް ނުޖެހުނީ،"
ބަންގްލަދޭޝްއާ އެކު، ކަބްރޭރާގެ އެއްބަސްވުން އޮތީ މި އަހަރުގެ ނިޔަލަށެވެ. އެހެންކަމުން، މިއަދުގެ މެޗުގައި ރާއްޖެ އަތުން ބަންގްލަދޭޝް އަށް ނަތީޖާ ނުނެރެވިއްޖެނަމަ، މިއީ ބަންގްލަދޭޝްގެ ބެންޗުން ކަބްރޭރާ ފެންނާނެ ފަހު މެޗަށް ވުމުގެ ފުރުސަތު އެބައޮތެވެ.
ރާއްޖެއާ ދެކޮޅަށް ބަންގްލަދޭޝް އިން މިއަދު ކުޅޭ މެޗު ފަށާނީ ހަވީރު 17:00 ގަ އެވެ.
