ރަށު ކައުންސިލް ރައީސްގެ ގިނަ ގޮނޑިތައް ވެސް އެމްޑީޕީން ކާމިޔާބުކޮށް ވެރިކަން ހިންގާ ޕީއެންސީއަށް ބޮޑު ނާކާމިޔާބީއެއް ލިބެއްޖެ އެވެ.
އިއްޔެ ބޭއްވި އިންތިހާބުގައި ރަށްރަށުގެ ކައުންސިލް ރައީސުން ހޮވުމަށް ވޯޓުލީ ރަށްތަކުގެ ވަގުތީ ނަތީޖާއިން ދައްކާ ގޮތުގައި، އެމްޑީޕީން 70 ރަށެއްގެ ކައުންސިލް ރައީސްކަމުގެ ގޮނޑި ކާމިޔާބުކޮށްފައި ވާއިރު، ސަރުކާރު ހިންގާ ޕީއެންސީން ހުރިހާ ގޮނޑިއަކަށް ވާދަކޮށްގެން ލިބިފައިވަނީ 69 ރަށެއްގެ ރައީސްކަމުގެ ގޮނޑި އެވެ. އިންތިހާބަކާ ނުލައި ލިބުނު ބާރަށު ކައުންސިލް ރައީސްކަމާއެކު ޖުމުލަ 70 ރަށެވެ.
މި އިންތިހާބުގައި އަމިއްލަ ގޮތުން ވާދަކުރި ކެންޑިޑޭޓުން ވަނީ ފާހަގަކޮށްލެވޭ ފަދަ ކާމިޔާބީއެއް ހޯދާފައެވެ. ވަގުތީ ނަތީޖާއިން ދައްކާ ގޮތުން 25 ރަށެއްގެ ރައީސްކަން އަމިއްލަ ކެންޑިޑޭޓުން ވަނީ ކާމިޔާބުކޮށްފައެވެ.
އެމްޑީއޭއަށް ތިން ރަށެއްގެ ކައުންސިލް ރައީސްކަން ކާމިޔާބު ކުރެވުނުއިރު، ޖޭޕީން މާމިގިލީ ރައީސްކަން ދަ ޑިމޮކްރެޓްސްއިން ވ. ތިނަދޫ ރައީސްކަން ކާމިޔާބުކޮށްފައިވެ އެވެ.
މި ނަތީޖާތައް ދައްކާ ގޮތުން ކައުންސިލްތަކުގެ ރައީސުންގެ މެޖޯރިޓީ ވެސް ޕީއެންސީ އަށް ވަނީ ގެއްލިފަ އެވެ.
ކާމިޔާބީގެ މުހިންމު ބައެއް ތަފްސީލުތައް:
- އެމްޑީޕީން ވަނީ ހޯރަފުށި، އިހަވަންދޫ، ކެލާ، އަދި ހަނިމާދޫ، ހިންނަވަރު، ގައްދޫ، ފަދަ ބޮޑެތި އާބާދީތައް ހިމެނޭ ރަށްތަކުގެ ގޮނޑިތައް ދަމަހައްޓާފައެވެ. ނަމަވެސް، އެ ޕާޓީގެ ވަރުގަދަ ރަށެއްގެ ގޮތުގައި އޮތް، އުކުޅަސް، ރަސްދޫ، އަދި މާފުށީގެ ކައުންސިލް ރައީސްކަން އެމްޑީޕީއަށް ވަނީ ގެއްލިފަ އެވެ.
- އައްޑޫ ސިޓީ ކައުންސިލް ރޫޅާލުމަށް ފަހު، އަލަށް އުފެއްދި ހުޅުދޫ، އަދި މީދޫގެ ރައީސްކަން ޕީއެންސީއަށް ކާމިޔާބު ނުކުރެވުނެވެ. ހުޅުދޫ ކައުންސިލްގެ ރައީސްކަން އެމްޑީޕީން ހޯދިއިރު، މީދޫގެ ރައީސްކަން ހޯދީ އަމިއްލަ ގޮތުން ވާދަ ކުރި ކެނޑިޑޭޓެވެ.
- ސަރުކާރު ހިންގާ ޕީއެންސީން ވަނީ ދިއްދޫ، ފުނަދޫ، އޭދަފުށި ނައިފަރު، އަދި ގއ. ވިލިނގިލި ފަދަ މުހިންމު ރަށްތަކެއްގެ ރައީސްކަން ކާމިޔާބުކޮށްފައެވެ. ނަމަވެސް، މަހިބަދޫ އާއި ރާއްޖޭގެ ނައިބުރައީސް ހުސައިން މުހައްމަދު ލަތީފުގެ ރަށް، ފަރެސްމާތޮޑާ ވެސް އެ ޕާޓީއަށް ގެއްލިފައިވެ އެވެ.
- އެމްޑީއޭ އިން 3 ގޮނޑި (ކުޑަފަރި، ބަނޑިދޫ، ހުޅުދެލި) ކާމިޔާބުކުރިއިރު، ޖުމްހޫރީ ޕާޓީން މާމިގިލީގެ ރައީސްކަން، އަދި ދަ ޑިމޮކްރެޓްސް އިން ވ. ތިނަދޫ ކައުންސިލް ރައީސްކަން ހޯދާފައިވެ އެވެ.
ގިނަ ރަށްތަކުގެ ކައުންސިލް ރައީސްކަމުގެ ގޮނޑި ޕީއެންސީއަށް ގެއްލިގެން ދިޔައިރު، ސިޓީއެއްގެ މޭޔަރުކަން އަދި ސިޓީތަކުގެ ޑަބްލިޔޫޑީސީގެ ރައީސްގެ ގޮނޑިވެސް ޕީއެންސީއަށް ވަނީ ގެއްލިފަ އެވެ. އެ ގޮނޑިތައް ކާމިޔާބުކުރީ އެމްޑީޕީންނެވެ.
