ރައްޔިތުންގެ މަޖިލީހުގެ މެންބަރުން ވަޒީރުންނާ ކުރުމަށް ހުށަހެޅި ސުވާލުތަކުގެ ތެރެއިން ޑިސެމްބަރު 2024، އިން ފެށިގެން މިހާތަނަށް 62 ސުވާލަށް ޖަވާބު ދީފައި ނުވާތީ އެ މައްސަލަ ހައްލުކޮށްދިނުމަށް އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ފަރާތުން މަޖިލީހުގެ ރައީސް އަބްދުއްރަހީމް އަބްދުالله ގެ އަރިހުން އެދިވަޑައިގެންފި އެވެ.
މަޖިލީހުގެ ގަވާއިދު ބުނާ ގޮތުން ވަޒީރުންނާ ސުވާލު ކުރުމަށް ފޮނުވާ ނޯޓިސްގެ 14 ދުވަހުގެ ތެރޭގައި އެ ސުވާލުތަކަށް ވަޒީރުން ޖަވާބުދޭން ޖެހެ އެވެ.
އެމްޑީޕީގެ ޕާލިމަންޓަރީ ގްރޫޕުގެ ސެކްރެޓަރީ ޖެނެރަލް އަދި ގަލޮޅު އުތުރު ދާއިރާގެ މެންބަރު އިބްރާހިމް މުހައްމަދު ސޮއިކުރައްވައި ހުށަހެޅުއްވި މި ޝަކުވާގައި ބަޔާންކޮށްފައިވަނީ، މަޖިލީހަށް ޖަވާބުދާރީވުމަށް ސަރުކާރުން ދެކޮޅު ހެދުމަކީ ޑިމޮކްރެޓިކް ނިޒާމަށް ހުރަސްއެޅޭ ކަމެއް ކަމަށެވެ.
ސަރުކާރު ޒިންމާދާރުކުރުވުމަށް މަޖިލީހަށް ލިބިދޭ ބާރުތަކަށް ސަރުކާރުން ގަސްދުގައި ހުރަސްއަޅަމުންދާ ކަމަށް ބުނެ، އިދިކޮޅު ޕާޓީން ވަނީ މިއީ ގާނޫނުއަސާސީއާ ހިލާފު އަމަލުތަކެއްގެ ގޮތުގައި ސިފަކޮށްފަ އެވެ.
މަޖިލީހުން ކުރާ ސުވާލުތަކަށް ޖަވާބު ނުދެއްވާ ކެބިނެޓް މިނިސްޓަރުންގެ ތެރޭގައި ސަރުކާރުގެ އިސް ބޭފުޅުން ހިމެނިވަޑައިގަންނަވައެވެ. އޭގެ ތެރޭގައި ފިނޭންސް މިނިސްޓަރު މޫސާ ޒަމީރާއި، ޑިފެންސް މިނިސްޓަރު ޣައްސާން މައުމޫނާއި، ހައުސިން މިނިސްޓަރުއަބްދުﷲ މުުއްތަލިބް ހިމެނިވަޑައިގަންނަވައެވެ.
އޭގެ އިތުރުން އިކޮނޮމިކް މިނިސްޓަރު މުހައްމަދު ސައީދާއި، އެޓާނީ ޖެނެރަލް އަހުމަދު އުޝާމްގެ އިތުރުން ހެރިޓޭޖު މިނިސްޓަރު އާދަމް ނަސީރު އިބްރާހިމްގެ ނަންވެސް މި ޝަކުވާގައި ވަނީ ފާހަގަކޮށްފަ އެވެ.
މި ވަޒީރުންނާ ސުވާލުކޮށްފައިވަނީ ތަރައްގީގެ މަޝްރޫއުތަކާއި، ދައުލަތުގެ މާލިއްޔަތާއި، ގައުމީ ސަލާމަތާ ގުޅުންހުރި މުހިންމު ކަންކަމާ ގުޅޭގޮތުންނެވެ.
