މާޒީގައި ކުރިމަތިލާންޖެހުނު ބޭއިންސާފު ހަނދާންކޮށްދީ، ރައްޔިތުންގެ އިތުބާރު ރައީސް މުހައްމަދު މުއިއްޒު ހޯދުމަށްޓަކައި އިންސާފުވެރިވުމަށް ޕީއެސްއެމްގެ ކުރީގެ މެނޭޖިން ޑިރެކްޓަރު ޒީނާ ޒާހިރު ވިދާޅުވެއްޖެ އެވެ.
ލޯކަލް ކައުންސިލް އިންތިހާބާއި، ފެންނަ ނުފެންނަ ވޯޓުން ސަރުކާރަށް ނާކާމިޔާބީއާ ކުރިމަތިލާންޖެހިފައިވާ ދަނޑިވަޅުގައި، މުއިއްޒު ޓެގްކުރައްވައި އެކްސްގައި ކުރެއްވި ޕޯސްޓެއްގައި ޒީނާ ވިދާޅުވީ، އޭނާއަށް މީގެ ކުރިން ކުރިމަތިވި ބޭއިންސާފު ހަނދާނުގައި އެބަހުރި ކަމަށެވެ. އެފަދަ ކަންތައްތަކަކީ ކުރިއަށް އޮތް ތަނުގައި ތަކުރާރުވާން އެދިވަޑައިގަންނަވާ ކަންތައްތަކެއް ނޫންކަން އޭނާ ފާހަގަކުރެއްވިއެވެ.
ޒީނާގެ ކަންބޮޑުވުމާއި ފާޑުކިޔުން ގުޅިފައި އޮތީ، ބްރޯޑްކާސްޓިން ކޮމިޝަނަށް ހުށަހެޅި މީހުންގެ ތެރެއިން އެންމެ ގިނަ މާކްސް އޭނާ އަށް ލިބުނުއިރު، އެހެން މީހަކު އައްޔަން ކުރަން މަޖިލީހުން ރުހުން ދިނުމުންނެވެ. މަޖިލީހުގެ ފުރިހަމަ ކޮންޓްރޯލް އޮތީ މުއިއްޒުގެ އަތުގަ އެވެ.
"އެފަދަ ހާދިސާތައް ދެން ތަކުރާރު ނުވާނެ ކަމަށް އަޅުގަނޑު އިހުލާސްތެރިކަމާއެކު އުންމީދު ކުރަން. ރައްޔިތުންގެ އިތުބާރު ހޯދަން ބޭނުންވާ ނަމަ، އިންސާފުވެރި ނިންމުންތައް ނިންމަން ޖެހޭނެ،" މުއިއްޒަށް ސީދާ އަމާޒުކުރައްވައި ޒީނާ ވިދާޅުވި އެވެ.
މިއީ ޕީއެސްއެމްގެ އެމްޑީގެ މަގާމުން ވަކިކުރި ފަހުން، ސަރުކާރުގެ ނިންމުންތަކާ މެދު ޒީނާ މިހާ ފާޅުކަން ބޮޑު ގޮތެއްގައި ރައީސަށް ފާޑުކިޔުއްވި ފުރަތަމަ ފަހަރެވެ. ސަރުކާރަށް ވޯޓުން ލިބުނު ނާކާމިޔާބީއާއެކު، ސަރުކާރުގެ އެތެރެއިންނާއި ބޭރުން މިފަދަ ފާޑުކިޔުންތައް ވަނީ އިތުރުވެފައެވެ.
ލޯކަލް ކައުންސިލް އިންތިޚާބުގައި ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އަށް 80 ޕަސެންޓު ގޮނޑި ލިބޭނެ ކަމަށް އެ ޕާޓީގެ ކެމްޕެއިން މެނޭޖަރު އިބްރާހިމް ފަލާހު ލަފާކުރެއްވި ނަމަވެސް، ވަގުތީ ނަތީޖާއިން ދައްކާގޮތުގައި ސަރުކާރަށް ކާމިޔާބު ކުރެވުނީ އެންމެ 43 ޕަސެންޓު ގޮނޑިއެވެ. މިއީ ސަރުކާރުގެ ހިސާބުތަކާ ދިމާނުވި، ހީކުރި ވަރަށް ވުރެ ދަށް ނަތީޖާއެކެވެ.
