އިސްލާމިކް ސްޓޭޓް (އައިއެސް) ޖަމާއަތާ ގުޅިގެން ރާއްޖޭގައި ޓެރަރިޒަމްގެ އަމަލުތައް ހިންގަން އުޅުނު ކަމުގެ ތުހުމަތުގައި މީގެ ފަސް އަހަރު ކުރިން ޓެރަރިޒަމްގެ އެކި ދައުވާތައް އުފުލާފައިވާ އަށް މީހެއްގެ މައްސަލައިގައި ހުކުމް ކުރުމާ ހިސާބަށް ގޮސްފި އެވެ.
ދައުލަތުން ބުނާ ގޮތުގައި މި އަށް މީހުންނަކީ ތ. ތިމަރަފުށީގައި ޓެރަރިސްޓު ސެލްއެއް ހަދައިގެން އުޅުނު ބަޔެކެވެ.
މި މީހުންނަށް ދައުވާ ކުރީ އިސްލާމް ދީން ކުރިއެރުވުމުގެ ނަމުގައި ޓެރަރިސްޓް ޖަމާއަތްތަކަކަށް ތާއީދުކޮށް ޓެރަރިޒަމްގެ ހިތްވަރުދީ، ޓެރެރިސްޓް ޖަމާއަތްތަކުގެ އަމަލުތަކަކީ ސަބަބުވެރި އަމަލުތަކެއްކަމަށް ދެއްކުމުގެ ތުހުމަތު ކުރެވޭތީ އެވެ.
މި މީހުން ވަނީ، ދައުލަތުން ތުހުމަތު ކުރާ ގޮތުގައި، ޓެރަރިސްޓް ޖަމާއަތެއް ކަމަށްވާ އައިއެސްގެ އިރުޝާދުގެ ދަށުން ރާއްޖޭގައި ޓެރަރިޒަމްގެ އަމަލުތައްކުރުމަށް ރާވައި އެކަމަށް އައީޑީއެއް ތައްޔަރުކޮށް ރާއްޖޭގެ އެކި ސަރަހައްދުތަކުގައި ގޮއްވާލަން އުޅެފަ އެވެ. ފުލުހުން ކުރިން ބުނެފައިވަނީ، ގޮއްވާލަން އުޅުނު އެއް ތަނަކީ ތިމަރަފުށީގެ ސްކޫލުގެ ލެބޯޓްރީ ކަމަށެވެ.
ދައުވާ އުފުލި އަށް މީހުން:
- ތ. ތިމަރަފުށި، ކެނެރީގެ، އަލީ މުނީޒު
- ތ. ތިމަރަފުށި، އަސުރުމާގެ މުހައްމަދު އާސިރު
- ތ. ތިމަރަފުށި، ފެހިވިދުވަރުގެ އަބްދުﷲ ޝަރީފް
- ތ. ތިމަރަފުށި، އަސްރަފީވިލާ އަހްސަން މުހައްމަދު
- ރ. މަޑުއްވަރި، ބީޗްހައުސް އަބްދުﷲ އިމާދު
- ތ. ތިމަރަފުށި، ސައިމާ ޝަމާހު ޝަރީފް
- ނ. ކުޑަފަރި، ރޯޒްމީޑު ޢިބްރާހިމް ލޫތު
- ރ. ކަނދޮޅުދޫ، އަލީ އަރުހަމް މުހައްމަދު
މި މައްސަލައިގައި ދައުވާ ކުރުމަށް ފެބްރުއަރީ 8، 2021 ގައި ކޯޓަށް ހުށަހަޅާފައިވާއިރު، މައްސަލައިގެ އަޑުއެހުންތައް ނިންމާލީ އިއްޔެ އެވެ. އިއްޔެގެ އަޑުއެހުމުގައި ދައުލަތާއި ދިފާއުން ހުލާސާކޮށް ވާހަކަދައްކައި، ދެ ފަރާތުން ފަހު ބަސް ވަނީ އިއްވާފަ އެވެ.
ސްކޫލް ކުދިންތަކެއް މަރަންރޭވި ކަމަށް ތުހުމަތުވާ މައްސަލާގައި ގިނަ ހެކިތައް ސިއްރުނުވި
ދީނުގެ ނަމުގައި ހައްދުފަހަނަ އަޅާފައިވާ ޓެރެރިސްޓް ޖަމާއަތަކަށް ތާއީދުކުރާ ކަމުގެ ތުހުމަތުވާ އަށް މީހެއް ވެގެން، އެރަށު ސްކޫލް ގޮށްވާލަން އުޅުނީ ހުޅަނގުގެ ތައުލީމާއި އެމީހުންގެ ގަބޫލުކުރުންތަކާއި ހިލާފުވާތީ ކަމަށް ދައުލަތުން ބުނޭ
ޖިނާއީ އިޖުރާއަތު ގާނޫނު ބުނާގޮތުން ހުލާސާ ބަޔާން ހުށަހެޅުމުގެ އަޑުއެހުން ބޭއްވޭ ތާރީހުން ފެށިގެން 30 ދުވަސް ތެރޭގައި މައްސަލާގައި ހުކުމް ކުރަންޖެހޭނެ އެވެ. އެހެން ކަމުން އަންނަ މަހުގެ 8 ގެ ކުރިން މައްސަލައިގައި ކޯޓުން ގޮތެއް ނިންމަން ޖެހޭނެ އެވެ.
އެ މީހުންގެ މައްޗަށް އުފުލި ދައުވާތަކުގެ ތެރޭގައި ޓެރަރިޒަމްގެ އަމަލެއް ކުރުމަށް ރޭވުމާއި، ޓެރަރިޒަމްގެ އަމަލެއް ކުރުމަށް ހިތްވަރު ދިނުމާއި، ޓެރަރިސްޓު ޖަމާއާތަކަށް ތާއީދުކުރާ މީހެއްކަން ދޭހަވާފަދަ ލިޔުމެއް ގެންގުޅުމާއި، ހަނގުރާމައަށް ދާން އުޅުމާއި، ޓެރަރިޒަމްގެ އަމަލެއް ކުރުމަށް ބޭނުންވާ އުކުޅުތައް ދަސްކުރުން އަދި އަދުލު އިންސާފު ގާއިމުކުރުމަށް ހުރަސްއެޅުން ހިމެނެ އެވެ.
އޭގެ އިތުރުން ރާއްޖޭގެ ގައުމީ ސަލާމަތަށް ނުރައްކަލެއް ކުރިމަތިކުރުވުމަށް ތައްޔާރުވަމުންދިއުމާއި، ދަތުރު ދިޔުމުގެ ނަމުގައި ފަޅު ރަށްރަށަށް ގޮސް ތަމްރީންތައް ހަދަމުންދިޔުމާއި ތިމަރަފުށީގައި ދީނުގެ ނަމުގައި ހަރުކަށި ފިރުކު ފެތުރުމުގެ ގޮތުން ރަށުގެ ބައެއްގޭގޭގައި ހަރުކަށި ފިކުރުތަކުގެ ކްލާސްތައް ހިންގައި އޮންލައިންކޮށް ހަރުކަށި ފިކުރުގެ ދަރުސްތައް ބާއްވާ ކަމަށް ވެސް އެ މީހުންގެ މައްޗަށް ތުހުމަތުކުރެ އެވެ.
ޕީޖީ އޮފީހުން ބުނީ، މި ސެލްގެ މީހުން ވަނީ ސަރުކާރުން މިސްކިތްތަކަށް ކަނޑައަޅާފައިވާ އިމާމުންގެ ފަހަތުގައި ނަމާދު ނުކޮށް ވަކި ޖަމާއަތް ހަދައިގެން ނަމާދުކުރަމުން ދިޔުމަށް ބާރުއަޅާފައި ކަމަށެވެ. އަދި، ހަރުކަށި ފިރުކުރުގެ ފަރާތްތަކާއި ގުޅުން އޮންނަ ފަރާތްތަކަށް މާލީ އެހީތެރިކަން ފޯރުކޮށްދިނުމުގެ ތުހުމަތު ވެސް މި މީހުންގެ މައްޗަށް ކުރެވެ އެވެ.
ތިމަރަފުށި މައްސަލައިގައި ހިމެނޭ މީހުން ތިބީ ހައްޔަރުކުރި ދުވަހުން ފެށިގެން ޝަރީއަތް ނިމެންދެން ބަންދުކޮށްފަ އެވެ. މި މީހުން ބަންދުގައި ތިބި މުއްދަތު ދިގުލައިގެން ދިޔުމުން "އެންޑް ވާނުވާ" އެއްވުންތަކުގައި އާއިލާތަކުން ބައިވެރިވެ އަޑު އުފުލާފައިވެ އެވެ.
