ނިމިދިޔަ ހޮނިހިރު ދުވަހު ބޭއްވި އިންތިހާބުގައި ސަރުކާރަށް ކުރިމަތިވި ބޮޑު ނާކާމިޔާބީއަށް ފަހު، ސިޔާސީ މަގާމުތަކުގައި ތިއްބެވި ގިނަ އަދަދެއްގެ މުވައްޒަފުން ވަކިކުރުމުގެ މަސައްކަތް އަންނަ ހަފުތާގައި ފަށާނެ ކަމަށް ސަރުކާރުގެ އިސް ބައެއް އޮފިޝަލުން ވިދާޅުވެއްޖެއެވެ.
އިތުބާރު ހުރި މަސްދަރުތަކުން ބުނި ގޮތުގައި، ސިޔާސީ މަގާމުތަކާއި ސަރުކާރު ހިއްސާވާ ކުންފުނިތަކުގެ އިސް މަގާމުތަކުގައި ތިއްބެވި ފަރާތްތަކުގެ މަސައްކަތުގެ ފެންވަރު ބެލުމަށްފަހު، އެ ފަރާތްތަކުގެ ޕާފޯމަންސް ރިޕޯޓްތައް އަންނަ އާދީއްތަ ދުވަހުގެ ނިޔަލަށް ރައީސް އޮފީހަށް ފޮނުވުމަށް މިހާރު ވަނީ އަންގާފައެވެ.
"އުމްރާއިން ވަޑައިގަންނަވާ ގޮތަށް އަންނަ ހަފުތާގައި ގިނަ އަދަދެއްގެ ބަޔަކު ވަކިކުރާނެ. އޭގެ ތެރޭގައި ސިޔާސީ މުވައްޒަފުންނާއި، ކުންފުނިތަކަށް ސިޔާސީ ގޮތުން އައްޔަންކޮށްފައި ތިބި ފަރާތްތައް ވެސް ހިމެނޭ،" މައުލޫމާތު ދެއްވި ސަރުކާރުގެ އިސް ވެރިޔަކު ވިދާޅުވިއެވެ.
އޭނާ އިތުރަށް ވިދާޅުވީ، އިންތިހާބާ ދިމާކޮށް ވަޒީފާ ދިން ކޮންޓްރެކްޓް މުވައްޒަފުންގެ ތެރެއިން ވެސް ގިނަ ބަޔަކު މަގާމުން ވަކިކުރާނެ ކަމަށެވެ.
މި ބަދަލުތައް ގެންނަން މި ފެށީ، އިންތިހާބުގައި ސަރުކާރަށް ލިބުނު ނާކާމިޔާބީގެ އިތުރުން، އިގުތިސާދީ ގޮތުން ގައުމަށް ކުރިމަތިވެފައިވާ ގޮންޖެހުންތަކާ ހުރެއެވެ. އިރާނު ހަނގުރާމައާ ގުޅިގެން ދައުލަތުގެ އާމްދަނީއަށް ނޭދެވޭ އަސަރުކޮށްފައި ވަނިކޮށް، ލޯކަލް ކައުންސިލް އިންތިހާބާ ދިމާކޮށް ގިނަ އަދަދެއްގެ މުވައްޒަފުން އިތުރުކުރުމާއި ބޮޑެތި ޕްރޮމޯޝަންތައް ދެމުންދާތީ ސަރުކާރަށް ވަނީ އާންމުންގެ ބޮޑު ފާޑުކިޔުމެއް އަމާޒުވެފައެވެ.
މި ފިޔަވަޅަކީ ދައުލަތުގެ ހަރަދުތައް ކުޑަކޮށް، ސަރުކާރުގެ ހިންގުން ހަރުދަނާކުރުމަށް އަޅާ ފިޔަވަޅެއްގެ ގޮތުގައި ބެލެވުނު ނަމަވެސް، ކުއްލިއަކަށް ގިނަ އަދަދެއްގެ ބަޔަކު ވަކިކުރަން ފެށުމުން ސިޔާސީ މަސްރަހު ހަލަބޮލިވާނެ ކަމަށް "އަދަދު" ނޫހާ ވާހަކަ ދެއްކި މަސްދަރުތަކުން ބުންޏެވެ.
"ވަކި ނުކޮށް ވެސް ވާކަށް ނެތް. ނަމަވެސް މިހާރު ވަގުތު މާ ފާއިތުވެއްޖެ. ކުރިއަށް އޮތީ ވަރަށް ދަތި ދުވަސްތަކެއް،" ވާހަކަ ދެއްކި އޮފިޝަލަކު ބުންޏެވެ.
ސިޔާސީ މުވައްޒަފުންގެ އަދަދު 700 އަށް ވުރެ އިތުރު ނުކުރާނެ ރައީސް މުހައްމަދު މުއިއްޒު އޮތީ ކަނޑައަޅުއްވާފަ އެވެ.
ސަރުކާރުން ބުނެފައި ވަނީ ސިޔާސީ މުވައްޒަފުންގެ ގޮތުގައި ތިބީ 900 މީހުން ކަމަށެވެ. މިއީ ސައްހަ އަދަދެއް ނޫން ކަމަށް ގިނަ ބަޔަކު ބުނަމުން ދާއިރު، މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ސިޔާސީ މުވައްޒަފުންގެ އަދަދު ހޯދަން ހުށަހެޅުމުން ވެސް އަދިވެސް ދޫނުކުރެ އެވެ.
މިވަގުތު 4،100 ސިޔާސީ މުވައްޒަފުން އެބަތިބި، ދައުލަތުގެ ޕޭރޯލް ހަ ބިލިއަނުން މަތިވެއްޖެ: ޣަފޫރު
މަޖިލިސް އިންތިހާބާއި ރިޔާސީ އިންތިހާބު އެއްކޮށްލަން ގާނޫނުއަސާސީ ބަދަލުކުރަން ހުށަހަޅާފައިވާ ބިލަށް ބަހުސް ކުރައްވަމުން ޣަފޫރު ވިދާޅުވީ، ސަރުކާރު ސިޔާސީ މުވައްޒަފުންނާއި ކުންފުނިތަކުގެ މުވައްޒަފުންގެ އަދަދު އިންތިހާއަށް އިތުރުވެފައިވާ ކަމަށް.
ލޯކަލް ކައުންސިލްތަކުގެ އިންތިހާބުގެ ކެމްޕޭނުގައި ސަރުކާރުން ބޮޑު ހޭދައެއް ކުރި ނަމަވެސް، އެއްވެސް ސިޓީއެއްގެ މޭޔަރުކަން ނުވަތަ މެޖޯރިޓީ ސަރުކާރަށް ލިބިފައެއް ނުވެއެވެ. މީގެ އިތުރުން ސިޓީތަކުގެ އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިޔޫޑީސީ) ތަކުގެ ރައީސްކަމާއި، ރަށްރަށުގެ ކައުންސިލްތަކުގެ ރައީސުންގެ ގިނަ ގޮނޑިތައް ވެސް ސަރުކާރަށް ވަނީ ގެއްލިފައެވެ.
ގާނޫނުއަސާސީއަށް ބަދަލު ގެނައުމަށް ނެގި ހިޔާލު ހޯދުމުގެ ވޯޓުގައި ރައްޔިތުން ނޫނެކޭ ބުނުމުން ރައީސް މުއިއްޒުގެ އިތުބާރު ގެއްލިފައިވާ ކަމާއި އެމަނިކުފާނު އިސްތިއުފާ ދެއްވުމަށް ސިޔާސީ ބައެއް ފަރާތްތަކުން ދަނީ ގޮވާލަމުންނެވެ.
