މިދިޔަ ހޮނިހިރު ދުވަހު ބޭއްވި އިންތިހާބަށްފަހު މަޑުމަޑުން ތަކެތީގެ އަގު ބޮޑު ކުރަން އުޅޭ ވާހަކަ އިގްތިސާދީ މިނިސްޓަރު މުހައްމަދު ސައީދު މިއަދު ދޮގު ކުރައްވައިފި އެވެ.
ހަނގުރާމައިގެ ހާލަތުގައި ގައުމު މެނޭޖް ކުރަން އުފެއްދި ކާރިސާ ކޮމިޓީ އިން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ސައީދު ވިދާޅުވީ، އިންތިހާބަށްފަހު ތަކެތީގެ އަގުބޮޑުވާނެ ކަމަށް ދެކެވޭ ވާހަކައަކީ ސިޔާސީ ވާހަކައެއް ކަމަށެވެ.
"އިންތިހާބުގެ ފަހުން [ތަކެތީގެ] އަގު ބޮޑުވާނެ ކަމަށް ބައެއް ސިޔާސީ ފަރާތްތަކުން، އަޅުގަނޑުމެންނާ މިވަގުތު ހިޔާލު ތަފާތު ފަރާތްތަކުން، އެ ދައްކާ ވާހަކަފުޅުތަކަކީ ސިޔާސީ ވާހަކަފުޅުތަކެއް. އެއީ މާކެޓަކާ ގުޅުން ހުރި ވާހަކަތަކެއް ނޫން ކަމަށް އަޅުގަނޑަށް ގަބޫލު ކުރެވެނީ،" ސައީދު ވިދާޅުވި އެވެ.
ތަކެތީގެ އަގު ބޮޑު ކުރުމަކީ ސަރުކާރުން ގެންގުޅޭ ވިސްނުމެއް ނޫން ކަމަށް ވެސް ސައީދު މިއަދު ވިދާޅުވި އެވެ.
"އިލެކްޝަން ނިމުނީމަ ވަކި ބާވަތެއްގެ ތަކެތި އަގުބޮޑު ކުރަނީއޭ ކިޔައިގެން ދެކެވޭ ވާހަކައަކީ އަޅުގަނޑަކަށް ހިއެއް ނުވޭ ރަނގަޅު ވާހަކައެއް ހެނެއް،" އޭނާ ވިދާޅުވި އެވެ. "މި ސަރުކާރުގެ ޕްރަޔައޯރިޓީއެއް ނޫނޭ ރައްޔިތުންގެ އަސާސީ ބާވަތްތައް އަގުބޮޑު ކުރުމަކީ."
ނަމަވެސް މާކެޓަށް އަންނަ ބަދަލުތަކާއެކު، ހާއްސަކޮށް މެދުއިރުމަތީގައި ހަނގުރާމަ ހިނގަމުންދާއިރު، ތެލާއި ގޭސް ހިމެނޭ ގޮތަށް ބައެއް ތަކެތީގެ އަގަށް ބަދަލުތަކެއް އަންނާނެ ކަމަށް ސައީދު ވިދާޅުވި އެވެ.
