ސަރުކާރުގެ ފަރާތުން ރައްޔިތުންގެ މަޖިލީހަށް ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމަށް ހުށަހެޅި ބިލު ސަރުކާރު ހިންގާ ޕީއެންސީގެ ސުޕަ މެޖޯރިޓީއާއެކު ފާސްކުރުމަށްފަހު، އެ ބިލު ތަސްދީގުކުރުމުގެ ކުރިން އާންމުންގެ މެދުގައި ނެގި ފެންނަ ނުފެންނަ ވޯޓު (ރެފެރެންޑަމް) ގައި ޕީއެންސީގެ ދަފްތަރާ އެއްވަރުގެ ތާއީދެއްވެސް ނުލިބުނެވެ.
އިލެކްޝަންސް ކޮމިޝަނުން ބުނާގޮތުގައި މި އަހަރުގެ ޖެނުއަރީ 1، ގެ ނިޔަލަށް ޕީއެންސީގެ ދަފްތަރުގައި ތިބީ 74،048 މެންބަރުންނެވެ.
ނަމަވެސް ރެފެރެންޑަމްގައި މިހާތަނަށް ލިބުނު ނަތީޖާތަކަށް ބަލާއިރު ސަރުކާރުގެ ހުށަހެޅުން ބަލައިގަންނަން ފެންނަ ކަމަށް ވޯޓު ދިނީ 67،137 މީހުންނެވެ. ސަރުކާރުގެ އެ ހުށަހެޅުމާ ދެކޮޅަށް 146،112 މީހުން ވޯޓު ދީފައިވެ އެވެ.
މުހައްމަދު މުއިއްޒު ވެރިކަމަށް ވަޑައިގެންނެވީ 2023 ވަނަ އަހަރު ބޭއްވި ރިޔާސީ އިންތިހާބުގެ ދެވަނަ ބުރުން 129،159 ވޯޓާއެކުގަ އެވެ. މިގޮތުން ދައުރު ދެބައިވި ފަހުން ނެގި ވޯޓުގައި މުއިއްޒުގެ ސަރުކާރު ވެރިކަމަށް ގެނައުމަށް ވޯޓު ދިން 55،111 މީހުން ސަރުކާރުގެ ހުށަހެޅުމަށް ތާއީދެއް ނުކުރެ އެވެ.
ރިޔާސީ އިންތިހާބުގައި މުއިއްޒުއާ ދެކޮޅަށް ޖުމްލަ 109،868 މީހުން ވޯޓުލި އެވެ. އޭގެ ދެ އަހަރަށްވުރެ ގިނަ ދުވަސް ފަހުން ނެގި މި ފެންނަ ނުފެންނަ ވޯޓުގައި މުއިއްޒުގެ ސަރުކާރާ ދެކޮޅަށް ވޯޓުދިން މީހުންގެ އަދަދު 36،244 އަށް މިވަނީ އިތުރުވެފަ އެވެ.
މިދިޔަ ހޮނިހިރު ދުވަހު ބޭއްވި ލޯކަލް ކައުންސިލް އިންތިހާބުގައި ރާއްޖޭގެ ފަސް ސިޓީން ވެސް ޕީއެންސީ ވަނީ ނާކާމިޔާބީއާ ކުރިމަތިލާންޖެހިފަ އެވެ. ފަސް ސިޓީންގެ މޭޔަރާއި ޑަބްލިއުޑީސީ ރައީސްގެ މަގާމުވެސް ކާމިޔާބުކުރީ އިދިކޮޅު އެމްޑީޕީ އެވެ.
ރިޔާސީ އިންތިހާބުގައި މުއިއްޒުއަށް ލިބުނު ވޯޓަށްވުރެ ފެންނަ ނުފެންނަ ވޯޓުގައި ސަރުކާރަށް ނޫނެކޭ ބުނި މީހުން ގިނަވެއްޖެ
ރިޔާސީ އިންތިހާބުގެ ދެވަނަ ބުރުގައި މުއިއްޒު 129،159 ރައްޔިތުން މުއިއްޒުއަށް ވޯޓު ދީފައިވޭ. ފެންނަ ނުފެންނަ ވޯޓުގައި ސަރުކާރުގެ ހުށަހެެޅުމާ ދެކޮޅަށް 129،683 މީހުން ވަނީ ވޯޓު ދީފައިވޭ. ދޮުޅު އަހަރާއި ބައިވީއިރު ސަރުކާރަށް އޮތް ތާއީދު އަންނަނީ ފަނޑުވަމުން.
މީގެއިތުރުން ޖުމްލަ ގޮނޑީގެ އަދަދަށް ބަލާއިރު ކައުންސިލް އިންތިހާބަށް ވަރުގަދަ ކެމްޕެއިނެއް ކުރި ޕީއެންސީ ނާކާމިޔާބީއާ ކުރިމަތިލާން ޖެހިފައިވާއިރު، އެންމެ ގިނަ ގޮނޑި ކާމިޔާބުކުރީ އެމްޑީޕީ އެވެ. އޭގެއިތުރުން އަތޮޅުތަކަށް ބަލާއިރުވެސް އެންމެ ގިނަ އަތޮޅުތަކުން ޕީއެންސީ ބަލިކޮށް ކާމިޔާބު ހޯދީ އެމްޑީޕީންނެވެ.
ލޯކަލް ކައުންސިލުގެ އިންތިހާބާއި ފެންނަ ނުފެންނަ ވޯޓުން ބަލިވިކަން ގަބޫލު ކުރައްވައި، ސަރުކާރުން ރަނގަޅު ކުރަންޖެހޭ ކަންކަން އެބަހުރި ކަމަށް ހޮނިހިރު ދުވަހުގެ ރޭ ވިދާޅުވި އެވެ. ސަރުކާރުން ރަނގަޅު ކުރަން ޖެހޭ ކަންކަން ކުރިއަށް އޮތް ދުވަސްތަކުގައި ރަނގަޅު ކުރާނެކަމުގެ ޔަގީންކަން މުއިއްޒު ދެއްވި އެވެ.
ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބޭއްވުމަށް ބޭނުންވަނީ މުހައްމަދު މުއިއްޒު އެވެ. އެއީ މުއިއްޒުގެ މެނިފެސްޓޯގައި އަދި ވައުދު ފޮތުގައި ހިމެނޭ ކަމެއް ނޫނެވެ. މި ވާހަކަތައް މުއިއްޒު ދައްކަވަން ފެއްޓެވީ ވެރިކަމަށް ވަޑައިގަތުމަށް ފަހު އެވެ.
މި ބަދަލު ގެނައުމަށް މަޖިލީހުން ބިލު ފާސްކުރީ ވެސް ދައުރުން ބޭރު ޖަލްސާއެއް ބޭއްވުމަށް ފަހު އަވަސް އަރުވާލައިގެންނެވެ. ކޮމިޓީ މަރުހަލާ ހިމެނޭހެން މަޖިލީހުގައި ބިލަށް ބަހުސްކޮށް މަޝްވަރާކުރީ މަދު ގަޑިއިރުތަކަކަށެވެ.
މި ވޯޓުގައި ސަރުކާރުން ވަރަށް ގަދައަށް ކެމްޕޭން ކުރި އެވެ. ދެ އިންތިހާބު އެއް ދުވަހެއްގައި ބޭއްވުމަކީ ހަރަދު ކުޑަކުރަން ކުރާ ކަމެއް ކަމަށާއި އޭގެ ސަބަބުން ރާއްޖޭގައި ހަމަޖެހުން ގާއިމުވެ އެންމެ ގިނަ ރައްޔިތުން ވޯޓުލާ އިންތިހާބުގައި (ރިޔާސީ އިންތިހާބުގައި) ރައްޔިތުންގެ މަޖިލީހުގެ މެންބަރުން އިންތިހާބު ކުރާނެ ކަމަށް ބުނެ ވަކާލާތު ކުރި އެވެ.
