ރައީސް މުހައްމަދު މުއިއްޒު ބޭނުންވެވަޑައިގެންނެވި ނަމަ ރައްޔިތުންގެ ހިޔާލު ހޯދުމުގެ އާންމު ވޯޓެއް ނުނަގައި ވެސް ދެ އިންތިހާބު އެއްކޮށްލެވުނީސް ކަމަށް ބާރަށު ދާއިރާގެ ޕީއެންސީ މެންބަރު، އިބްރާހިމް ޝުޖާއު ރޭ ވިދާޅުވެއްޖެ އެވެ.
އެމްއެމްޓީވީން ގެނެސްދިން ޕްރޮގްރާމެއްގައި ޝުޖާއު ވިދާޅުވީ މުއިއްޒު ބޭނުންވެވަޑައިގެންނެވި ނަމަ އެމަނިކުފާނަށް ރައްޔިތުން ދެއްވާފައިވާ ވެރިކަމުގެ ބާރުގެ ތެރެއިން ދެ އިންތިހާބު އެއްކޮށްލެއްވުނީސް ކަމަށެވެ.
"ރައީސް އެއްސެވީ ގާނޫނުއަސާސީއަށް ގެނެވުނު އިސްލާހު ރައްޔިތުންގެ މަޖިލީހުން ފާސްކުރުމާ ގުޅިގެން އެ އިސްލާހު އެމަނިކުފާނު ތަސްދީގު ކުރައްވަންވީތޯ ނުވަތަ ނޫންތޯ. އަޅުގަނޑުމެން ގަބޫލުކުރޭ އަދި އެމަނިކުފާނަށް އޮތޭ އެނގޭތޯ ކޮންމެހެން މިކަން ނުކޮށްވެސް އެމަނިކުފާނަށް ލިބިވަޑައިގެންފައިވާ ރައްޔިތުން ދެއްވާފައި އޮތް ބާރުގެ ތެރެއިން އެމަނިކުފާނު ބޭނުންފުޅިއްޔާ ދެ އިންތިހާބު އެއްކޮށް ބާއްވަވަންވީ ނޫންތޯ. މިސާލެއް މިދެންނެވީ،" ޝުޖާއު ވިދާޅުވި އެވެ.
ޝުޖާއު އެހެން ވިދާޅުވި ނަމަވެސް ގާނޫނުއަސާސީގައި ބުނެފައިވަނީ މަޖިލީހުގެ އުމުރަށް ބަދަލެއް ގެންނަނަމަ، އެ ބަދަލެއް ގެނެވޭނީ ރައްޔިތުންގެ ހިޔާލު ހޯދުމުގެ އާންމު ވޯޓުގައި ވޯޓުދިން މީހުންގެ އަގުލަބިއްޔަތުން ކަމަށެވެ.
ސަރުކާރުން މަޖިލީހަށް ހުށަހަޅައިގެން ސަރުކާރު ހިންގާ ޕީއެންސީގެ ސުޕަ މެޖޯރިޓީ ބޭނުންކޮށްގެން ދެ އިންތިހާބު އެއްކޮށްލަން ފާސްކުރުމުން އެންމެ ފަހުން ނެގި ފެންނަ ނުފެންނަ ވޯޓުގައި އަހާފައިވަނީ ރައްޔިތުންގެ މަޖިލީހުގެ އުމުރު ކުރުކުރުމާމެދު އާންމުން ދެކޭ ގޮތާއި ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމާމެދު އާންމުން ދެކޭ ގޮތާ ބެހޭ ސުވާލެކެވެ.
ދެ އިންތިހާބު އެއްކޮށްލުމަށް ވޯޓު ދެއްވަން ރައްޔިތުންގެ ކިބައިން މުއިއްޒު އެދިވަޑައިގެން، އެކަމަށް ކެމްޕެއިން ވެސް ކުރެއްވި އެވެ. ނަމަވެސް ދެ އިންތިހާބު އެއްކޮށްލަން ނުފެންނަ ކަމަށް 148،723 މީހުން ވޯޓުލި އެވެ. އެއީ 68.74 ޕަސެންޓެވެ. އިންތިހާބުތައް އެއްކޮށްލަން 67،627 މީހުން ވޯޓުދިންއިރު، އެއީ 31.26 ޕަސެންޓެވެ.
މުއިއްޒު ވެރިކަން ހޯއްދެވި ވޯޓުގެ އަދަދަށްވުރެ ގިނަ މީހުން ފެންނަ ނުފެންނަ ވޯޓުގައި ސަރުކާރުގެ ހުށަހެޅުމާ ދެކޮޅަށް ވޯޓު ދިނެވެ. އޭގެއިތުރުން ސަރުކާރު ހިންގާ ޕީއެންސީގެ ދަފްތަރުގައި ތިބި އަދަދަށް ވެސް ސަރުކާރުގެ ހުށަހެޅުމަށް ތާއީދު ލިބިފައިނުވާކަން ފާހަގަކުރެވެ އެވެ.
ޝުޖާއު ވިދާޅުވީ ރައްޔިތުންގެ ގިނަ ބަޔަކު ވޯޓުލާން ނުކުމެ ވޯޓު ދިނީ އެ ރައްޔިތުން ނިންމާ ގޮތެއް މުއިއްޒު ތަންފީޒުކުރައްވާނެ ކަމުގެ ޔަގީންކަން އޮތުމާއެކު ކަމަށެވެ.
ރައްޔިތުންގެ ފެންނަ ނުފެންނަ ވޯޓެއްގެ ނަގައިގެން އެންމެ ފަހުން ކަމެއް ކަނޑައެޅީ ގާނޫނު އަސާސީގައި ވެރިކަން ހިންގާ ނިޒާމު ކަނޑައެޅުމަށެވެ.
