ލޯކަލް ކައުންސިލް އިންތިހާބުގައި ވެރިކަން ހިންގާ ޕީޕަލްސް ނެޝަނަލް ކޮންގްރެސްއަށް ލިބޭނެ ކަމަށް އެ ޕާޓީގެ ކެމްޕެއިނު މެނޭޖަރު އިބްރާހިމް ފަލާހު ލަފާ ކުރެއްވި ހިސާބުތައް ދިމައެއް ނުވި އެވެ.
ފަލާހު ވިދާޅުވަމުން ގެންދެވީ ލޯކަލް ކައުންސިލްތަކުގެ އިންތިހާބުގައި ޕީއެންސީއަށް 80 ޕަސެންޓު ލިބޭނެ ކަމަށެވެ. އެކަމަކު މިހާތަނަށް ގުނައި ނިމުނު ވޯޓުތަކަށް ބަލާއިރު ސަރުކާރަށް ލިބުނީ އެންމެ 43 ޕަސެންޓު ގޮނޑިތަކެވެ.
"އަޅުގަނޑުމެންގެ ހިސާބުތަކުން ދައްކާ ގޮތުން، މި ޕާޓީން ގާތްގަނޑަކަށް 800 ނުވަތަ 900 ގޮނޑި ކާމިޔާބު ކުރާނެ،" ފެބްރުއަރީ 16، ގައި ފަލާހު ވިދާޅުވި އެވެ.
ފަލާހު ކުރިން ވިދާޅުވީ ނިމިގެންދިޔަ ލޯކަލް ކައުންސިލުގެ އިންތިހާބަށް ޕީއެންސީ އިން އާދަޔާ ހިލާފު މަސައްކަތެއް ކުރި ކަމަށެވެ.
"ކެނޑިޑޭޓުންނާއި ބައްދަލުކޮށް އަޅުގަނޑުމެން އަހާލިން ކޮބާތޯއޭ ކެމްޕެއިނުގައި ތިބޭފުޅުން މިހާތަނަށް ކޮށްފައިވާ މަސައްކަތަކީ. ކޮންމެ ބޭފުޅަކު އައީ ފޮތެއް ހިއްޕަވައިގެން، އަޅުގަނޑުވެސް އިނީ ހައިރާންވެފަ. ކޮންމެ ބޭފުޅަކާ ސުވާލުކޮށްލީމަ އެ ވިދާޅުވަނީ މިހާ ހިސާބަށް އިންތިޚާބުގައި ކުރެވުނު މަސައްކަތް، ބައްދަލުކުރެއްވި ބޭފުޅުންގެ އަދަދު. ޕަސެންޓޭޖުން ތަފުސީލުކޮށް ވިދާޅުވި. އަޅުގަނޑު ދެންނެވިން ތި ތިއްބެވީ ﷲގެ ރަޙްމަތްފުޅުން ހޮވިފައޭ މިހާރު،" ފަލާހު ވިދާޅުވެފައިވެ އެވެ.
ކައުންސިލްތަކުގެ މެޖޯރިޓީ ސަރުކާރަށް ގެއްލުމުގެ އިތުރުން، ކައުންސިލުގެ ރައީސްގެ މަގާމަށް ވެސް ގިނައިން އައީ އިދިކޮޅު އެމްޑީޕީގެ ކެންޑިޑޭޓުންނެވެ. އަދި ރާއްޖޭގެ ފަސް ސިޓީގެ މޭޔަރުގެ މަގާމަށް އައީ އެމްޑީޕީގެ ކެންޑިޑޭޓުންނެވެ.
އޭގެ އިތުރުން، ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލަން ފެނޭތޯ ނެގި ވޯޓުގައި ވެސް ސަރުކާރު ވަނީ ބަލިވެފަ އެވެ. ދެ އިންތިހާބު އެއްކޮށްލަން ނުފެންނަ ކަމަށް 130،000 އަށް ވުރެ ގިނަ މީހުން ވޯޓު ދިނެވެ. އެއީ މިދިޔަ ރިޔާސީ އިންތިހާބުގެ ދެ ވަނަ ބުރުގައި މުއިއްޒަށް ލިބިވަޑައިގެންނެވި ވޯޓަށް ވުރެ އިތުރު އަދަދެކެވެ.
މިދިޔަ ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބުގައި ޕީއެންސީގެ ކެމްޕެއިނު މެނޭޖް ކުރެއްވީ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އެވެ.
ޕީއެންސީ އިން ވަނީ އޭޕްރީލް، 2024، ގައި ބޭއްވި ރައްޔިތުންގެ މަޖިލީހުގެ އިންތިހާބުގައި ވަރަށް ފުރިހަމަ ކާމިޔާބީއެއް ހޯދައިފަ އެވެ.
މަޖިލީހުގެ 93 ގޮނޑީގެ ތެރެއިން ޕީއެންސީ އިން ވަނީ 75 ގޮނޑި ކާމިޔާބުކޮށްފަ އެވެ. އެ ޕާޓީ އިން މަޖިލީހުގެ 70 އަށް ވުރެ ގިނަ ގޮނޑި ކާމިޔާބު ކުރެވޭނެ ކަމަށް ނޮވެމްބަރު، 2023، ގައި އަބްދުއްރަހީމް އޮތީ ވިދާޅުވެފަ އެވެ.
ރިޔާސީ އިންތިހާބުގައި ޕީއެންސީ އިން ކުރި ކެމްޕެއިނަށް ގިނަ ބަޔަކު ތައުރީފު ކުރި އެވެ. ރިޔާސީ އިންތިހާބުގެ ދެ ބުރުގައި ކެމްޕެއިން ކުރަން ލިބުނު 53 ދުވަހުގެ ތެރޭގައި މުއިއްޒު ވަނީ މީހުން ދިރިއުޅޭ 153 ރަށަށް ވަޑައިގެންފަ އެވެ. އަދި މުއިއްޒު ވަޑައިނުގަންނަވާ ގިނަ ރަށްތަކަށް ރަނިން މޭޓު ހުސެއިން މުހައްމަދު ލަތީފު ވަޑައިގެންނެވި އެވެ.
"މިއަދުގެ ދަތުރުގައި ހަތް ވަނަ ރަށަށް މި އާދެވުނީ. އަބްދުއްރަހީމް އެބަ ވިދާޅުވޭ އަދި ދެ ރަށަކަށް އިރުއޮއްސުމުގެ ކުރިން އަރަންޖެހެޔޭ. އަޅުގަނޑަކަށް ނޭނގެ އެކަން ކުރާނެ ގޮތެއް،" ސެޕްޓެމްބަރު 14، ގައި އދ. މަންދޫގައި ވާހަކަ ދައްކަވަމުން މުއިއްޒު ވިދާޅުވެފައިވެ އެވެ.
